ەلباسىنىڭ توراعالىعىمەن ءوتىپ جاتقان ۇكىمەتتىڭ كەڭەيتىلگەن وتىرىسىندا پرەمەر-ءمينيستردىڭ ورىنباسارى ەربولات دوساەۆ «7-20-25» يپوتەكالىق باعدارلاماسى بويىنشا 3600 نەسيە بەرىلگەنىن مالىمدەدى.
«بۇگىنگى تاڭدا «7-20-25» باعدارلاماسى بويىنشا 43,7 ملرد تەڭگە سوماسىنا 3600 نەسيە بەرىلدى. بارلىعى 92 ملرد تەڭگەدەن استام كولەمدە ءوتىنىم كەلىپ ءتۇستى. ەكىنشى باستاما – 2019 جىلعى 1 قاڭتاردان باستاپ 63 مىڭ تەڭگەگە دەيىن جالاقى الاتىن جۇمىسكەرلەرگە سالىق سالماعى 10 ەسە تومەندەدى. بۇل 2 ملن-نان استام ازاماتىمىزدىڭ تابىسىنا وڭ اسەرىن تيگىزەدى. ءۇشىنشى باستاما – وتكەن جىلدىڭ 1 قىركۇيەگىنەن باستاپ ەڭبەك نارىعىندا سۇرانىسقا يە ماماندىقتار بويىنشا ءبىلىم گرانتتارىنىڭ سانى 20 مىڭعا ارتتى. جاڭا جاتاقحانالاردىڭ قۇرىلىسىنا 100 جەر ۋچاسكەسى بەلگىلەندى. مەملەكەتتىك-جەكەمەنشىك ارىپتەستىك اياسىندا ءبىلىم بەرۋ ۇيىمدارىمەن 12 مەملەكەتتىك تاپسىرىس كەلىسىمشارتى بەكىتىلدى. بيىل جاتاقحانالاردا ستۋدەنتتەرگە 5 مىڭ جاڭا ورىن بەرىلەدى», - دەدى دوساەۆ.
سونداي-اق ول 2018 جىلى 595 ملرد تەڭگەگە 14 مىڭ ميكروكرەديت بەرىلگەنىن ايتىپ ءوتتى.
«شاعىن نەسيە بەرۋ ناتيجەسىندە 22 مىڭنان استام ادام جۇمىسپەن قامتىلعان. سوڭعى ەكى جىلدا «باستاۋ بيزنەس» جوباسى بويىنشا 43 مىڭنان استام ادام بيزنەس نەگىزدەرىن وقىدى, ولاردىڭ 11 مىڭى ميكروكرەديت الىپ, ءوز ىستەرىن باستادى», دەدى ە.دوساەۆ.
مارجان تىلەۋبەك,
«ەگەمەن قازاقستان»