اقتاۋدا العاش رەت «اقتاۋ ۆولەيبول كلۋبى» قوعامدىق بىرلەستىگىنىڭ باستاماسىمەن ەرلەر كوماندالارى اراسىندا ۆولەيبولدان اشىق بىرىنشىلىك وتۋدە. وتكەن جىلدىڭ قازان ايىنان باستالعان جارىس وسى جىلدىڭ ءساۋىر-مامىر ايلارىندا اياقتالادى. جارىس ەكى جاس كاتەگورياسى - 40 جاسقا دەيىن جانە 40 جاس جانە ودان جوعارى ارداگەرلەر كومانداسى اراسىندا وتەدى. ءبىرىنشى اينالىمدا 10 كوماندا ونەر كورسەتتى, ال ەكىنشى سانات بويىنشا 5 كوماندا ءوتىنىم بەرگەن. ءبىرىنشى اينالىم قورىتىندىسى بويىنشا «ۆك اقتاۋ» كومانداسى شاعىن كۋبوك يەگەرى اتاندى. بىرىنشىلىكتىڭ جەڭىمپازى ەكى اينالىم قورىتىندىسى بويىنشا انىقتالادى.
وسى جوبا اياسىندا كەلەسى ويىن ماڭعىستاۋ وبلىسىنىڭ دەنە شىنىقتىرۋ جانە سپورت باسقارماسىنىڭ قولداۋىمەن «وربيتا» سپورت كەشەنىندە كەڭەس اسكەرلەرىنىڭ اۋعانستاننان شىعارىلعانىنا 30 جىل تولۋىنا وراي ارداگەرلەر كوماندالارى اراسىندا وتەدى. «ۆك اقتاۋ» قب تۋرنير اياسىندا اۋعان سوعىسى ارداگەرلەرى ۆولەيبولشىلارمەن بىرگە ەسكە الۋ شاراسىن وتكىزۋدى جوسپارلاپ وتىر.
سونداي-اق, 8-10 اقپان كۇندەرى اتىراۋ قالاسىندا د. قوناەۆتى ەسكە الۋعا ارنالعان ۆولەيبولدان جىل سايىنعى حالىقارالىق تۋرنير وتپەك.
گۇلايىم شىنتەمىرقىزى,
«Egemen Qazagstan»
ماڭعىستاۋ وبلىسى