ازاماتتىق قورعاۋ وفيتسەرى ورت كاسكالارىنىڭ كوللەكتسياسىن جيناۋدى قىزمەتتىك كاسىبىنەن بولە-جارا قاراعان ەمەس.
كوللەكتسيالاۋ – قىزىقتى حوببيلەردىڭ ءبىرى.ء ار نارسەنىڭ ءوز تاريحى بار, ول تۋرالى كوللەكتسيونەر تاڭ اتقانشا ايتۋعا بەيىل. مۇراجايلار مەن كورمەلەردى ءجيى تاماشالايتىندار ستەللاجداردا قويىلعان زاتتار مەن ونەر تۋىندىلارىنىڭ يەلەرىن ەرەكشە قۇرمەتتەيتىنى سوندىقتان. كەيبىرەۋلەر كوللەكتسيالاۋ ءىسىن كاسىبي قىزمەتپەن بايلانىستىرادى. سولاردىڭ ءبىرى – پەتروپاۆلدىق بولاتجان اسقاربەكوۆ. ونىڭ وسى حوببيگە دەگەن قىزىعۋشىلىعى كەيىن باستالسا دا, ماماندىعىمەن بايلانىستىرۋى كەزدەيسوق ەمەس. كوللەكتسيا زاتتارى ءومىر بويى ۇقىپتى ساقتالىپ, ۇرپاقتان-ۇرپاققا بەرىلەتىن قۇندى جادىگەرلەر ەكەنىن بىلگەندىكتەن, كوپكە دەيىن جۇرەگى داۋالاي قويماعان سەكىلدى. باستاپقىدا اۋەسقويلىق سەزىم جەڭسە, كەيىن تىرنەكتەپ جيناۋعا كوشكەن. جۇرگەن-تۇرعان جەرلەرىندە ياكي ىسساپارلارعا شىعا قالسا, كوللەكتسيا قاتارىن تولىقتىرۋعا اڭسارى اۋىپ تۇراتىن قاسيەت قالىپتاستى.
سەگىز جىل بويى كوز مايىن تاۋىسىپ جيناعان دۇنيەلەرىن ارىپتەستەرىنەن, تانىستارىنان اتتاي قالاپ العانىنان بولەك ينتەرنەت ارقىلى ىزدەپ, جيناستىرعان, ساتىپ العان, ايىرباستاعان. كاسىبي ءورت ءسوندىرۋشىنىڭ كيىم-كەشەگىنىڭ ءبىر «بولشەگى» ول ءۇشىن ەرەكشە ىستىق. ءۇي ىشىن وزىندىك ورنى بار «ەكسپوناتقا» تولتىرعانىنا ەش وكىنبەيدى.
تاعدىردىڭ جازۋىمەن تالاي رەت «ىستىق نۇكتەلەردە» بولعان ساتتەردە ء ورت كاسكاسىنا قۇتقارۋشى تاڭىرىندەي «سىيىنعانىن», ارىپتەستەرىن دە اجال قۇشاعىنان ساقتاپ قالعانىن ۇمىتار ەمەس. وعان سول كەزدەگى ەسكى فوتوسۋرەتتەر كۋا. ءتىل بىتسە, شىتىرمانعا تولى تالاي وقيعانى تىزبەلەپ ايتىپ بەرەر ەدى.
قازىر پودپولكوۆنيكتىڭ ۇيىندە ار ءتۇرلى ەلدەردەن اكەلىنگەن ءورت ءسوندىرۋ كاسكالارى ساقتاۋلى. گەرمانيا, بەلورۋس, رەسەي, ۇلىبريتانيا, اقش, ءۇندىستان,چەحيا... ءتىزىم وسىلاي جالعاسا بەرەدى. كەيبىرى جىلتىراعان مىسپەن قۇيىلسا, ءتوزىمدى پلاستيكپەن قاپتالعاندارى دا كەزدەسەدى.
«مىنا ءبىرى –مەنىڭ جاۋىنگەرلىك كاسكام.ء ۇش جىل كيدىم. ءورت ءسوندىرۋ كەزىندە ءار ءتۇرلى جاعدايلار بولادى, ماسەلەن, بورەنەلەر قۇلايدى, گاز باللونى جارىلادى دەگەندەي. سونداي ارپالىستى ساتتەردە باسىمداعى باستى قورعانىم بولدى», – دەيدى كوللەكتسيونەر.
ول شيرەك عاسىرعا جۋىق كاسىبي ءورت ءسوندىرۋشى رەتىندە تانىلىپ, تالاي مارتە ادامداردى قۇتقارۋعا باسشىلىق ەتكەن. قازىر دە سۇيىكتى كاسىبىنەن قول ۇزگەن ەمەس. توتەنشە جاعدايلار دەپارتامەنتىندە توتەنشە جاعدايلاردى جويۋ بولىمىنە جەتەكشىلىك ەتەدى.
وتتى اپاتتارعا قالاي قارسى تۇرعانىن ول جادىنان ەشقاشان شىعارمايدى. ونىڭ كوللەكتسياسى - سول كۇندەردى ەسكە الۋدىڭ, ءارتۇرلى ەلدەر مەن حالىقتاردىڭ ءورت سوندىرۋشىلەرىنىڭ بىرىگۋىنىڭ سيمۆولى تارىزدەس.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى