بيىلعى جىل جاستار جەتىستىگىنە ارنالادى
ەلباسى جاستارمەن كەزدەسۋدە ەلدىڭ بولاشاعىن ايقىندايتىن تولىمدى ويلارىن تاعى دا ورتاعا سالدى. مەملەكەت مىقتى بولۋ ءۇشىن جاستار ءبىلىمدى بولىپ, ەلدىڭ ەكونوميكاسىن كوتەرۋ ءۇشىن كاسىپكەرلىكپەن مىقتاپ اينالىسۋى كەرەك.
مەملەكەت باسشىسى سول ءۇشىن يننوۆاتسيالىق جوبالارعا بەرىلەتىن گرانتتاردىڭ ەسەلەنەتىندىگىن ايتتى. ءبىز, قىزىلوردا وبلىسىنىڭ جاستارى, ەلباسىنىڭ تاپسىرمالارىن ويداعىداي ورىنداۋ ءۇشىن بىلتىر بىرقاتار جۇمىستاردى اتقاردىق. اتاپ ايتساق, «English for jastar» جوباسى اياسىندا 350-گە جۋىق وقۋشى اعىلشىن ءتىلىن ۇيرەنسە, ء«بىلىم ورتالىعى» جوباسى بويىنشا بارلىق اۋدانداعى كىتاپحانالار جاڭعىرتىلدى.
ء«ساتتى قادام» جوباسى ارقىلى 8-11-سىنىپ وقۋشىلارىن كاسىپورىن, تسەح, زاۋىت جۇمىسىمەن تانىستىرىپ, سالا ماماندارىمەن سۇحبات ۇيىمداستىردىق. ماماندىق تاڭداۋدا كوزبەن كورىپ, كوڭىلگە تۇيگەننىڭ پايدالى بولاتىنى بەلگىلى عوي. ال جاستار جىلىنا وراي رەسپۋبليكا بويىنشا «جاستار جىلىنداعى جەتىستىك» اتتى اۋقىمدى اكتسيانى باستاماقشىمىز. شارادا ءاربىر جاس بيىل باعىندىرعان بەلەستەرىن, جەڭىستەرىن الەۋمەتتىك جەلىگە «#JJJ2019» بەلگىسىمەن جاريالاپ وتىرۋى قاجەت.
جىل سوڭىندا اكتسيا قورىتىندىلانىپ, جەڭىمپاز جاستار تۋرالى ارنايى جيناق شىعارىلادى. سونداي-اق «نۇر وتان» پارتياسىمەن بىرلەسىپ, جاستار اراسىنداعى كاسىپكەرلىكتى دامىتۋ ماقساتىندا جۇمىس توبىن قۇرۋدى جوسپارلاپ وتىرمىز. مۇنان وزگە جاستار ماسەلەسىن تالقىلاۋ ءۇشىن فورۋم, ۆاينەرلەر بايقاۋىن, جاس تاريحشىلار كونفەرەنتسياسىن وتكىزبەكشىمىز. ال داستۇرلەرىمىزدى قايتا جاڭعىرتۋ ماقساتىندا « ۇلى دالا ەلى» اتتى جاستار فەستيۆالىن ۇيىمداستىرۋدى قولعا الىپ جاتىرمىز.
تالعات تىلەس,
«جاس وتان» جاستار قاناتى وبلىستىق فيليالىنىڭ توراعاسى
قىزىلوردا
كوپبالالى جاس وتباسىلارعا قولداۋ بولسا...
جاستار جىلىنىڭ جاريالانۋى وسكەلەڭ بۋىننىڭ, ەلىمىزدىڭ دامىپ وركەندەۋىنە زور ۇلەس قوسۋىنا مۇمكىندىك بەرەرى ءسوزسىز. اسىرەسە بۇل جىلدىڭ كوپبالالى جاس وتباسىلارعا دا ءتيىمدى تۇستارى كوپ بولاتىنىنا سەنەمىن. مەن 27 جاستامىن, 6 بالانىڭ اناسىمىن. مەكتەپتە ماتەماتيكا ءپانىنىڭ مۇعالىمىمىن.
بۇگىندە ءبىز سياقتى جاس مامانعا, جاس وتباسىنا باسپانانىڭ جوقتىعى, تابىستىڭ ازدىعى, نارىقتا باعانىڭ كۇن سايىن ءوسۋى قولبايلاۋ ەكەنى جاسىرىن ەمەس. سوندىقتان جاستارعا الەۋمەتتىك كومەكتىڭ كوبىرەك بولعانى دۇرىس دەپ ويلايمىن. اسىرەسە كوپبالالى انالاردىڭ باسپانالى بولۋىنا مەملەكەتتىك باعدارلامالار مەن بانكتەردە جەڭىلدىكتەر قاراستىرىلسا دەيمىز. مەنىڭشە, ءار بالا دۇنيەگە كەلگەن سايىن نەسيەنىڭ پايىزدىق مولشەرى تومەندەپ وتىرسا ۇلكەن قولداۋ بولار ەدى. سونداي-اق بالا كوبەيگەن سايىن ءۇيدى كەڭەيتۋگە ءتيىمدى جاعداي قاراستىرىلسا, جاستاردىڭ ۋاقتىلى دەموگرافياعا ەلەۋلى ۇلەس قوسۋىنا جول اشىلار ەدى. ويتكەنى بالالار وسكەن سايىن قاجەتتىلىك ارتادى. وسىندايدا بار كۇشىڭدى كاسىبي جەتىلۋگە ەمەس, تۇرمىستىق قاجەتتىلىكتى ورىنداۋعا جۇمساۋعا ءماجبۇر بولاسىز. تۇرمىستىق قيىندىقتار كەزدەسە بەرسە جاستار كوكەيدەگى كوپ ويلارىن ورىنداي الماۋى مۇمكىن.
بۇعان قوسا كاسىپپەن اينالىسقىسى كەلەتىن كوپبالالى جاس انالارعا پروتسەنتسىز نەسيە بەرىلىپ, سالىقتان بوساتىلسا جاس انالاردىڭ تىڭ يدەيالارىن جۇزەگە اسىرۋىنا كوپ كومەك بولار ەدى. جاستار جىلىندا وسى سياقتى ۇسىنىستار ەسكەرىلەدى دەپ سەنەمىز.
ارداق زايىتحان,
كوپبالالى انا
قاراعاندى وبلىسى
كەشەندى سيپاتقا يە باستاما
ەڭ الدىمەن, مەملەكەت جاستاردىڭ جۇمىسقا ورنالاسۋ ماسەلەسىنە قاتىستى شارالاردى رەتتەۋگە تىرىساتىنى انىق بولدى. ەلدە بىرنەشە باعدارلاما بار, مىسالى, «جاسىل ەل», «ديپلوممەن – اۋىلعا!», «جاستار پراكتيكاسى». سونىمەن بىرگە جاستارعا جۇمىس تابۋعا كومەكتەسەتىن جاستار رەسۋرستىق ورتالىقتارى جۇمىس ىستەۋدە. بىراق بۇعان قاراماستان, ءبىزدىڭ زەرتتەۋلەرگە سايكەس جۇمىسقا تۇرۋ جاستار ءۇشىن ءنومىر ءبىرىنشى ماسەلە بولىپ تۇر. وسىعان وراي بيىل ىسكە قوسىلاتىن «جاس كاسىپكەر» باعدارلاماسى جاستاردىڭ بۇل سۇرانىسىنا كەشەندى جاۋاپ بەرەدى. كاسىپكەرلىكپەن اينالىساتىن جاستاردىڭ سانى ارتسا, جۇمىس ورىندارى دا كوبەيەتىنى انىق.
ەكىنشىدەن, مەملەكەت بىلىمگە قول جەتىمدىلىكتى ارتتىرۋ كوزدەلۋدە. بۇل, اسىرەسە تۇرمىستىق مۇمكىندىكتەرى تومەن اۋىل جانە شاعىن قالا جاستارى ءۇشىن ماڭىزدى. ارنايى ورتا ءبىلىم بەرۋ جۇيەسىنىڭ دامۋى بۇل كاتەگورياداعى جاستاردىڭ بەيىمدەلۋىن ارتتىرۋعا مۇمكىندىك بەرەدى. مەملەكەت تاراپىنان ارنايى ورتا ءبىلىم بەرۋ مەكەمەلەرىندە ءبىرىنشى جۇمىسشى ماماندىقتى تەگىن بەرۋگە كەپىلدىك بار ەكەنى بەلگىلى. ءبىلىم بەرۋ گرانتتارى سانىنىڭ ارتۋى جوعارى ءبىلىم الۋدى قولجەتىمدى ەتەدى.
ۇشىنشىدەن, جاستار ساياساتى جاستاردىڭ الەۋمەتتىك بەلسەندىلىگىن ارتۋى ءۇردىسىن قولداۋعا تىرىسادى. قازىر ءىرى قالالاردا قوعامدىق كەڭىستىكتەردى وڭتايلاندىرۋ, تۇرمىسى ناشارلارعا كومەك كورسەتۋ, ەكولوگيالىق ساۋاتتى ارتتىرۋ جانە تاعى باسقا باعىتتار بويىنشا ءتۇرلى باستامالار كوتەرىلىپ جاتىر. جاس ۇرپاققا مۇنداي جوبالار ۇنايدى. ەرىكتىلەردى ماتەريالدىق قولداۋ ارقىلى مەملەكەت جاستاردىڭ بۇل بەلسەندىلىگىن ءپوزيتيۆتى باعىتقا بۇرادى, سونىمەن قاتار جاستار ۇيىمىنىڭ جۇمىسىنا جاڭا باعىت بەرەدى.
وسىلايشا قازاقستانداعى جاستار جىلىندا جاستاردىڭ ماسەلەسى ەڭ جوعارى دەڭگەيدە كوتەرىلەتىنى قۋانتادى. اتالعان باستامالار جاستارعا ارنالعانمەن كەشەندى سيپاتقا يە, سوندىقتان جالپى ەلدەگى ادامي كاپيتالدى ارتتىرۋعا مۇمكىندىك بەرەدى. ال بۇل – ەلدەگى الەۋمەتتىك ساياساتتىڭ باستى باعىتى.
سەرىك بەيسەمباەۆ,
الەمدىك ەكونوميكا جانە ساياسات ينستيتۋتىنىڭ ساراپشىسى