«KazakhExport» ەكسپورتتىق ساقتاندىرۋ كومپانياسى كۇنباعىس مايىنىڭ قازاقستاندىق ءوندىرۋشىسى «سەي-نار» وندىرىستىك كەشەنى» جشس-نە (شىعىس قازاقستان وبلىسى) «قازاقستاننىڭ دامۋ بانكى» اق الدىنداعى ەكى ميلليارد تەڭگە مىندەتتەمەلەرى بويىنشا كەيىننەن ەكسپورتقا شىعارىلاتىن, تازارتىلماعان وسىمدىك مايىن ءوندىرۋ ءۇشىن شيكىزات (كۇنباعىس) ساتىپ الۋ ماقساتىندا الىنعان بانك قارىزىن ساقتاندىرۋ ارقىلى قولداۋ كورسەتتى.
«سەي-نار» وندىرىستىك كەشەنى» جشس قىزمەتىنىڭ نەگىزگى باعىتى – تازارتىلماعان وسىمدىك مايى, شروت, ۇن جانە اۋىل شارۋاشىلىعىنىڭ باسقا دا قايتا وڭدەلەتىن ونىمدەرىن شىعارۋ بولىپ تابىلادى. كاسىپورىن ءونىم كولەمىنىڭ 60%-نان استامىن قىتاي, وزبەكستان, تاجىكستان سەكىلدى شەتەلدەرگە شىعارادى.
بولىنگەن قاراجات ەسەبىنەن كومپانيا قىتايلىق ترەيدەرمەن جاسالعان ەكسپورتتىق كەلىسىمشارت بويىنشا, سونداي-اق قولعا الىنعان باسقا دا كەلىسىمشارتتار بويىنشا مىندەتتەمەلەرىن ورىنداۋدى جوسپارلاپ وتىر. ساقتاندىرۋ قورعانىسىنىڭ بەرىلۋى كاسىپورىننىڭ بۇكىل جىل بويى ۇزدىكسىز ءوندىرىسىن قامتاماسىز ەتۋ ءۇشىن 20 000 توننا كولەمىندە كۇنباعىس ساتىپ الۋ قاجەتتىلىگىمەن بايلانىستى. بۇل شيكىزاتتان كومپانيا 9 000 تونناعا دەيىن ماي ءوندىرىپ, وندىرگەن ءونىمىن قىتايعا ەكسپورتقا وتكىزە الادى. قحر كومپانياسىمەن جاسالعان ەكسپورتتىق كەلىسىمشارتتىڭ جالپى سوماسى ون ميلليون اقش دوللارىن قۇرايدى.
«KazakhExport» ەكسپورتتىق ساقتاندىرۋ كومپانياسى» اق – «بايتەرەك» حولدينگىنىڭ ەنشىلەس كومپانياسى. KazakhExport ەكونوميكانىڭ باسىم سەكتورلارىندا شيكىزاتتىق ەمەس تاۋارلار, جۇمىستار, قىزمەتتەر ەكسپورتىنىڭ ءوسىمىن قولداۋ جانە قازاقستاندىق كاسىپورىنداردى قارجىلاي-ساقتاندىرۋ جانە قارجىلاي ەمەس قولداۋ پراكتيكاسىن قالىپتاستىرۋمەن اينالىسادى.