اۋىز سۋ ماسەلەسىن شەشۋ – ماڭعىستاۋ وڭىرىندەگى وزەكتى ماسەلە. ىرگەسىندەگى تولقىعان تەڭىز سۋىنىڭ تۇزدىلىق دەڭگەيىنىڭ جوعارى بولۋى سەبەپتى اتالمىش ايدىن سۋىن تەك تازالاپ, تۇشىتىپ پايدالانۋ قاجەت. قازىرگى تاڭدا وبلىس تۇرعىندارىنىڭ 56 پايىزى تۇشىتىلعان تەڭىز سۋىن, 56 پايىزى استراحان-ماڭعىشلاق قۇبىرىنىڭ سۋىن جانە 8 پايىزى جەراستى سۋ كوزدەرىن پايدالانىپ وتىر.
وڭىردە حالىق سانىنىڭ كوبەيگەنى, سونداي-اق ەگىن شارۋاشىلىعىنىڭ ازدى-كوپتى ەتەك جايىپ, مال شارۋاشىلىعىنىڭ ماڭىزدىلىعى ارتا تۇسكەنى سۋ تۇشىتۋ كولەمىن ارتتىرىپ, ونىمدىلىگىن ۇلعايتۋدى تالاپ ەتۋدە. بۇل تالاپتار سالاداعى جۇمىستاردى جانداندىرا ءتۇسۋ كەرەكتىگىن ۇقتىردى. وسى تۇرعىدا تەڭىز سۋىن اۋىز سۋ رەتىندە تۇشىتۋمەن اينالىساتىن «كاسپي سۋ تۇشىتۋ زاۋىتىن» جاڭعىرتۋ جۇمىستارى الدىڭعى كەزەكتە قولعا الىندى. 2017 جىلى «نۇرلى جول» باعدارلاماسى اياسىندا 3,1 ملرد تەڭگەگە زاۋىتتىڭ قوندىرعىلارى جاڭارتىلىپ, سۋ تۇشىتۋ قۋاتى تاۋلىگىنە 30 مىڭ تەكشە مەترگە جەتتى. بۇگىندە زاۋىت مۇنايلى اۋدانىن تولىقتاي, قاراقيا اۋدانىنىڭ قۇرىق اۋىلىن اۋىز سۋمەن قامتاماسىز ەتۋدە.
تەڭىزدىڭ تەلەگەي سۋىن تولاسسىز تۇشىتۋ زور قاجىر-قايراتتى قاجەت ەتەدى. بىراق زاۋىتتىڭ قۋاتىن بىرتە-بىرتە ارتتىرۋ – تۇرمىس تالاپ ەتىپ وتىرعان قاجەتتىلىك, اۋىز سۋ مۇقتاجدىعىن وتەۋدىڭ توتە جولى. ماڭعىستاۋ وبلىسىندا بۇگىندە «كاسپي سۋ تۇشىتۋ زاۋىتى» جۇمىس ونىمدىلىگىنىڭ قۋاتىن تاۋلىگىنە 40 مىڭ تەكشە مەترگە جەتكىزۋ ماقساتىنداعى جۇمىستى قولعا العان. قازىرگى تاڭدا جوبانىڭ تەحنيكالىق-ەكونوميكالىق نەگىزدەمەسى جاسالىپ, مەملەكەتتىك ساراپتامانىڭ قورىتىندىسى الىندى. قۇنى 10 ملرد تەڭگەگە ەسەپتەلگەن جوبانى بيىل «نۇرلى جول» مەملەكەتتىك باعدارلاماسى اياسىندا قارجىلاندىرۋ كوزدەلگەن.
– بۇل جوبانىڭ جۇزەگە اسىرىلۋى مۇنايلى اۋدانىن تولىقتاي تۇپقاراعان اۋدانىنىڭ اقشۇقىر جانە سايىن شاپاعاتوۆ اتىنداعى اۋىلدارىن ساپالى اۋىز سۋمەن قامتاماسىز ەتۋگە مۇمكىندىك بەرەدى. بۇگىندە وبلىس بويىنشا 3 قالالىق ەلدى مەكەن 100 پايىز, 58 اۋىلدىق ەلدى مەكەننىڭ 40 نەمەسە 69 پايىزى ورتالىقتاندىرىلعان اۋىز سۋمەن قامتاماسىز ەتىلگەن, − دەيدى ماڭعىستاۋ وبلىستىق ەنەرگەتيكا جانە تۇرعىن-ءۇي كوممۋنالدىق شارۋاشىلىعى باسقارماسى باسشىسى ج.ساليموۆ.
وڭىردەگى تەڭىز سۋىن اۋىز سۋعا اينالدىرۋمەن اينالىساتىن ەكىنشى نىسان رەتىندە قاراقيا اۋدانىنىڭ قۇرىق اۋىلىندا سۋ تۇشىتاتىن زاۋىت قۇرىلىسى جۇزەگە اسپاق. مەملەكەت-جەكەشەلىك ارىپتەستىگى تەتىگى بويىنشا سالىناتىن زاۋىت تاۋلىگىنە 50 مىڭ تەكشە مەتر سۋ تۇشىتادى دەپ شامالانعان. كونكۋرستىڭ ءبىرىنشى كەزەڭى بويىنشا «Safbon Water Service Holding Inc Shanghai» كومپانياسى جەڭىمپاز بولعان زاۋىت قۇرىلىسى 2020 جىلعا دەيىن جۇرگىزىلۋگە ءتيىس. ماڭعىستاۋ وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ مالىمەتىنشە, قازىرگى تاڭدا الدىن الا قۇنى 37 ملرد تەڭگەگە ەسەپتەلگەن جوبانىڭ تەحنيكالىق-ەكونوميكالىق نەگىزدەمەسى جاسالۋدا. سونداي-اق زاۋىتتا تۇشىتىلعان سۋدى تاراتۋ ءۇشىن «اقتاۋ-قۇرىق-جەتىباي-شەتپە» سۋ تاراتقىشىن سالۋ جوسپارلانعان. قۇنى 29,9 ملرد تەڭگە تۇراتىن بۇل جوبانىڭ تەحنيكالىق-ەكونوميكالىق نەگىزدەمەسى جاسالىپ, مەملەكەتتىك ساراپتامانىڭ قورىتىندىسى الىنعان. بيىل جوبالاۋ جۇمىستارى باستالادى.
بۇل جوبالاردىڭ جۇزەگە اسىرىلۋى قاراقيا اۋدانىنىڭ قۇرىق, مۇنايشى, جەتىباي اۋىلدارىن, ماڭعىستاۋ اۋدانىنىڭ شەتپە اۋىلىن اۋىز سۋمەن قامتاماسىز ەتۋگە سەپتىگىن تيگىزەدى. سونىمەن قاتار اقتاۋ قالاسى, قاراقيا جانە ماڭعىستاۋ اۋداندارىندا ەگىن جانە مال شارۋاشىلىعىن دامىتۋ ءۇشىن دە پايدالانىلادى.
گۇلايىم شىنتەمىرقىزى,
«Egemen Qazaqstan»
ماڭعىستاۋ وبلىسى