شەكاراشى قالتا ۇرىسىن قولعا ءتۇسىردى

اقتوبە شەكارا وتريادىنىڭ اسكەري قىزمەتشىسى, سەرجانت كەنجەعۇلوۆ ازامات وڭداسىن ۇلى كەشە, ساعات 20-لار شاماسىندا كەزەكتى جاتتىعۋدان شىعىپ, قوعامدىق كولىكپەن ۇيىنە قايتىپ كەلە جاتقان بولاتىن. اۆتوبۋستىڭ ارتقى جاعىندا وتىرعان ازامات كۇدىكتى ادامدى بايقاپ, جاسىرىن تۇردە اڭدىپ وتىرعان.

شەكاراشىنىڭ كۇدىگى دالەلدەنىپ, الگى ادام كەزەكتى «قۇرباندىعىنىڭ» قالتاسىنان, اسقان «شەبەرلىكپەن», ءاميانىن سۋىرىپ الا بەرگەن كەزدە ونىڭ قىلمىس اسپابىنا اينالعان قولى ايعاق زاتىمەن بىرگە قويان-قولتىق ۇرىس تاسىلدەرىن جاقسى مەڭگەرگەن ازاماتتىڭ «تەمىر قۇرساۋىنا» ءتۇسىپ, ارقاسىنا قاراي قايىرىلدى. قىلمىس ۇستىندە ۇستالعان ۇرىنى سەرجانت ا. كەنجەعۇلوۆ ءوزى شاقىرىپ ۇلگەرگەن پوليتسيا ناريادى كەلگەنگە دەيىن تىرپ ەتكىزبەي تىزەسىمەن باسىپ وتىرىپ, قولدان-قولعا وتكىزىپ بەردى.

كەيىن انىقتالعانداي, ۇستالعان ادام ىشكى ىستەر ورگاندارى تاراپىنان ىزدەۋدە جۇرگەن ەكەن.