جاقىندا تارباعاتاي اۋدانىنا جاساعان جۇمىس ساپارىمىزدا كۇرە جولدىڭ بويىنداعى تاۋكە اۋىلىنا جولىمىز تۇسكەن ەدى. ەلۋگە جۋىق ءۇيى بار ەلدى مەكەنگە ەكى جىل بۇرىن اۋىز سۋ پاۆيليونى ورناتىلىپتى.
تۇرعىندار اۋىلدىڭ شەت جاعىنا ورناتىلعان سۋ پاۆيليونىنان كۇنىنە ەكى مارتە سۋ الىپ تۇرادى ەكەن. ەلدى مەكەندەگى ءار ۇيدە ەكىدەن قۇدىق بولعانىمەن سۋ پاۆيليونىنىڭ سۋى تەرەڭنەن (42 مەتر) شىعاتىندىعىمەن ەرەكشەلەنەدى. «ۇيدە ورناتىلعان قۇدىقتاردىڭ سۋى 6-7 مەتردەن شىعادى. ال 42 مەتردەن شىعاتىن ارتەزيان سۋىنىڭ تازالىعىنا ەشكىم كۇمان كەلتىرمەيدى دەپ ويلايمىن. حالىقتىڭ كوبى وسىنى تۇسىنە بەرمەيدى», - دەيدى تاۋكە اۋىلىنداعى سۋ پاۆيلونىنىڭ قىزمەتكەرى كانسەبەك جامانباەۆ.
اۋىز سۋ قۇرىلعىسىنىڭ ورناتىلعانىنا اۋىل تۇرعىندارى ريزاشىلىعىن بىلدىرگەنىمەن, اۋىز سۋ ءار ۇيگە جەتكىزىلسە دەگەن تىلەگىن دە جاسىرمادى. «تازا سۋ -دەنساۋلىق كەپىلى. شاعىن اۋىلداردى وسىلاي اۋىز سۋمەن قامتىپ جاتقانىنا رازىمىز. دەسەك تە, تازا سۋ ءاربىر ۇيگە جەتكىزىلسە جاقسى بولار ەدى. ويتكەنى, بۇل اۋىلدىڭ تۇرعىندارىنىڭ كوپشىلىگى - قارتتار. بالالارى مەن نەمەرەلەرى قالادا. شال-شاۋقانعا ۇيگە كىرگىزىپ بەرسە مىڭ دا ءبىر راحمەت ايتار ەدىك», - دەيدى اۋىل تۇرعىنى جەڭىسحان تىلەۋبالدين اقساقال.
تارباعاتاي اۋدانىندا بۇگىندە حالىقتىڭ ورتالىق اۋىز سۋمەن قامتىلۋى 82,9 پروتسەنتتى قۇراپ وتىرسا, ەلدى مەكەندەردىڭ ورتالىق اۋىز سۋمەن قامتىلۋى 56,7 پروتسەنتكە جەتىپ وتىر. 2015 جىلى حالىقتىڭ ورتالىق اۋىز سۋمەن قامتىلۋى 66,6, ەلدى مەكەندەردىڭ ورتالىق اۋىز سۋمەن قامتىلۋى نەبارى 28 پروتسەنت بولىپتى. 2015 جىلى اۋدانداعى 41 863 تۇرعىننىڭ 27904-ءى سۋمەن قامتىلسا, قازىر بۇل كورسەتكىش 32 733-كە جەتىپ جىعىلىپتى. بەس جىل بۇرىن اۋدانداعى 60 ەلدى مەكەننىڭ تەك 17-سىندە اۋىز سۋ بولسا, قازىر 34 اۋىل تازا اۋىز سۋ ءىشىپ وتىرعان جايى بار. وسى بەس جىلدا سۋبسيديا كولەمى دە بەس ەسەگە ارتىپتى (2015 - 21 ميلليون, 2018 - 87,6 ميلليون). «ۇلكەن اۋىلداردىڭ بارلىعىنا دەرلىك اۋىز سۋ جەتكىزىلدى. اۋىز سۋ جەتكىزىلمەگەن 50 مەن 400-گە دەيىن تۇرعىنى بار 26 (3380 تۇرعىن) اۋىل قالدى. 2018 جىلى ۇشتوبە, سەرىكتەس, سارىولەڭ اۋىلدارى سۋعا قوسىلدى. 2019 جىلى قىزىلكەسىك, ساتپاەۆ, قۇمكول, ماڭىراق, ەكپىن اۋىلدارىنا سۋ قۇبىرىن تارتۋ جۇمىستارى جۇرگىزىلەدى. بۇعان رەسپۋبليكالىق بيۋجەتتەن 3,1 ميلليارد تەڭگە قارجى ءبولىندى. كىشكەنە اۋىلدارعا اۋىز سۋدى ۇيىنە دەيىن جەتكىزبەسەك تە, قۇبىر قازىپ, سۋ شىعارىپ بەرىپ جاتىرمىز», - دەيدى تارباعاتاي اۋدانىنىڭ اكىمى دىلدابەك ورازباەۆ.
ازامات قاسىم,
«Egemen Qazaqstan»
شىعىس قازاقستان وبلىسى,تارباعاتاي اۋدانى