كوكشەتاۋ قالاسىنداعى نازارباەۆ زياتكەرلىك مەكتەبىندە ءبىلىم الاتىن وقۋشىلار اراسىندا قازاق ءتىلى مەن ادەبيەتى ءپانىنىڭ اپتالىعى وتۋدە. ايتۋلى شارا اياسىندا وقۋشىلار حالىقارالىق اقىن-جىرشىلار جانە تەرمەشىلەر وداعىنىڭ مۇشەسى, حالىقارالىق «شابىت» فەستيۆالىنىڭ ديپلومانتى قۋانىش وسپانوۆپەن كەزدەستى. باسقوسۋ بارىسىندا اقىن ءوز شىعارماشىلىعىمەن ءبولىسىپ, وقۋشىلاردىڭ سۇراقتارىنا جاۋاپ بەردى. اۆتورلىق ولەڭدەرى مەن اندەرىن ورىندادى.
قۋانىش وسپانوۆ – كوكشەلىك جاس اقىنداردىڭ كوشىن باستاپ كەلە جاتقان قالامگەر. ول «اۋىلدىڭ بالاسىمىن», «اسپانداعى استرا» جىر جيناقتارىنىڭ اۆتورى. اقىن مۇنداي كەزدەسۋلەر جاستاردىڭ بويىنا رۋحاني قۇندىلىقتاردى سىڭىرۋگە, ادەبيەتكە, ولەڭگە قۇمار وقۋشىلاردىڭ تالانتىن ۇشتاۋعا سەپتىگىن تيگىزەدى دەيدى.
– جاستار مەن وقۋشىلار اراسىندا وسىنداي كەزدەسۋلەردى كوبىرەك ۇيىمداستىرعان دۇرىس. مەكتەپ باسشىلىعى مەن ۇستازدارى تاراپىنان وقۋشىلارمەن كەزدەسىپ كەتسەڭىز قايتەدى دەگەن ۇسىنىس تۇسكەن كەزدە قۋانىپ كەتتىم. ءبىز قازىرگى كەزدە وقۋشىلاردى كىنالاپ جاتامىز. كىتاپ وقىمايدى. گادجەتتە, ينتەرنەتتە وتىرادى دەگەن سياقتى. سوندىقتان, مەنىڭشە وسى رۋحاني ورتادا جۇرگەن ادامدارمەن كەزدەسۋ وتكىزىپ تۇرۋ جاقسى ءۇردىس دەپ ويلايمىن,–دەيدى اقىن قۋانىش وسپان.
جاستار جىلىنداعى جاقسى شارۋاعا ولاردىڭ وزدەرى دە ءدان رازى. اسىرەسە, جىر وتىنان جىلىنعاندارى انىق بايقالىپ تۇر.
– مەن بۇگىنگى كەزدەسۋدەن جاقسى اسەر الدىم. قۋانىش اعامىزدىڭ شىعارماشىلىعىمەن تانىستىق, ەل بىلمەيتىن قىرلارىن تانىدىق. اسىرەسە, «جانايقاي» دەگەن ولەڭىن تىڭداعاندا قوعامدا بولىپ جاتقان كوپتەگەن ماسەلەلەر قوزعالعان. اقىن اعاي بىزگە ساباق بولاتىن ناسيحاتتارىن ايتىپ, ومىرلىك تاجىريبەسىمەن ءبولىستى,– كوكشەتاۋ قالاسىنداعى نازارباەۆ زياتكەرلىك مەكتەبىنىڭ وقۋشىسى تولەبي تولەشەۆ.
ەلباسى نۇرسۇلتان نازارباەۆ جاستار تاربيەسىنە اسا ءمان بەرىپ, بيىلعى جىلدى جاستار جىلى دەپ بەلگىلەپ وتىر. جاستاردى مەكتەپ تابالدىرىعىنان باستاپ تاربيەلەۋ اسا قاجەت.
بايقال ءبايادىل,
«Egemen Qazaqstan»
كوكشەتاۋ قالاسى