جەرگىلىكتى جەرلەردە وتكىزىلگەن كەزەكتى «ميگرانت» جەدەل-پروفيلاكتيكالىق ءىس-شارالارى شەكارانى زاڭسىز اسىپ كەلگەن شەتەل ازاماتتارىنىڭ كەزەكتى توبىن اشكەرەلەدى.
كوشى-قون قىزمەتى باسقارماسى ۇيىمداستىرعان رەيد بارىسىندا ەل اۋماعىنا كەلۋ, وندا بولۋ مەن شىعۋ ەرەجەلەرىن ورەسكەل بۇزۋدىڭ 259 وقيعاسى انىقتالىپ, 16 شەتەلدىك شىعارىلعان. كوشى-قون قىزمەتىنىڭ قىزمەتكەرلەرى پەتروپاۆل قالاسىنداعى قۇرىلىس وبەكتىلەرىنىڭ بىرىندە زاڭسىز جولمەن ناپاقاسىن تاۋىپ جۇرگەن وزبەكستان رەسپۋبليكاسىنىڭ 5 ازاماتىن قۇرىقتادى. ولار قازاقستان اۋماعىنا جەكە ماقساتپەن كەلگەندەرىن ايتىپ, جاۋاپكەرشىلىكتەن سىتىلۋعا تىرىسقان. اقشا تاپپاق بولعان نيەتتەرى كوشى-قون زاڭناماسىنا قايشى كەلگەندىكتەن, حاتتاما تولتىرىلىپ, اكىمشىلىك قاماۋعا الىندى.
رەيد كەزىندە قۇرىلىس وبەكتىلەرىنەن بولەك بازارلار مەن ساپارجايلار اۋماعى, شەتەلدىكتەر قونىستانعان ورىندار دا ءجىتى تەكسەرىلدى.
كوشى-قون قىزمەتى باسقارماسىنىڭ باستىعى, پوليتسيا مايورى تالعات ءابىلوۆتىڭ ايتۋىنشا, سولتۇستىكقازاقستاندىق ساقشىلار بىلتىر 5 جەدەل-پروفيلاكتيكالىق ءىس-شارا وتكىزىپتى. جۇرگىزىلگەن جۇمىستاردىڭ ناتيجەسىندە جۇزدەگەن شەتەلدىك ازاماتتار اكىمشىلىك جاۋاپتكەرشىلىكە تارتىلىپ, ەلدەن الاستاتىلعان. شەتەلدىك جۇمىس كۇشىن زاڭسىز قولدانعان ونداعان جۇمىس بەرۋشىگە جازا قولدانىلعان.
مەملەكەتتىك شەكارانى زاڭسىز جولمەن كەسۋ, ەل اۋماعىنان شىعارۋ تۋرالى سوت شەشىمىن ورىنداماۋعا, زاڭسىز كوشى-قون ۇيىمداستىرۋعا قاتىستى بىرنەشە قىلمىستىق ءىس قوزعالعان.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى