اتىراۋدا وزبەكستاننىڭ 26 ازاماتى ارنايى رۇقسات قاعازدارىن الماستان جۇمىس ىستەپ جۇرگەندەرى انىقتالدى. ولار دەنساۋلىققا زيان كەلەتىن ايماقتا قۇبىر تازالاۋمەن اينالىسقان. شەتەلدىك ازاماتتار وبلىس اۋماعىندا بولۋ زاڭناماسىن دا بۇزىپ وتىر.
اتىراۋ وبلىسى پوليتسيا دەپارتامەنتىنىڭ ءباسپاسوز قىزمەتى بەرگەن مالىمەتكە سۇيەنسەك, وسى ءىس بويىنشا 38 اكىمشىلىك حاتتاما تولتىرىلىپتى. ال شەتەلدىكتەردى زاڭسىز جۇمىسقا تارتقان اتىراۋ قالاسىنىڭ تۇرعىنى ەندى 140 اەك كولەمىندە ايىپپۇل تولەيدى.
جالپى مۇنايلى وڭىردە شەتەلدىك جۇمىس كۇشىنىڭ اعىمى ايتارلىقتاي ءوسىپ وتىر. جاقىندا عانا اتىراۋ وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق پوليتسيا دەپارتامەنتىنىڭ كوشى-قون قىزمەتى باسقارماسىنىڭ باسشىسى بولات دوسقاليەۆ وتكەن جىلى وڭىرگە 86 مىڭنان استام ادام الىس شەتەلدەردەن جəنە 77 مىڭ ادام تمد ەلدەرىنەن كەلگەنىن ايتقان بولاتىن.
باقىتگۇل باباش,
«Egemen Qazaqstan»
اتىراۋ