ورتالىقتا تۇرىپ جاتقان جاندار ءۇشىن بارلىق جاعداي جاسالعان. ولار ساپالى مەديتسينامەن, كۇتىممەن قامتىلعان. بۇل تۋرالى استانا قالاسى اكىمدىگىنىڭ ءباسپاسوز قىزمەتى حابارلادى.
استانا اكىمى باقىت سۇلتانوۆ اقمولا وبلىسى اقكول اۋدانىڭداعى «قامقور» الەۋمەتتىك قىزمەت كورسەتۋ ورتالىعىندا بولدى. ««قامقور» الەۋمەتتىك قىزمەت كورسەتۋ ورتالىعى» كمم 2005 جىلى قۇرىلعان. وندا پسيحونەۆرولوگيالىق اۋرۋلارعا شالدىققان جانە كۇتىمگە, تۇرمىستىق جانە مەديتسينالىق قىزمەتكە مۇقتاج جالعىز باستى زەينەتكەرلەر تۇرادى.
«قازىرگى تاڭدا ورتالىقتا 44 زەينەتكەر, 319 مۇمكىندىگى شەكتەۋلى جان تۇرادى. بىزدە بارلىق الەۋمەتتىك جاعداي جاسالعان: بولمەلەرىمىز جىلى, سپورت جانە جاتتىعۋ زالدارى, كىتاپحانا, ەڭبەكپەن ەمدەۋ كابينەتتەرى مەن اسحانا بار», – دەدى ««قامقور» الەۋمەتتىك قىزمەت كورسەتۋ ورتالىعى» كمم ديرەكتورى نۇربول زۇلقارناەۆ. ورتالىقتا ءتۇرلى الەۋمەتتىك كومەك كورسەتىلەدى: تۇرمىستىق, پسيحولوگيالىق, ەڭبەك, قۇقىقتىق. ورتالىقتا بوس ۋاقىتتى ءتيىمدى وتكىزۋ جاقسى ۇيىمداستىرىلعان. مەرەكەلىك , سپورتتىق ءىس-شارالار ءوتىپ تۇرادى.
«مەملەكەت باسشىسى بىرنەشە رەت اتاپ وتكەندەي, ءبىزدىڭ ەلىمىزدە مۇمكىندىگى شەكتەۋلى جاندارعا ەرەكشە كوڭىل ءبولىنىپ ولارعا «كەدەرگىسىز» ورتا قۇرۋعا ءتيىسپىز. ءسىزدىڭ ورتالىقتا كاسىبي ماماندار جۇمىس ىستەيدى. ولار – قايىرىمدى جانە ادامداردىڭ جان دۇنيەسىن جاقسى بىلەتىن, جىلىلىققا مۇقتاج جاندارعا جۇرەك جىلۋىن سىيلايتىن جاندار», – دەدى استانا اكىمى باقىت سۇلتانوۆ. 2018 جىلى استانا اكىمدىگى جۇمىسپەن قامتۋ, ەڭبەك جانە الەۋمەتتىك قورعاۋ باسقارماسىنىڭ قولداۋىمەن ءجۇز ورىندىق جاڭا عيمارات سالىنعان. جاڭا عيمارات مۇمكىندىگى شەكتەۋلى جاندارعا ارنالعان جاڭا قۇرالدارمەن جابدىقتالعان. جاڭا كورپۋستا كۇن كوللەكتورلارى ورناتىلعان, سونىڭ ارقاسىندا مۇندا ىستىق سۋعا قاتىستى پروبلەمالى ماسەلە جوق.