1 اقپاننان باستاپ كەزەك جۇيەسى مەن بالاباقشالارعا جولداما بەرۋ قالا تۇرعىندارىنىڭ پىكىرىن ەسكەرە وتىرىپ وڭتايلاندىرىلادى. جاڭارتىلعان جۇيەدە كەزەكتى قالىپتاستىرۋدىڭ اشىقتىعىن قامتاماسىز ەتۋ ءۇشىن بلوكچەين تەحنولوگياسى قولدانىلادى. بۇل تۋرالى اپپارات كەڭەسىندە استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى الىشەر ابدىقادىروۆ مالىمدەدى, دەپ حابارلايدى ەلوردا ينفو.
وتكەن جىلى بالاباقشاعا كەزەككە قويۋ جانە جولداما بەرۋ, 1-سىنىپقا قابىلداۋ, كوللەدجدەرگە قابىلداۋ اۆتوماتتاندىرىلدى. وسىلايشا, مەملەكەتتىك قىزمەت كورسەتۋ ۋاقىتى 3-5 كۇننەن 5-10 مينۋتقا دەيىن قىسقاردى.
سونىمەن قاتار, بۇل جۇيە تۇراقتى جۇمىس ىستەمەگەندىكتەن, وندا دەرەكتەر دۇرىس ساقتالماعان جانە قالا تۇرعىندارىنان كوپتەگەن شاعىمدار ءتۇستى.
«وسىعان بايلانىستى, 1 اقپاننان باستاپ جۇيە قالا تۇرعىندارىنىڭ پىكىرى مەن قولدانىستاعى زاڭنامانى ەسكەرە وتىرىپ, وڭتايلاندىرىلاتىن بولادى. جاڭارتىلعان جۇيەدە كەزەكتى قالىپتاستىرۋدىڭ اشىقتىعىن قامتاماسىز ەتۋ ءۇشىن بلوكچەين تەحنولوگياسى قولدانىلادى», - دەدى الىشەر ابدىقادىروۆ.
جاڭا جۇيەدە باسىم بولىگىندە بالاباقشالاردى تاڭداۋ قاراستىرىلعان, بۇل رەتتە اتا-انالار ءوز تاڭداۋىن, ونىڭ ىشىندە جەكە مەنشىك بالالار ۇيىمدارىنىڭ پايداسىنا ەنگىزۋ مۇمكىندىگىن كورىپ, تۇزەتە الادى.
جۇمىس ءپرينتسيپى بەلگىلى booking.com, uber نەمەسە airbnb سەكىلدى پلاتفورمالاردىڭ ۇلگىسى بويىنشا نەگىزدەلگەن, بۇل اتا-انالارعا مەكتەپكە دەيىنگى ۇيىمداردا كورسەتىلەتىن قوسىمشا قىزمەتتەردىڭ رەيتينگى مەن كەڭەيتىلگەن ءتىزىمىن ەسكەرە وتىرىپ, بالاباقشالاردى تاڭداۋىنا مۇمكىندىك بەرەدى.
«ينتەرفەيس جانە فۋنكتسيالار بارىنشا جەڭىلدەتىلدى. كەلەسى ايلاردا مەكتەپتەر مەن كوللەدجدەردىڭ فۋنكتسيونالىن قوسامىز. سونىمەن قاتار, رەيتينگ, قوسىمشا قىزمەتتەر جانە باسقا سەرۆيستەر نەگىزىندە ۇيىمدى تاڭداۋعا بولادى», - دەدى ول.