قازاقستان رەسپۋبليكاسى پارلامەنتى ءماجىلىسىنىڭ توراعاسى نۇرلان نىعماتۋلين جۇمىس ساپارىمەن تاراز قالاسىنا كەلدى. ءماجىلىس سپيكەرى اۋەلى «قازفوسفات» جاۋاپكەرشىلىگى شەكتەۋلى سەرىكتەستىگىنىڭ جاڭا جامبىل فوسفور زاۋىتىندا بولىپ, كاسىپورىننىڭ تىنىس-تىرشىلىگىمەن تانىستى.
زاۋىتتىڭ №16 جوندەۋ-مەحانيكالىق تسەحىندا بولعان ءماجىلىس توراعاسىنا سەرىكتەستىك باسشىسىنىڭ ورىنباسارى ءنۇرزيا لەسبەكوۆا كاسىپورىننىڭ بۇگىنگى جۇمىسى تۋرالى باياندادى. ول وتكەن جىلعى اتقارىلعان جۇمىستار جونىندە ماعلۇمات بەرىپ, الداعى جوسپارلارمەن دە ءبولىستى. سونىمەن قاتار, نۇرلان نىعماتۋلين كاسىپورىن جۇمىسشىلارىمەن كەزدەسىپ, ەلباسى جولداۋىنداعى باسىم باعىتتار مەن ناقتى مىندەتتەرگە توقتالدى. كەزدەسۋ بارىسىندا ءماجىلىس توراعاسى ەلباسى جولداۋىندا ايتىلعان كاسىپورىن جۇمىسشىلارىنىڭ جالاقىسىنىڭ ءوسۋى, «7-20-25» باعدارلاماسى اياسىندا باسپانالى بولۋ سەكىلدى بىرقاتار جايتتى اڭگىمەلەدى.
«قازفوسفات» جشس وتكەن جىلدىڭ قورىتىندىسى بويىنشا 112,1 ميلليارد تەڭگەنىڭ ءونىمىن وندىرگەن. كاسىپورىن ونىمدەرى گەرمانيا, اقش, دانيا, شۆەيتساريا, پولشا, وزبەكستان, نيدەرلاندى جانە وزگە دە مەملەكەتتەرگە ەكسپورتتالادى. جامبىل وڭىرىنە جۇمىس ساپارى بارىسىندا ءماجىلىس سپيكەرىنە وڭىردەگى الىپ كاسىپورىننىڭ تىنىسى تىڭعىلىقتى باياندالدى.
بۇدان كەيىن نۇرلان نىعماتۋلين م.ح.دۋلاتي اتىنداعى تاراز مەملەكەتتىك ۋنيۆەرسيتەتىنە كەلىپ, بەلسەندى جاستارمەن كەزدەستى. بەس جۇزدەن استام جاس قاتىسقان جيىندا ءماجىلىس توراعاسى بۇگىنگى جاستاردىڭ تاۋەلسىزدىكتىڭ رۋحىمەن ءوسىپ كەلە جاتقانىن ايتىپ, كۇنى كەشە عانا ەلباسىنىڭ قاتىسۋىمەن استانا تورىندە وتكەن «جاستار جىلىنىڭ» اشىلۋىمەن قۇتتىقتادى.
ء«اربىر ەلدىڭ, ءاربىر مەملەكەتتىڭ بولاشاعى - جاستار. سوندىقتان ءبىز «جاستار جىلى» اياسىندا ماڭىزدى كەزەڭدە كەزدەسىپ وتىرمىز. بيىلعى جىلدىڭ جاستارعا جاڭا قۋات, جاڭا جىگەر, جاڭا كۇش بەرەتىنىنە سەنىم مول. مەملەكەتتىڭ قولداۋىنىڭ ناتيجەسىندە جامبىل وبلىسىنداعى بارلىق جوعارى وقۋ ورىندارىندا ساپالى ءبىلىم بەرۋگە تولىق مۇمكىندىكتەر بار. سونىمەن قاتار, جامبىل ءوڭىرى - قازاق حاندىعىنىڭ العاشقى تۋى تىگىلگەن ايماق. سوندىقتان جامبىل جاستارىنىڭ رۋحى بارىنەن بيىك بولۋ كەرەك» دەدى ءماجىلىس توراعاسى.
ال م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى ماحمەتعالي سارىبەكوۆ بۇگىندە جاستارعا مەملەكەت تاراپىنان بارلىق مۇمكىندىكتەر جاسالىپ وتىرعانىن, ەندىگى جەردە جاستار تەك ءبىلىم مەن عىلىمدى يگەرۋ كەرەكتىگىن ايتتى.
ءوز سوزىندە سپيكەر ەلىمىز ەگەمەندىك العاننان بەرى ەل ەرتەڭى جاستارعا كوڭىل ءبولىنىپ كەلە جاتقانىن, ەلباسى «بولاشاق» باعدارلاماسى ارقىلى قازاق جاستارى ءۇشىن الەمدىك وركەنيەتكە جول اشقانىن, ناتيجەسىندە بۇگىندە ون ەكى مىڭ جاستىڭ ەلىمىزگە قىزمەت ەتىپ وتىرعانىن جەتكىزدى. سونىمەن قاتار, ەلباسى جاستار ءۇشىن باسپانا, جۇمىسپەن قامتۋ ماسەلەلەرىن دە قاراستىرىپ وتىرعانىن ايتتى.
كەزدەسۋ بارىسىندا ديانا ابدىعاپپار, قامبار ماقسات, ارۋجان سەكەربەك سىندى بەلسەندى جاستار جانە وزگە دە ستۋدەنتتەر كوكەيدەگى ساۋالدارىن جولداپ, ءتيىستى جاۋاپتارىن الدى. نۇرلان نىعماتۋلين جاستارعا بەرگەن جاۋابىندا جاستاردىڭ ءبىلىم الۋدا دا, قوعامدىق جۇمىستاردى اتقارۋدا دا بەلسەندى بولۋى كەرەكتىگىن, اۋىلدى جەرلەرگە جاس مامانداردى تارتۋ ءۇشىن باسپانا, جۇمىس جانە جالاقى ماسەلەسىن جەرگىلىكتى اكىمدەردىڭ شەشۋى ءتيىس ەكەنىن, بۇل ماسەلەگە بيۋدجەتتەن قاراجات بولىنگەنىن ايتىپ ءوتتى.
جامبىل وڭىرىنە جۇمىس ساپارى بارىسىندا ءماجىلىس توراعاسى نۇرلان نىعماتۋلين «نۇر وتان» پارتياسى جامبىل وبلىستىق فيليالىنا كەلىپ, ازاماتتاردى قابىلداۋ ساعاتىن وتكىزدى. سپيكەر ازاماتتاردىڭ ساۋالىن تىڭداپ, ولارعا ناقتى جاۋاپ بەردى.
حاميت ەسامان,
«Egemen Qazaqstan»
جامبىل وبلىسى