تۇركىستاننىڭ ەڭ كونە بولىگى - كۇلتوبە قالاشىعىنىڭ سولتۇستىك بولىگىنەن قوقان جانە قازاق ۇيلەرىنىڭ ورنى, تاندىر جانە ۇستىندار شوعىرى تابىلدى.
بۇل اۋماقتا ارحەولوگيالىق قازبا جۇمىستارىنىڭ باستالعانىنا جارتى ايعا جۋىق ۋاقىت ءوتتى. دەگەنمەن از ۋاقىتتا كونە عاسىرلار سىرىن اشاتىن قۇندى دۇنيەلەر انىقتالا باستادى. مادەنيەت جانە سپورت مينيسترلىگىنىڭ تۇركىستان قالاسىنداعى ورتاعاسىر تاريحي-مادەني مۇرا وبەكتىلەرىنىڭ تاريحي كەلبەتىن انىقتاۋ جانە قالپىنا كەلتىرۋ مەن ولاردى تانىمال تۋريستىك ورتالىققا اينالدىرۋعا ارنالعان جوباسىن مينيسترلىككە قاراستى قازاق عىلىمي - زەرتتەۋ مادەنيەت ينستيتۋتى ىسكە اسىرۋدا. قوجا احمەت ياساۋي ءومىر سۇرگەن كەزەڭنىڭ رۋحىن اسقاقتاتۋ ماقساتىندا قولعا الىنعان كۇلتوبە ارحەولوگياسى جانە قوسىمشا نىساندار جۇمىسى 3 جىلعا جوسپارلانعان. قازىرگى تاڭدا 80-گە جۋىق ارحەولوگ ەڭبەك ەتىپ جاتقان الاڭدا قازبا جۇمىستارى قارقىندى جۇرۋدە. الداعى ۋاقىتتا جۇمىسشىلار سانىن 300-گە جەتكىزۋ جوسپارلانۋدا. ارحەولوگيالىق توپتىڭ جەتەكشىسى سەرىك اقىلبەكتىڭ ايتۋىنشا, زەرتتەۋ جانە زەردەلەۋگە ارنالعان اۋقىمدى جوبا كۇلتوبەنىڭ ءوزى مەن اينالاسىن قامتيدى. بۇگىنگى تاڭداعى ەڭ باستى جۇمىس ەسكەرتكىشتەر اۋماعىن ءۇيىندى توپىراقتان تازارتۋعا ارنالعان. «سەبەبى, 1975 جىلدارداعى اەروفوتوسۋرەتتەرمەن سالىستىرعاندا وزگەرىستەر كوپ. ماسەلەن, ساي بوپ كورىنگەن ايماق قازىرگى تاڭدا دوڭەسكە اينالعان. تاريحي اۋماقتىڭ مادەني قاباتتارىن انىقتاۋ ماقساتىندا بارلاۋ قازبالارى دا جۇمىس ىستەۋدە. بارلاۋ ناتيجەسىندە تۇسىرىلىمدە كورسەتىلگەن ساي تۇرىندەگى قىرتىستا تاريحي قاباتتىڭ بار-جوعى ناقتىلانادى",- دەيدى س.اقىلبەك.
ارحەولوگتاردىڭ ايتۋىنشا, XIX عاسىرعا ءتان قوقان ءۇيىنىڭ قالدىقتارى انىقتالسا, ودان 70 سانتيمەتردەي تومەن تۇستا XVI-XVII عاسىرعا ءتان قازاق ءۇيى, ك ۇلى ساقتالعان تاندىر, ءدالىز جانە ەسىك ورنى بار. سونىمەن قاتار, ءۇي تىرەۋگە ارنالعان تاس ۇستىندار شوعىرىنىڭ دا بەتى اشىلىپ كەلەدى. ءتۇرلى عاسىرعا ءتان قۇمىرا سىنىقتارى دا كوپتەپ شىعا باستاعان.
عالىمجان ەلشىباي,
«Eqemen Qazaqstan»
تۇركىستان وبلىسى