قازاقستان مەن ەۋروپالىق وداق جاھاندىق كۇن ءتارتىبىنىڭ نەگىزگى تارماقتارى بويىنشا, ونىڭ ىشىندە تەرروريزمگە قارسى كۇرەس, جاھاندىق جانە وڭىرلىك قاۋىپسىزدىك, كليماتتىڭ وزگەرۋى, ادام قۇقىقتارى مەن باسقا دا ماسەلەلەر بويىنشا ۇقساس ۇستانىمدارىنا يە جانە ءوزارا ءتيىمدى ساۋدا-ەكونوميكالىق ىنتىماقتاستىقتى ودان ءارى نىعايتۋعا مۇددەلى. مۇنداي قورىتىندىلار بريۋسسەلدە «قازاقستان رەسپۋبليكاسى مەن ەۋروپالىق وداق» ىنتىماقتاستىق كوميتەتىنىڭ 17-ءشى وتىرىسى بارىسىندا جاسالدى.
سىرتقى ىستەر, ۇلتتىق ەكونوميكا, ەنەرگەتيكا مينيسترلىكتەرىنىڭ, ۇلتتىق قاۋىپسىزدىك كوميتەتىنىڭ جانە باس پروكۋراتۋرانىڭ وكىلدەرىنەن تۇراتىن قازاقستان دەلەگاتسياسىن سىرتقى ىستەر ءمينيسترىنىڭ ورىنباسارى رومان ۆاسيلەنكو, ال ەۋروپالىق دەلەگاتسيانى باسقارۋشى ديرەكتوردىڭ ورىنباسارى, ەۋروپالىق سىرتقى ءىس-ارەكەتتەر قىزمەتىنىڭ رەسەي, شىعىس ارىپتەستىك, ورتالىق ازيا جانە ەقىۇ جونىندەگى ديرەكتورى ليۋك دەۆين باسقاردى.
وتىرىستىڭ بارىسىندا تاراپتار قازاقستان مەن ەو اراسىنداعى ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن, ونىڭ ىشىندە ساياسي جانە ساۋدا-ەكونوميكالىق ىنتىماقتاستىقتىڭ كەلەشەگى زور باعىتتارىن, سونداي-اق «ورتالىق ازيا – ەۋروپالىق وداق» فورماتىندا ءىس-قيمىل جاساۋ مۇمكىندىكتەرىن قاراستىردى.