اتىراۋ وبلىسىنداعى ماقات پەن دوسسور كەنتتەرىنىڭ اراسىنداعى جولدىڭ جاعدايى سىن كوتەرمەيتىنى تۋرالى ءبىراز جىلدان بەرى ماسەلە كوتەرىلىپ كەلەدى. «نۇرلى جول» مەملەكەتتىك باعدارلاماسىنىڭ اياسىندا اقتوبە-اتىراۋ تاس جولىنىڭ بويىندا ورنالاسقان وسى اۋماق تا كۇردەلى جوندەۋدەن وتكىزىلە باستادى. وبلىس اكىمى نۇرلان نوعاەۆ جول قۇرىلىسى بيىل ءبىرىنشى جارتىجىلدىقتا اياقتالىپ, پايدالانۋعا بەرىلەتىنىن ايتتى.
ماقات – ەلدى مەكەندەرىنىڭ سانى جاعىنان وبلىستاعى ەڭ شاعىن اۋدان. سوڭعى جىلدارى ايتارلىقتاي ينۆەستيتسيا تارتىپ وتىر. وتكەن جىلى نەگىزگى كاپيتالداعى ينۆەستيتسيا كولەمى 11 ملرد 853 ملن تەڭگەگە جەتتى. «بىلتىر اۋداندا 26 320 شارشى مەتر تۇرعىن ءۇي پايدالانۋعا بەرىلدى. ەكونوميكانىڭ بارلىق سەكتورىندا 1730 جۇمىس ورنى قۇرىلدى, بۇل 2017 جىلمەن سالىستىرعاندا 24,1 % جوعارى», دەپ اتاپ ءوتتى اۋدان اكىمى جۇماباي قاراعاەۆ.
وڭىردەگى جاڭالىقتىڭ ءبىرى − قاراباتان ستانساسىندا «سۇيىلتىلعان كومىرسۋتەگى گازىن قابىلداۋ, ساقتاۋ جانە جۇكتەۋ» جوباسىن جۇزەگە اسىرۋ بويىنشا جوبالىق جۇمىستاردى جۇرگىزۋ جوسپارلانىپ وتىر. جوبالاۋ جۇمىستارى 2019 جىلى باستالىپ, 2021 جىلى اياقتالادى.
– جوبانى, قۇرىلىس جۇمىستارىن جۇزەگە اسىرۋ كەزىندە 500 جۇمىس ورنى اشىلادى. قۇرىلىس اياقتالعاننان كەيىن 100 ادام تۇراقتى جۇمىسپەن قامتىلادى. كەشەنگە جىل سايىن 750 مىڭ توننا سۇيىلتىلعان كومىرسۋتەگى گازى تۇسەدى دەپ كۇتىلۋدە. جوبانى ىسكە اسىرۋ اۋدان بيۋدجەتىن 700 ملن تەڭگەگە تولىقتىرۋعا مۇمكىندىك بەرەدى, − دەيدى اۋدان اكىمى.
اۋداندا قۇرىلىس سالاسى قارقىندى دامىپ كەلە جاتقانىن اتاپ ءوتۋ كەرەك. بيىل دوسسور كەنتىندە 60 پاتەرلىك تۇرعىن ءۇي قۇرىلىسى باستالادى. س.ءشارىپوۆ اتىنداعى مەكتەپ-ينتەرنات پەن ل.شاحاتوۆ اتىنداعى مەكتەپ كۇردەلى جوندەۋدەن وتەدى. دوسسوردا 5,8 شاقىرىم اۆتوجول, 3,4 شاقىرىم جولاۋشىلار جولى جوندەلەدى. بيىل 100 ورىندىق ساناتورلىق تيپتەگى بالاباقشا پايدالانۋعا بەرىلەدى. 280 ورىندىق بالاباقشا سالىنادى. قازىر اۋدان بويىنشا بالاباقشا كەزەگىندە 800 بالا تۇر. ءۇش بالاباقشانىڭ قۇرىلىسىنا جوبالاۋ-سمەتالىق قۇجاتتاما ازىرلەنىپ جاتىر.
وسىنداي جۇمىستار ماقاتتا دا قولعا الىنادى. وتكەن جىلى باستالعان كەنتىندەگى تازارتۋ قوندىرعىسىنىڭ قۇرىلىسى بيىل اياقتالادى دەگەن جوسپار بار. اۋدان باسشىسى وسى ارقىلى ەكولوگيالىق پروبلەمالار شەشىمىن تاباتىنىن ايتتى. بۇگىنگە دەيىن بارلىق كارىز قالدىقتارى تازارماعان كۇيىندە بۋلانۋ الاڭىنا قۇيىلىپ كەلەدى.
جۇمىس ساپارى بارىسىندا ايماق باسشىسى نۇرلان نوعاەۆ اۋداندىق قورعانىس ىستەرى ءبولىمى مەن ساناتورلىق تيپتەگى «شاپاعات» بالالار باقشاسىنا دا باردى. اۋداندىق قورعانىس ىستەرى بولىمىندە وبلىس اكىمى جاقىن ارادا جاڭا عيمارات قۇرىلىسى باستالاتىنىن اتاپ ءوتتى. «قازىر اۋداندىق قورعانىس ىستەرى بولىمدەرىنە جاڭا عيمارات سالۋدىڭ تيپتىك جوباسىن جاساپ جاتىرمىز. ءبىرىنشى نىسان ماحامبەت اۋدانىندا سالىنادى, كەيىن باسقا اۋدانداردا دا جالعاسادى», دەدى ن.نوعاەۆ.
اۋداننىڭ الەۋمەتتىك-ەكونوميكالىق كورسەتكىشتەرىندە وڭ وزگەرىس بايقالادى. سوڭعى جىلدارى اۋىل شارۋاشىلىعى دا جاقسى دامىپ, سالاداعى جالپى ءونىم 749,8 ملن تەڭگەگە ءوستى.
باقىتگۇل باباش,
«Egemen Qazaqstan»
اتىراۋ وبلىسى