قاراعاندى وبلىسىندا مەكتەپ جانىنداعى ينتەرناتتاردىڭ كوپ جىلدان بەرى جوندەۋ كورمەي, جۇدەۋ كۇي كەشىپ كەلگەنى كۇن تارتىبىندە وتكىر تۇرعان ماسەلەلەردىڭ ءبىرى-تۇعىن. دەگەنمەن, وتكەن جىلى قولعا الىنعان جۇمىستاردىڭ ناتيجەسىنە قاراپ, بۇگىندە اتالعان ماسەلەنىڭ تۇپكىلىكتى شەشىم تاپقانىن نىق سەنىممەن ايتۋعا بولادى.
تاياۋدا وساكاروۆ اۋدانىندا جۇمىس ساپارىمەن بولعان وبلىس باسشىسى ەرلان قوشانوۆ وڭىردەگى بارلىق ينتەرناتتىڭ جوندەۋدەن وتكەنىن مالىمدەدى.
– پرەزيدەنتتىڭ تاپسىرماسى بويىنشا وبلىسىمىزداعى ينتەرناتتاردىڭ بارلىعىن قالپىنا كەلتىردىك. ولار كوپتەن بەرى جوندەۋدى قاجەت ەتكەن بولاتىن, سوندىقتان ءبىز ءبىرىنشى كەزەكتە وسى ماسەلەگە كوڭىل اۋداردىق, – دەدى ە.قوشانوۆ.
قاراعاندى وبلىسىندا ورتا مەكتەپتەر جانىندا بارلىعى 21 ينتەرنات جۇمىس ىستەيدى. بۇگىندە ولاردىڭ 12-ءسى كۇردەلى جوندەۋدەن, قالعانى اعىمداعى جوندەۋدەن وتكەن.
وساكاروۆ اۋدانىندا بولعانىندا وبلىس باسشىسى №12 جالپى ءبىلىم بەرۋ مەكتەبىنىڭ جانىنداعى ينتەرناتتىڭ تىنىس-تىرشىلىگىمەن تانىستى. ءبىر جىل بۇرىن اپاتتى جاعدايدا بولعان مەكەمەگە قازىر 114 ملن تەڭگەنىڭ جوندەۋ جۇمىستارى جۇرگىزىلگەن.
– بۇل جەردە مەنىڭ ءۇش بالام تۇرىپ جاتىر. قازىر كوڭىلىمدە الاڭ جوق, سەبەبى مۇندا ۇيدەگىدەي جاعداي جاسالعان. عيمارات جايلى جانە جىلى. وسكەلەڭ ۇرپاققا ۇلكەن كوڭىل ءبولىپ جاتقانى ءۇشىن پرەزيدەنتىمىزگە العىسىمدى بىلدىرەمىن, – دەيدى ينتەرنات وقۋشىسىنىڭ اناسى وكسانا كوۆالەۆا اعىنان جارىلىپ.
ساپار بارىسىندا ءوڭىر باسشىسى اۋدان ورتالىعىنداعى بالالاردىڭ بوس ۋاقىتتارىن قالاي وتكىزەتىندىگىن دە نازاردان تىس قالدىرمادى. وساكاروۆ اۋداندىق ءبىلىم ءبولىمىنىڭ باسشىسى ايناگۇل اقمانبەتوۆانىڭ ايتۋىنشا, وقۋشىلار بوس ۋاقىتىنىڭ كوبىن وسىنداعى قوسىمشا ءبىلىم بەرۋ ورتالىعىندا وتكىزەدى ەكەن. مۇندا ولار مۋزىكالىق ۇيىرمە, قۋىرشاق تەاترى جانە باسقا دا كوپتەگەن سەكتسياعا قاتىسادى. الداعى ۋاقىتتا مەكەمەنى جاڭعىرتىپ, ۇيىرمەلەردىڭ سانىن كوبەيتۋ دە جوسپاردا بار.
قايرات ءابىلدا,
«Egemen Qazaqstan»
قاراعاندى وبلىسى