ءيا, وسكەمەن قالاسى جاستار جىلىن ەلىمىزدە العاشقىلاردىڭ قاتارىندا «تاۋەلسىزدىك ۇرپاقتارى» اتتى جاستار اكتسياسىمەن سالتاناتتى تۇردە اشتى.
وبلىس ورتالىعىنداعى جەكپە-جەك سارايىندا وتكەن شاراعا قۇرمەتتى قوناق رەتىندە كاسىپقوي بوكسشى قانات يسلام, اقىن قالقامان سارين, جەڭىل اتلەت, ءۇش بىردەي وليمپيادا جۇلدەگەرى ولگا رىپاكوۆا, «التاي» ۆولەيبول كلۋبىنىڭ بەلدى ويىنشىسى كريستينا انيكينوۆا شاقىرىلىپتى. سالتاناتتى شارادا ءبىرىنشى بولىپ ءسوز العان شاھار باسشىسى جاقسىلىق ومار قالا اكىمدىگى جاستار جىلىن اتاپ وتۋگە ەرەكشە ازىرلىكپەن كەلگەنىن, اتاۋلى جىلعا ارنايى ءىس-جوسپار بەكىتىلگەنىن جەتكىزدى. «جاستار جىلى اياسىندا ءتۇرلى ءىس شارالاردان بولەك, قالامىزداعى جىگەرلى, باسەكەگە قابىلەتتى جاستاردى قولداۋعا, ولارعا باعىت-باعدار بەرۋگە كوڭىل بولمەكپىز. وسكەمەندەگى 400 مىڭعا جۋىق حالىقتىڭ 25 پروتسەنتىن جاستار قۇرايدى. «كۇن شىعىستان شىعادى» دەپ بەكەرگە ايتىلماسا كەرەك. اكتسيانى ەلدەن ەرتە باستاپ جاتقانىمىزدىڭ سەبەبى دە سول. وسكەمەننىڭ الپىس ەكى تامىرى حالقىم دەپ سوققان جاستارى وسى جىلدى ايرىقشا كوڭىل-كۇيمەن, ايرىقشا ۇمىتپەن, ۇلكەن سەرگەكتىكپەن اتاپ وتەدى دەپ ويلايمىن», - دەدى قالا اكىمى.
شارا بارىسىندا قۇرمەتتى قوناقتار ساحناعا شىعىپ, ءسوز سويلەپ, ولگا رىپاكوۆا جاس اتلەت ەليزاۆەتا ماتۆەەۆاعا, قالقامان سارين جاس اقىن ەراسىل ەرمەك ۇلىنا, قانات يسلام جاس سپورتشى باۋىرجان ساتجانوۆقا, كريستينا انيكينوۆا 43 مەكتەپتىڭ جاس ۆولەيبولشىسىنا ەستەلىك سىيلىقتارىن تاپسىردى. وسكەمەندىك «ينكوررو» توبى, «ح-فاكتور» جەڭىمپازى ەۆگەني ۆىبلوۆ, «تى سۋپەر» تەلەۆيزيالىق جوباسىنىڭ ءفيناليسى ۆلاد لوسكۋتوۆ پەن الىستان ات ارىتىپ كەلگەن «Made in KZ" توبىنىڭ اۋەلەتكەن اندەرى مەن كۇمبىرلەگەن كۇيلەرى جاستار اكتسياسىنىڭ ءسانىن كىرگىزىپ, كورەرمەندەردىڭ كوڭىلىن ءبىر سەرپىلتىپ تاستادى.
رەتى كەلگەندە ايتا كەتەيىك, وسكەمەنگە قۇرمەتتى مەيمان رەتىندە شاقىرىلعان قانات يسلام مەن قالقامان سارين وسى ساپارلارىندا وبلىس ورتالىعىنىڭ بىرنەشە مەكتەبىندە وقۋشىلارمەن كەزدەسىپ, ەمەن-جارقىن اڭگىمە-دۇكەن قۇرىپ قايتتى.
ازامات قاسىم,
«Egemen Qazaqstan»
وسكەمەن