جۋىردا شىمكەنت قالاسى اكىمدىگىندە ەلباسى تاپسىرماسىنا سايكەس, كوممۋنالدىق تاريفتەردى رەتتەۋگە بايلانىستى جيىن وتكەن بولاتىن. وندا, وڭىردەگى مونوپوليس مەكەمە باسشىلارى جىلى ورىندارىنان قيمىلداپ, ەسەپ بەرىپ, بەتىمەن كەتكەن باعانى تومەندەتۋ ءۇشىن ءتاريفتى قايتا قاراۋعا ۋادە ەتكەن ەدى.
كوممۋنالدىق سالا جاۋاپتىلارىنىڭ سوزىنە سەنەر بولساق, باسقا ەلدەردەن قىمبات كوگىلدىر وتىن پايدالانىپ, ارزان ەمەس سۋ ءىشىپ, قۇنى جوعارى جارىق تۇتىنىپ كەلەدى ەكەنبىز. حالىقتىڭ قالتاسىن قاعىپ, ارتىق تولەمىن الىپ وتىرعان الپاۋىت مەكەمە باسشىلارىنىڭ پرەزيدەنت سىنىنان كەيىن مىڭ قۇبىلىپ بىلايشا اقتالعانىنا ءتىپتى كۇلكىڭىز كەلەدى.
بۇگىنگە دەيىن شىمكەنت قالاسى تۇرعىندارى وزبەكستاننان كەلگەن كوگىلدىر وتىن پايدالانىپ كەلدى. الايدا, ىرگەدەگى كورشىدەن العان تابيعي گازدىڭ قۇنى ەلدىڭ ەكونوميكالىق ورتالىعى الماتى قالاسىنداعى تاريف قۇنىنان دا قىمبات. وسى ماسەلەنى تۇرعىندار تالاي رەت كوتەرگەن تۇعىن. بىراق, سەلت ەتكەن مونوپوليستەر بولمادى.
«شىمكەنت قالاسىندا سۋدىڭ باعاسى دا قىمبات», دەيدى ماماندار. ال, «سۋ رەسۋرستارى ماركەتينگ» مەكەمەسى جاۋاپتىلارىنىڭ ايتۋىنشا, تۇتىنۋشىلارعا ەسەپتەۋىش قۇرالدار قويىلعان, ەسەسىنە ءار تۇرعىن 200 تەڭگەدەن ارتىق اقى تولەمەيدى ەكەن.
ء«بىز ارقاشاندا ەلباسىنىڭ باستاماسىن قولدايمىز. سوندىقتان باعانى تومەندەتۋگە ۋادە بەرەمىز», دەيدى «سۋ رەسۋرستارى ماركەتينگ» جشس-ءنىڭ ديرەكتورى اناربەك ورمان.
شىمكەنتتەگى ساپالى ەلەكتر جارىعىنىڭ قۇنى دا قالتاعا سالماق سالادى. تالاي مارتە ءوز اۋداندارىنان سايلانعان دەپۋتاتتارعا دات ايتقان حالىقتىڭ تاۋى شاعىلعان. مونوپوليستەر حالىقتىڭ ءسوزىن جۇرە تىڭدايدى. جەرگىلىكتى بيلىك ورگاندارىنان ناقتى تاپسىرما تۇسپەي ولار جەپ وتىرعان «كۇلشەلەرىنەن» ايرىلار ەمەس دەيدى كوپشىلىك.
قالانى جارىق ەنەرگياسىمەن قامتاماسىز ەتەتىن «وڭتۇستىك جارىق ترانزيت» مەكەمەسىنىڭ ءتاريفى دە تومەن ەمەس. جارىق باعامى بويىنشا, شىمكەنتتىكتەر 8 ورىندا تۇر.
كەزدەسۋدە جولاقىسى مەن قاتتى تۇرمىستىق قالدىقتاردى شىعارۋ ءتاريفى دە قارالدى. سالا ماماندارى بايانداما جاساعانىمەن, اقىسىن ارزانداتامىن دەگەندەرى كوپ بولمادى. اكىمدىك جاۋاپتىلارى بارلىق كوممۋنالدىق قىزمەت كورسەتەتىن مەكەمەلەردە تاريف ماسەلەسىنە قاتىستى تەكسەرۋ جۇرگىزەتىنىن جەتكىزدى.
ءوز كەزەگىندە ولار وسىعان دەيىن كوممۋنالدىق باعا باعامىنا تۇسىنىستىكپەن قاراعان قالا اكىمى عابيدوللا ابدىراحىموۆقا العىس ايتىپ, ءتاريفتى قايتا قاراۋعا ۋادە ەتتى.
وسىلايشا جەرگىلىكتى بيلىك پەن كوممۋنالدىق كومپانيا باسشىلارىنىڭ جىل سوڭىنداعى كەزدەسۋىنەن كوپ وتپەي قاڭتار ايىنان باستاپ شاھارداعى كوممۋنالدىق قىزمەت باعاسى ارزاندايدى دەگەن حابار تارادى.
«ەلىمىزدىڭ ءۇشىنشى مەگاپوليسىندە گاز, جارىق, اۋىز سۋ, جىلۋ, كارىز جۇيەلەرىنىڭ قىزمەت كورسەتۋ قۇنى الدىڭعى جىلدارمەن سالىستىرعان بىرنەشە پايىزعا تومەندەيدى. قاڭتار ايىنان باستاپ شىمكەنت قالاسىندا جىلۋ باعاسى 17, جارىق 6,8, اۋىز سۋ 10, كارىز جۇيەسى قىزمەتى 10, كوگىلدىر وتىن 3,3 پايىزعا تومەندەيدى», دەيدى قالالىق ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسى نۇرلان امانقۇلوۆ.
جاعىمدى جاڭالىقتان حاباردار بولعان قالا تۇرعىندارى «پرەزيدەنت تاپسىرما بەرمەسە, بۇلار قويان بۇلتاقپەن تاريف باعاسىن تومەندەتپەيتىن ەدى», دەپ شۋلاستى.
نۇرشات توكەن,
«Egemen Qazaqstan»