بۇگىنگى تاڭدا جامبىل وبلىسىنىڭ پوليتسيا دەپارتامەنتى ءوز قىزمەتكەرلەرىنىڭ كۇندەلىكتى قىزمەتىنە ساندىق تەحنولوگيالاردى ەنگىزۋ بويىنشا بەلسەندى جۇمىس جۇرگىزىپ كەلەدى. ماسەلەن, وتكەن جىلدىڭ سوڭىن الا قورداي اۋدانىندا قۇقىق قورعاۋ ورگاندارى جۇرگىزگەن جەدەل ىزدەستىرۋ ءىس-شارالارىنىڭ ناتيجەلىلىگىن ارتتىرۋعا باعىتتالعان «اۆتوۋراگان» ءتورت اپپاراتتىق-باعدارلامالىق كەشەنى جۇمىس ىستەي باستاعان بولاتىن.
بۇل ءوز كەزەگىندە قىلمىستىڭ ءىزىن سۋىتپاي اشۋعا كومەكتەسىپ قانا قويماي, ازاماتتاردىڭ دا قاۋىپسىزدىگىن قامتاماسىز ەتە الادى.
بۇل جۇمىس بيىلعى جىلى دا جالعاسىن تابۋدا. قازىرگى زامانعى تەحنولوگيالار قوعامداعى زاڭدىلىق پەن قۇقىقتىق ءتارتىپتى قامتاماسىز ەتۋگە باعىتتالعان. سوندىقتان دا جاڭا اپپاراتتىق-باعدارلامالىق كەشەندەردى ورنالاستىرۋ ءوڭىر پوليتسەيلەرىنىڭ دە جۇمىسىنا سەرپىن بەرەتىنى انىق. سونىمەن قاتار قورداي اۋدانىنىڭ قىرعىز رەسپۋبليكاسىمەن شەكارالاس ورنالاسۋى دا اتالعان اۋدانعا باسا نازار اۋدارۋدى تالاپ ەتەدى. قوردايلىق پوليتسەيلەرگە زاماناۋي اپپاراتتىق كەشەندى ساتىپ الۋعا قارجى ءبولۋ ماسەلەسى جامبىل وبلىسىنىڭ اكىمى اسقار مىرزاحمەتوۆتىڭ باستاماسىمەن كوتەرىلگەن بولاتىن. ناتيجەسىندە زاماناۋي قۇرىلعىلار بۇكىل قورداي اۋدانىن تۇتاس قامتىدى. ەندى كورشى قىرعىز رەسپۋبليكاسى, الماتى وبلىسى جانە باسقا دا ايماقتاردان كەلگەن بارلىق كولىك اعىنى اتالعان كەشەندەردىڭ قىراعى باقىلاۋىندا بولادى جانە ولارعا قاتىستى تۇراقتى مونيتورينگ جۇرگىزىلۋدە.
جالپى العاندا, بۇگىندە تارازدىڭ كوشە جول جەلىلەرىندە جول قوزعالىسى ەرەجەلەرىن بۇزۋدى تىركەيتىن جانە ۇرلانعان كولىكتەردى ىزدەستىرەتىن 40 كەشەن جۇمىس ىستەۋدە. ال «اۆتوۋراگان» كەشەنى ايماقتىڭ 34 بەكەتىنە ورناتىلعان. مىسالى, وبلىستىق پوليتسيا دەپارتامەنتىنىڭ مالىمەتىنشە, وتكەن جىلى عانا «اۆتوۋراگان» جانە بەينەباقىلاۋ قۇرالدارىنىڭ كومەگىمەن ەكى كىسى ءولتىرۋ, ەكى قاراقشىلىق, 32 كىسى توناۋ, 45 بۇزاقىلىق, 69 ۇرلىق جانە 200 كولىك ايداپ اكەتۋ, سونداي-اق 24000-عا جۋىق اكىمشىلىك قۇقىق بۇزۋشىلىق انىقتالعان ەكەن. ال جول قوزعالىسى ەرەجەلەرىن بۇزۋعا قاتىستى ايىپپۇل مەملەكەت قازىناسىن 40 ميلليون تەڭگەگە تولىقتىرعان.
ەندىگى جەردە ءتيىستى كەشەندەر قىلمىستىڭ ءىزىن سۋىتپاي اشۋعا, ءسات سايىن جامبىل وبلىسىنا كەلەتىن جانە ايماقتان شىعاتىن بارلىق كولىكتى باقىلاۋعا مۇمكىندىك بەرەدى. ال ەلىمىزدە جەدەل قولعا الىنعان تسيفرلاندىرۋ ءۇردىسى جامبىل پوليتسەيلەرىنىڭ دە قىزمەتىنە جىلدام قارقىنمەن ەنگىزىلگەنىن ايتا كەتكەن ءجون. بۇدان كەيىنگى ۋاقىتتاردا دا وبلىستىق پوليتسيا دەپارتامەنتى وبلىس اكىمدىگىنىڭ قولداۋىمەن وبلىستىڭ نەگىزگى كولىك جولدارى مەن باسقا دا اۋدانداردا وسىنداي «اۆتوۋراگان» كەشەنىن ورناتۋدى جوسپارلاپ وتىر.
حاميت ەسامان,
«Egemen Qazaqstan»
جامبىل وبلىسى