كوپتەگەن سپورتشىلار ءۇشىن وليمپيادا قارساڭىنداعى ماۋسىم قارقىندى باستالدى. ۆەلوترەكشىلەر مەن كاراتەشىلەر الەم كۋبوگى كەزەڭدەرىندە, پرەمەر-ليگا تۋرنيرلەرىندە باق سىناپ ۇلگەرسە, وليمپيادالىق سپورت تۇرلەرىندەگى ۇلتتىق قۇراما كوماندالار ەلىمىز بەن شەتەلدەگى وقۋ-جاتتىعۋ جيىندارىنا قاتىسۋدا. ال بالۋاندار ءۇشىن بوزكىلەمدەگى تارتىس شىمكەنت تورىندە باستالماق. اقپاننىڭ 7-10 ارالىعىندا كۇرەس تۇرلەرىنەن قازاقستان چەمپيوناتى وتەدى. اتالعان سىن الداعى رەيتينگىلىك جارىستار مەن ازيا جانە الەم چەمپيوناتىنا قاتىساتىن ۇلتتىق قۇرامانى جاساقتاۋعا مۇمكىندىك بەرمەك. ۇلتتىق قۇراما كوشباسشىسى اتاعىنا كىمدەر يە بولۋى مۇمكىن؟ وسى سۇراققا Olympic.kz جاۋاپ ىزدەپ كوردى.
بيىل قازاق بالۋاندارىنىڭ الدىندا ۇلكەن مىندەت تۇر. قىركۇيەك ايىندا وليمپياداعا ليتسەنزيا تاراتاتىن الەم چەمپيوناتى استانادا وتپەكشى. اتالعان تۋرنير ەلىمىزدەگى بىلەكتى بالۋانداردىڭ جاۋاپكەرشىلىگىن ەكى ەسەگە ارتتىرادى.
بىرىنشىدەن, كۇرەس تۇرلەرىنەن الەم چەمپيوناتتارىندا التىن الماعانىمىزعا جيىرما جىل تولدى. گرەك-ريم كۇرەسىنەن 1999 جىلعى باقتيار بايسەيىتوۆتىڭ جەڭىسىنەن بەرى تۇعىر بيىگىندە تۇرعان بالۋانىمىز ءالى جوق. ەركىن كۇرەس شەبەرلەرىنە دە مۇنداي باقىت بۇگىنگە دەيىن بۇيىرماعان.
ەكىنشىدەن, توكيو وليمپياداسىنا جولداما الۋ مىندەتىنەن بولەك, ءوز جەرىمىزدە, ءوز جانكۇيەرىمىزدىڭ الدىندا نامىسقا تىرىسۋ, تۋىمىزدى جىقپاۋ سىندى ابىرويلى ءىس كۇتىپ تۇر. وسى سىناقتاردان سۇرىنبەي وتەتىن بالۋان بىزدە بار ما؟
ەركىن كۇرەستەن ۇلتتىق قۇرامانىڭ باس باپكەرى اسەت سەرىكباەۆ سپورتشىلاردان ەرلىك كۇتەتىنىن ايتادى.
«شىمكەنتتەگى ەل چەمپيوناتىندا ءبىز كۇتپەگەن ءبىر جاڭالىق بولسا دەگەن ءۇمىت بار. اسىرەسە, جاستاردان كۇتەرىم كوپ. جاقسى جىگىتتەر جوق ەمەس, بار. ءبىزدىڭ ماقسات – سولاردىڭ كوزىن اشۋ. استانادا وتەتىن الەم چەمپيوناتىندا جەرگە قاراماۋ كەرەكتىگىن بالۋاندار جاقسى تۇسىنەدى. جاۋاپكەرشىلىك جۇگى جەڭىل ەمەستىگىن ولار باياعىدا سەزىنگەن. ەندى بارلىعىن كىلەم كورسەتەدى عوي. باپكەرلەر ايانىپ قالماس, بالۋاندار دا بار كۇشىن سالۋى كەرەك», - دەيدى باس باپكەر.
ەركىن كۇرەس بالۋاندارى بار ىنتاسىمەن شىمكەنتتەگى دوداعا دايىندالىپ جاتىر. جاقىندا وتكەن يۆان يارىگين اتىنداعى رەيتينگىلىك تۋرنيرگە ۇلتتىق قۇراما سپورتشىلارى قاتىسقان جوق. وعان سەبەپ – سالماق قۋ كەزىندە بالۋانداردى شارشاتىپ الماۋ. رەسمي تۋرنير بولعاندىقتان, يارىگين اتىنداعى گران-پريگە قاتىساتىن بالۋان ابدەن سالماق قۋى ءتيىس. ال ەكى اپتادان سوڭ قازاقستان چەمپيوناتىندا دا سپورتشىلاردىڭ وسى جۇيەگە ورالارىن بىلگەن باپكەرلەر قۇرامى شىمكەنتتەگى ەل بىرىنشىلىگىنە باسىمدىق بەردى.
2018 جىلعى الەم چەمپيوناتىندا ەركىن كۇرەستەن 57 كەلىدە فينالعا جەتىپ, كۇمىس مەدال تاعىنعان نۇريسلام ساناەۆ ەل چەمپيوناتىنان تىس قالمايدى. الايدا, بالۋان وزىنە ۇيرەنشىكتى سالماعىنان باس تارتىپ, 61 كەلىدە باق سىناۋعا بەل بۋىپتى.
57 كەلىدە چەمپيوندىق اتاقتى نەگىزىنەن جاس سپورتشىلار ساراپقا سالماق. وسى سالماقتاعى ۇزدىكتەردىڭ ءبىرى, 2018 جىلعى ازيا چەمپيوناتىنىڭ قولا جۇلدەگەرى جاندوس يسمايلوۆ تىزە جاراقاتىنا بايلانىستى جارىستان باس تارتتى.
61 كەلىدە نۇريسلام ساناەۆقا قارسىلاس بولاتىن راسۋل قاليەۆ پەن قايرات امىرتاەۆ بار. 2014 جىلعى ازيا چەمپيونى ءارى ازيا ويىندارىنىڭ جۇلدەگەرى سانالاتىن راسۋل سوڭعى جىلدارى ءىرى دودالاردان قۇر قول قايتىپ ءجۇر. بىلتىرعى قازاقستان چەمپيوناتىندا ول قولا مەدال يەلەنگەن بولاتىن. بيىل ول بۇرىنعى بابىنا كەلىپ, قۇراماداعى ورنىن قايتارىپ الۋ ءۇشىن بار كۇشىن سالارى ءسوزسىز. ال 2018 جىلعى ەل چەمپيونى, 2017 جىلعى جاستار اراسىنداعى الەم چەمپيوناتىنىڭ كۇمىس جۇلدەگەرى قۋات امىرتاەۆ جاراقاتىنا بايلانىستى قاتىسا المايدى. ونىڭ سىڭارى قايرات چەمپيوندىق اتاققا تالاساتىن بولادى.
65 كەلىدەگى بالۋانداردىڭ شوقتىعى بيىك. بۇل سالماقتا تالانتتى جاستاردان بولەك, داۋلەت نيازبەكوۆ, ساياتبەك وقاسوۆ, مەيىرجان ءاشىروۆ, ءىلياس جۇماي سىندى ۇزدىكتەر بوزكىلەمدە كىم مىقتىنى انىقتاماق. داۋلەت نيازبەكوۆ بۇل سالماقتاعى ەڭ تاجىريبەلى بالۋان. لوندون وليمپياداسىنىڭ قاتىسۋشىسى, ودان بولەك, 2011 جىلعى الەم چەمپيوناتىنىڭ كۇمىس جۇلدەگەرى. داۋلەتتىڭ ءۇش دۇركىن ازيا چەمپيونى دەگەن اتاعى دا بار. ازيا ويىندارىنىڭ قولا جۇلدەگەرى ساياتبەك وقاسوۆ, ستۋدەنتتەر اراسىنداعى الەم چەمپيونى, ازيا بىرىنشىلىگىنىڭ قولا جۇلدەگەرى مەيىرجان ءاشىروۆتىڭ دە جۇلدەگە تالاسارى ءسوزسىز.
70 كەلى سالماقتا باپكەرلەر قاۋىمى جاس بالۋانداردان ءۇمىت كۇتىپ وتىر. تاجىريبەلى بالۋانداردان اماندىق باكيەۆ پەن داۋرەن جۇماعازيەۆتى اتاپ وتۋگە بولادى. ەكەۋى دە تىسقاققان سپورتشىلار. داۋرەننىڭ جەڭىستى جىلدارى لوندون وليمپياداسىنا دەيىن وتسە دە, الماتى وبلىسىنىڭ تۇلەگى كىلەمنەن الىستاي قويعان جوق. اماندىق باكيەۆ ءوز سالماعىندا ۇزدىك سانالعانىمەن, حالىقارالىق تۋرنيرلەردە مىقتىلىعىمەن قۋانتا قويعان جوق.
74 كەلى سالماق دارەجەسىندە دە «سەن تۇر, مەن اتايىن» دەگەن مىقتىلار بارشىلىق. باستى بەلدەسۋ 2018 جىلى دجاكارتادا وتكەن ازيا ويىندارىنىڭ ءفيناليسى دانيار قايسانوۆ پەن 2016 جىلعى الەم چەمپيوناتىنىڭ كۇمىس جۇلدەگەرى نۇرلان بەكجانوۆ اراسىندا وتەدى دەپ كۇتىلۋدە. ەكەۋىنىڭ اراسىنداعى سوڭعى بەلدەسۋ بەكجانوۆتىڭ جەڭىسىمەن اياقتالعان. 2018 جىلعى كونفەدەراتسيا كۋبوگىنىڭ اقتىق سىنىندا قايسانوۆ نۇرلانعا ەش قايسار كورسەتە العان جوق. سونداي-اق, وسى سالماقتا سوڭعى الەم چەمپيوناتىنا قاتىسقان بولات ساقاەۆتى دا ەسەپتن شىعارۋعا بولمايدى.
79 كەلىدە ساكەن ايتجانوۆ, باقتيار ءىزباساروۆ, عالىم وسەرباەۆتار كوش باستاۋى مۇمكىن. بۇل ۇشتىك وتكەن جىلعى ەل بىرىنشىلىگىندە دە ۇزدىكتەر ساناتىنان كورىنگەن.
86 كەلىدە بىلتىرعى قازاقستان چەمپيوناتىنىڭ التىن جانە كۇمىس جۇلدەگەرى اتانعان ادىلەت داۋلانباەۆ پەن ازامات داۋلەتبەكوۆ ءالى دە فاۆوريتتەر قاتارىندا.
92 كەلىدە ەرالى ابدىراشەۆ پەن نۇرعالي نۇرعايىپ ۇلى, 97 كەلىدە باقداۋلەت المەنتاەۆ پەن مامەد يبراگيموۆتەر جۇلدەدەن ءۇمىتتى.
ال اسا اۋىر سالماقتاعى بالۋاندار ايتارلىقتاي جەڭىسىمەن قۋانتىپ جۇرگەن جوق. مۇندا جەڭىسكە جەتۋى مۇمكىن ولەگ بولتين مەن ىڭكار ەرمۇحاممەدتىڭ ءىرى تۋرنيرلەردە الىسقا شابۋى ەكىتالاي.
قازاقستان چەمپيوناتى اياقتالىپ, قۇراما جاساقتالعان سوڭ بالۋاندار الماتى وبلىسىنداعى ءاىۆا بازاسىندا وقۋ-جاتتىعۋ جيىندارىن وتكىزەدى. 13-27 اقپان ارالىعىندا وتەتىن جيىنعا بەلارۋس جانە وزبەكستان كوماندالارىنىڭ ناقتى قاتىساتىنى انىقتالدى.
جيىن اياقتالعان سوڭ بالۋاندار 28 اقپان مەن 3 ناۋرىز ارالىعىندا بولگاريادا وتەتىن حالىقارالىق تۋرنيرگە اتتانادى.