«Egemen Qazaqstan» گازەتى باس رەداكتورىنىڭ ورىنباسارى قىزمەتىن اتقارعان ارىپتەسىمىز, بەلگىلى جۋرناليست قامبار احمەت بۇگىن قاراعاندى وبلىسىنىڭ «ورتالىق قازاقستان» گازەتىنە باس رەداكتور بولىپ تاعايىندالدى. ق.احمەتوۆتى ۇجىمعا تانىستىرعان وبلىس اكىمى ەرلان قوشانوۆ گازەتتە 20 جىلدان استام ۋاقىت باس رەداكتور بولعان ماعاۋيا سەمباي مىرزاعا زور العىس ءبىلدىردى.
قامبار جۇماعالي ۇلى احمەت بۇگىنگە دەيىن «Egemen Qazaqstan» گازەتىندە باس رەداكتوردىڭ ورىنباسارى رەتىندە ساياسات جانە قۇقىق بولىمدەرىنىڭ قىزمەتىن ۇيىمداستىرىپ, گازەتتىڭ وندىرىستىك-شىعارماشىلىق جۇمىستارىنىڭ ماڭىزدى بولىگىنە جاۋاپتى بولدى. ەڭبەك جولىن «ورتالىق قازاقستان» گازەتىندە باستاعان ول ءار جىلدارى «ايقىن» گازەتىندە مەنشىكتى ءتىلشى, «Baq.kz» اقپارات اگەنتتىگىندە باس رەداكتور, «قازاقستان» رترك ينتەرنەت رەداكتسياسىندا باس رەداكتور, «نۇر وتان» پارتياسىندا, اقپارات جانە كوممۋنيكاتسيالار مينيسترلىگىندە كەڭەسشى قىزمەتتەرىن اتقاردى.
قامبار جۇماعالي ۇلى ەل تاريحىنىڭ ءجۇز جىلدىق جىلناماسىن جازىپ جاتقان قازاق ءباسپاسوزىنىڭ قارا شاڭىراعى – «ەگەمەندە» جيناعان تاجىريبەسى مەن ءبىلىم-بىلىگىن «ورتالىق قازاقستان» گازەتىن دامىتۋ ىسىنە ايانباي جۇمساپ, تالماي قىزمەت ەتەتىنىنە سەنىمدىمىز.
ارىپتەسىمىزدى شىن جۇرەكتەن قۇتتىقتاي وتىرىپ, جۇمىسىندا ساتتىلىك پەن تابىستىلىق جولداس بولۋىنا تىلەكتەسپىز!
«Egemen Qazaqstan» گازەتىنىڭ ۇجىمى.
قامبار جۇماعالي ۇلى 1978 جىلى قاراعاندى وبلىسىنىڭ اقتوعاي اۋدانىندا دۇنيەگە كەلگەن.
ە.ا.بوكەتوۆ اتىنداعى قارمۋ-دىڭ تۇلەگى. جۋرناليستيكاداعى ەڭبەك جولىن «بالقاش ءوڭىرى» قالالىق گازەتىنىڭ ءتىلشىسى قىزمەتىندە باستاعان.
2004-2006 جج. قاراعاندى وبلىستىق «ورتالىق قازاقستان» گازەتىندە ءتىلشى;
2006-2007 جج. قاراعاندى وبلىستىق «بالقانتاۋ» گازەتىندە ءتىلشى;
2005-2008 جج. «قازاقستان ءباسپاسوز كلۋبى» اق قاراعاندى وبلىسى بويىنشا وكىلى;
2007-2014 جج. رەسپۋبليكالىق قوعامدىق-ساياسي «ايقىن» گازەتىنىڭ ءتىلشىسى;
2010-2013 جج. Baq.kz اقپارات اگەنتتىگىنىڭ باس رەداكتورى;
2013-2014 جج. «قازاقستان» رترك» اق ينتەرنەت جوبالار بولىمىندە باس رەداكتور;
2014-2016 جج. «نۇر وتان» پارتياسى «ەلەكتروندىق پارتيا» مەديا رەداكتسياسى ينتەرنەت-رەسۋرسىنىڭ باسشىسى;
2016-2018 جج. قر اقپارات جانە كوممۋنيكاتسيالار ءمينيسترىنىڭ كەڭەسشىسى;
2018 جىلدان «ەگەمەن قازاقستان» رەسپۋبليكالىق گازەتى باس رەداكتورىنىڭ ورىنباسارى قىزمەتتەرىن اتقارعان;
قر پرەزيدەنتىنىڭ العىس حاتىمەن, قر اقپارات جانە كوممۋنيكاتسيالار مينيسترلىگىنىڭ «اقپارات سالاسىنىڭ ۇزدىگى» توسبەلگىسىمەن ماراپاتتالعان.