الماتى وبلىسى اۋماعىندا «سەرۆيستىك اكىمدىك» قىزمەتىنىڭ جۇزەگە اسقانىنا اسا كوپ ۋاقىت بولا قويعان جوق. وتكەن جىلدىڭ كوكتەمىندە ىسكە قوسىلعان ۇشقىر جوبا قازىر مەملەكەتتىك قىزمەت سالاسىنداعى ءتيىمدى باستاما رەتىندە باعالانىپ وتىر.
جالپى «سەرۆيستىك اكىمدىك» جوباسى مەملەكەتتىك قىزمەت كورسەتەتىن مەكەمەلەردى ءبىر جەردە شوعىرلاندىرۋ مەن ازاماتتارعا قولايلى جاعداي جاساۋعا ارنالعاندىعىمەن قۇندى. ياعني, بۇل جەردە اتقارۋشى بيلىك وكىلدەرىنىڭ جەرگىلىكتى تۇرعىندارمەن بەتپە-بەت وتىرىپ جۇمىس جاساۋىنا ەش كەدەرگى جوق. ونىڭ ۇستىنە شارۋاسى قاۋىرت ادام قالانىڭ تۇكپىر-تۇكپىرىندە ورنالاسقان بولىمدەردى ىزدەپ سابىلماي, قاجەتتى قىزمەتى ءبىر عيماراتىڭ ىشىنە تاۋىپ, ءىسىن قينالماي-اق بىتىرۋىنە قول جەتكىزدى.
قارتال اۋدانىنىڭ ورتالىعىندا باستاۋ الىپ, قازىرگى كۇنى تۇتاس ەل بويىنشا ۇلگى رەتىندە ۇسىنىلىپ وتىرعان «سەرۆيستىك اكىمدىككە» اۋداننىڭ بارلىق مەملەكەتتىك قىزمەت ءتۇرىن كورسەتەتىن بولىمدەرى شوعىرلانۋدا. ۇشتوبەدەگى ۇياداي عانا عيماراتقا قاجەتتى قىزمەتتىڭ 41 ءتۇرىن ۇسىناتىن ۇشتوبە قالاسى اكىمىنىڭ اپپاراتى, ءبىلىم بەرۋ, ساۋلەت جانە قالا قۇرىلىسى, جەر قاتىناستارى, جولاۋشىلار تاسىمالى جانە اۆتوموبيل جولدارى بولىمدەرى, قاراتال اۋدانى اكىمدىگىنىڭ جۇمىسپەن قامتۋ ورتالىعى سياقتى ناعىز جۇرت ءجيى ىزدەيتىن رەسمي ورگاندار قونىستاندى. «سەرۆيستىك اكىمدىكتىڭ» تاعى ءبىر ەرەكشەلىگى, بۇل جەردە ادەتتەگىدەي كىلەم توسەلگەن ءدالىز بويىنا قازداي تىزىلگەن ەمەن ەسىكتى كابينەتتەر جوق. بارلىق اتقارۋشى ورگاننىڭ قىزمەتكەرلەرى Open space ادىسىمەن, اشىق كابينالاردا وتىرىپ جۇمىس ىستەۋدە.
جاقىندا الماتى وبلىسىنا جۇمىس ساپارىمەن كەلگەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ قاراتال اۋدانىنا ارنايى بارىپ, جۇمىس بارىسىن كوزبەن كورگەن.
- Open space رەجيمىندەگى اشىقتىق ءپرينتسيپىن قاتاڭ ۇستاناتىن مۇنداي نىسانداردى بارلىق جەرلەردە اشۋىمىز كەرەك. ارينە, حالىققا قىزمەت كورسەتۋ ورتالىقتارى بار كەزدە, تاعى قىزمەت كورسەتۋ ورتالىقتارىن اشۋدىڭ قاجەتى قانداي دەگەن سۇراق تۋىنداۋى مۇمكىن. بۇل سۇراقتا ورىندى. دەگەنمەن, مەملەكەتتىك قىزمەتتەردى كورسەتۋ سالاسى ءوز الدىندا تۇرعان ماسەلەلەردى شەشىپ, دامۋدىڭ جوعارى ساتىسىنا جەتكەن جوق. كوپتەگەن مەملەكەتتىك قىزمەتتەردى الۋ ءۇشىن جەرگىلىكتى اتقارۋشى ورگانداردىڭ عيماراتتارىنا بارۋ ماڭىزدىلىعىن ءالى دە جوعالتپادى. وسىعان بايلانىستى, مەملەكەتتىك قىزمەتتەردى الۋشىلار ءۇشىن وسىنداي «سەرۆيستىك اكىمدىك» ۇيىمداستىرۋ كاجەت بولىپ وتىر, - دەدى اگەنتتىك توراعاسى.
ايتپاقشى, ۇشتوبە قالاسىنداعى پيلوتتىق باستاما ىسكە قوسىلعالى بەرى اتقارۋشى ورگان وكىلدەرى تۇرعىندارعا 4878 مەملەكەتتىك قىزمەت ءتۇرىن كورسەتىپ ۇلگەرىپتى. بۇل – «سەرۆيستىك اكىمدىك» جوباسىنىڭ تيىمدىلىگىنە ناقتى دالەل.
قالماحانبەت مۇقامەتقالي,
«Egemen Qazaqstan»
الماتى وبلىسى