بۇل كۇندەرى قۇرلىقتىق حوككەي ليگاسىندا (قحل) «بارىستىڭ» ساپىندا ونەر كورسەتىپ جۇرگەن 25 جاستاعى كانادالىق لەگيونەر داررەن ديتس ماسكەۋدىڭ تسسكا كلۋبىنىڭ شابۋىلشىسى كيريلل كاپريزوۆپەن بىرگە جەڭىس گولدارىن سوققان ويىنشىلاردىڭ كوشىن باستاپ تۇر.
ايتۋلى ويىنشىلاردىڭ ارقايسىسى سەگىز رەتتەن ماڭىزدى شايبالاردى قاقپاعا ەنگىزگەن ەكەن. تۇراقتى بىرىنشىلىك اياقتالعانعا دەيىن «بارىس» ءالى 10 كەزدەسۋ وتكىزەدى. اتاپ ايتساق, جەرلەستەرىمىز ءنوۆوسىبىردىڭ ء"سيبيرى» (29 قاڭتار, قوناقتا), سانكت-پەتەربۋرگتىڭ سكا-سى (31 قاڭتار, ۇيدە), فينليانديانىڭ «يوكەريتى» (2 اقپان, ۇيدە), ۋفانىڭ «سالاۆات يۋلاەۆى» (4 اقپان, قوناقتا), ءنوۆوسىبىردىڭ ء"سيبيرى» (12 اقپان, ۇيدە), قىتايدىڭ «كۋنلۋنى» (14 اقپان, ۇيدە), ومبىنىڭ «اۆانگاردى» (16 اقپان, ۇيدە), ۆلاديۆوستوكتىڭ «ادميرالى» (18 اقپان, قوناقتا), حاباروۆسكىنىڭ «امۋرى» (20 اقپان, قوناقتا) جانە قىتايدىڭ «كۋنلۋن» (22 اقپان, قوناقتا) كلۋبتارىنا قارسى وينايدى. ال ماسكەۋلىكتەردىڭ بىزدەن ءبىر ويىنى ارتىق. ەگەر وسى ويىنداردا داررەن ديتس شابىسىنان جاڭىلماسا, وندا وسى اتالىم بويىنشا ول جەڭىمپاز اتانادى. وسى ورايدا, ولاردى نايدجەل دوۋس («اۆتوموبيليست») پەن الەكساندر سەمين («ۆيتياز») وكشەلەپ كەلە جاتقانىن ايتا كەتۋگە ءتيىسپىز. ولار جەتى رەتتەن جەڭىس شايباسىن سوقتى.
سونىمەن قاتار, داررەن ديتس قحل-داعى ەڭ كوپ سوققى جاساعان ويىنشىلاردىڭ كوشىن باستاپ تۇر. استانالىق حوككەيشى قارسىلاستار قاقپاسىنا 210 سوققى باعىتتاعان ەكەن. ودان كەيىنگى ورىنداردا مىنا ويىنشىلار: يۋسو پۋستينەن («نەفتەحيميك») – 192 سوققى, اندرەي كۋتەيكين («سپارتاك») – 190 سوققى, الەكس گرانت («يوكەريت») – 187 سوققى جانە يليا ميحەەۆ («اۆانگارد») – 177 سوققى.
عالىم سۇلەيمەن,
«Egemen Qazaqstan»