ەلباسى جاستارمەن وتكەن كەزدەسۋدە «اتامەكەن» كاسىپكەرلىك پالاتاسىنىڭ «باستاۋ» جوباسىنىڭ 43 مىڭعا جۋىق ازاماتتى كاسىپكەرلىككە وقىتقانىن ايتقان ەدى. ال قىزىلوردا وبلىسىندا 1600-دەن استام ادام وسى مەكتەپتەن ءوتتى.
ولاردىڭ 319-ى مەملەكەت تاراپىنان جەڭىل نەسيە السا, 75-ءى يننوۆاتسيالىق ماقساتقا بەرىلەتىن گرانتتىڭ يەسى اتانعان. شاعىن جانە ورتا كاسىپكە نەگىزدەلگەن بيزنەس مىڭداعان جۇمىسسىزدىڭ قولىنا بالىق ەمەس, قارماق ۇستاتتى.
– باعدارلامانىڭ نەگىزگى ماقساتى – اۋىلداعى جۇمىسسىز جانە ءوزىن-ءوزى جۇمىسپەن قامتىعان ازاماتتارعا وسى «باستاۋ» جوباسى اياسىنداعى كاسىپكەرلىك نەگىزدەرىن وقىتۋ, ءارى قاراي سۇيەمەلدەۋ جۇمىستارىن جۇرگىزۋ. كاسىپكەرلىك نەگىزدەرىن وقىتىپ بولعاننان كەيىن قاجەتتىلىكتەرىنە ساي ءبىر اي ىشىندە بيزنەس جوسپار دايىنداۋ جانە بانكتەرمەن قالاي جۇمىس ىستەۋ كەرەك, بارلىعىن تولىق ۇيرەنىپ شىعاتىن بولادى, – دەيدى وبلىستىق كاسىپكەرلەر پالاتاسىنىڭ ءبولىم باسشىسى فارحات ءابجاپپاروۆ.
باقتيار تايجان,
«Egemen Qazaqstan»
قىزىلوردا وبلىسى