قازاقستاننىڭ ۇلىبريتانياداعى ەلشىلىگى قازاقستاننىڭ بىرىككەن ۇلتتار ۇيىمىنىڭ قاۋىپسىزدىك كەڭەسىندەگى جۇمىسىن قورىتىندىلاۋ ماقساتىندا ارنايى بريفينگ وتكىزدى. بۇل تۋرالى ءسىم ءباسپاسوز قىزمەتى حابارلادى.
ءىس-شارا چيورچ-حاۋس اتتى بريتاندىق استانانىڭ تاريحي عيماراتتارىنىڭ بىرىندە ءوتتى. بۇل جەردە 1946 جىلعى 17 قاڭتاردا بۇۇ قاۋىپسىزدىك كەڭەسىنىڭ ەڭ العاشقى وتىرىسى وتكىزىلگەن.
ۇلىبريتانيانىڭ ەۋروپا مەن امەريكا ىستەرى بويىنشا مەملەكەتتىك ءمينيسترى سەر الان دانكان, قر ەلشىسى ەرلان ىدىرىسوۆ جانە 2019 جىلعى 1 قاڭتاردا بۇۇ قاۋىپسىزدىك كەڭەسىندە ازيا-تىنىق مۇحيت توبىنىڭ وكىلى رەتىندە قازاقستاننىڭ ورنىنا كەلگەن يندونەزيانىڭ ەلشىسى ريزال سۋكما بريفينگتە ءسوز سويلەدى. ءىس-شاراعا ۇلىبريتانيا سىرتقى ىستەر مينيسترلىگىنىڭ باسشىلىعى مەن قىزمەتكەرلەرى, بريتاندىق پارلامەنت مۇشەلەرى, بىرقاتار ەلشى, ىسكەرلىك توپتاردىڭ وكىلدەرى, ساراپشىلار جانە جۋرناليستەر قاتىستى.
قوناقتار الدىندا ءسوز سويلەگەن ە.ىدىرىسوۆ قازاقستاننىڭ بۇۇ قاۋىپسىزدىك كەڭەسىندەگى جۇمىسىن قورىتىندىلادى. ەكى جىل ىشىندە قازاقستان وكىلدەرى قاۋىپسىزدىك كەڭەسىنىڭ 1000-نان استام اشىق جانە جابىق وتىرىسىنا, 38 بۇۇ قك بەيرەسمي كەزدەسۋىنە قاتىسىپ, 115 قاۋىپسىزدىك كەڭەسىنىڭ رەزوليۋتسياسىنا جانە 48 توراعانىڭ رەسمي مالىمدەمەسىنە ۇلەس قوستى.
2017 جىلعى 1 قاڭتاردا قر پرەزيدەنتى نۇرسۇلتان نازارباەۆتىڭ بۇۇ قاۋىپسىزدىك كەڭەسىنە ساياسي جولداۋىندا قامتىلعان قازاقستاننىڭ جەتى باستى باسىمدىقتارىنىڭ ءبىرى – يادرولىق قارۋسىز الەمگە قول جەتكىزۋ. وسىعان وراي قازاقستاننىڭ 2018 جىلعى قاڭتارداعى بۇۇ قاۋىپسىزدىك كەڭەسىندەگى توراعالىعىنىڭ باستى شاراسى پرەزيدەنت
ن.نازارباەۆتىڭ توراعالىعىمەن وتكەن «جاپپاي قىرىپ-جويۋ قارۋىن تاراتپاۋ: سەنىم شارالارى» تاقىرىپتى جوعارى دەڭگەيدەگى بريفينگ بولدى. دەباتتاردىڭ ناتيجەسىندە قارۋدى تاراتپاۋ جانجالدى بولدىرماۋدىڭ جان-جاقتى ستراتەگياسىنىڭ ماڭىزدى ەلەمەنتى رەتىندە تانىلىپ, اتالعان تاقىرىپ بۇۇ قاۋىپسىزدىك كەڭەسى توراعاسىنىڭ مالىمدەمەسىنە قوسىلدى.
قازاقستاننىڭ بۇۇ قاۋىپسىزدىك كەڭەسىندەگى مۇشەلىگىنىڭ تاعى ءبىر باسىمدىعى ورتالىق ازيادا بەيبىتشىلىك, قاۋىپسىزدىك, ىنتىماقتاستىق جانە دامۋ ايماعىن قۇرۋ بولدى. وسىعان وراي قازاقستان اۋعانستانعا ءتۇرلى كومەك كورسەتۋگە ەرەكشە نازار اۋداردى. ەلىمىزدىڭ توراعالىعى كەزەڭىندە قاۋىپسىزدىك كەڭەسىنىڭ مۇشەلەرى كوپ جىلدا العاش رەت اۋعانستانعا جەرگىلىكتى جاعدايمەن تانىسۋ ماقساتىندا ساپار شەكتى.
«سوڭعى ەكى جىلدا قازاقستاننىڭ بۇۇ-داعى جەتىستىكتەرى وڭىردەگى باسقا ەلدەردى سىزدەن ۇلگى الىپ, حالىقارالىق ارەناداعى نەگىزگى اكتورلارعا اينالۋعا ىنتالاندىرادى دەپ سەنەمىن», – دەدى مەملەكەتتىك مينيستر ا.دانكان.
قازاقستاننىڭ حالىقارالىق ارەناداعى باسقا جەتىستىكتەرىنىڭ قاتارىندا ول كاسپي تەڭىزىنىڭ مارتەبەسى جونىندەگى كوپتەگەن پىكىرتالاستى توقتاتقان اقتاۋ قالاسىنداعى كاسپي ماڭى مەملەكەتتەرىنىڭ ءسامميتىن, قازاقستاننىڭ اۋعانستاندا بەيبىتشىلىكتى قايتا قۇرۋ جونىندەگى كۇش-جىگەرىن جانە حالىقارالىق بىتىمگەرلىك ميسسيالارعا قاتىسۋىن اتاپ ءوتتى.
يندونەزيانىڭ ۇلىبريتانياداعى ەلشىسى ر.سۋكما ەلىنىڭ بۇۇ قاۋىپسىزدىك كەڭەسىندەگى تۇراقتى ەمەس مۇشەلىگىنىڭ باسىمدىقتارى تۋرالى مالىمدەپ, يندونەزيانىڭ قازاقستان ۇلگىسىن ۇستانىپ, قول جەتكىزگەن ناتيجەلەرىن ودان ءارى كوبەيتۋگە ۇمتىلاتىنىن اتاپ ءوتتى.
بريفينگ اياسىندا قازاقستاننىڭ بۇۇ-داعى, بۇۇ قاۋىپسىزدىك كەڭەسىندەگى جۇمىسى تۋرالى, سونداي-اق ەلىمىزدىڭ شيەلەنىستەردى رەتتەۋگە سالعان كۇش-جىگەرى, بىتىمگەرلىك ميسسيالارعا قاتىسۋى جانە گۋمانيتارلىق كومەك كورسەتۋى تۋرالى فوتوكورمە ۇيىمداستىرىلىپ, تاريحي بەينەماتەريالدار كورسەتىلدى.