بۇگىندە ەلىمىزدەگى «پەداگوگ مارتەبەسى تۋرالى» زاڭ جوباسىنىڭ تۇجىرىمداماسى قوعامدا قىزۋ تالقىلانىپ جاتىر. بۇل – ەلباسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا جۇكتەگەن وزەكتى ءارى كۇرمەۋلى ماسەلەلەردىڭ ءبىرى. اتالعان زاڭ جوباسى ءبىلىم بەرۋ ۇيىمدارىنىڭ قۇقىقتارى مەن كەپىلدىكتەرىن, پەداگوگيكالىق جانە عىلىمي جۇمىستارىن جۇزەگە اسىرۋدى, سونداي-اق ءبىلىم بەرۋ دەڭگەيىنىڭ, مەنشىك نىساندارىنىڭ, ءبىلىم بەرۋ ۇيىمدارىنىڭ ءتيپى مەن تۇرلەرىنە قاراماستان مەملەكەتتىك, قوعامدىق قولداۋ جانە تانۋ شارالارىن جۇزەگە اسىرۋدى قامتيتىن مۇعالىم مارتەبەسىن كوتەرۋگە باعىتتالعان. تاياۋدا قوعام تاراپىنان تۇسكەن ۇسىنىستاردىڭ ەلەۋلى بولىگىن ءبىلىم جانە عىلىم مينيسترلىگى دە ءبىر ەلەكتەن وتكىزدى. ارينە وسىعان دەيىن قوردالانىپ قالعان تۇيتكىلدەردىڭ ءتۇيىنىن تارقاتۋعا جاڭا زاڭ جوباسى قاۋقارلى بولۋى ءتيىس. سوندىقتان بۇل ماسەلەنى ەگجەي-تەگجەيلى پىسىقتاپ العان ءجون.
بارلىق مۇعالىمدەر قاۋىمى ەلباسىنىڭ بيىلعى جولداۋىندا ءبىلىم جانە عىلىم مينيسترلىگىنە تاپسىرعان «پەداگوگ مارتەبەسى تۋرالى» جاڭا زاڭ جوباسىنان ۇلكەن ءۇمىت كۇتەدى. ماسەلەن ء«بىلىم تۋرالى» زاڭدا پەداگوگتاردىڭ مارتەبەسى مەن قۇقىقتارى جان-جاقتى قورعالىپ, جازىلعان. بىراق جاڭادان ازىرلەنىپ جاتقان زاڭ جوباسىندا ۇستاز مارتەبەسىنەن گورى, ءبىلىم سالاسىنىڭ اينالاسىنداعى تولىپ جاتقان نۇسقاۋلىق, ەرەجەلەردىڭ تارماقتارى باسىمداۋ كورىنەدى. سوندىقتان پەداگوگتاردىڭ مارتەبەسى تۋرالى زاڭ جوباسى ءجىتى قاداعالانىپ, ۇستاز, اتا-انا, وقۋشى ۇشتىگىنىڭ ورتاق قۇقىقتارى مەن تالاپ-تىلەكتەرى تولىق ەسكەرىلەدى دەپ ويلايمىن. ەڭ باستىسى, جاڭا زاڭ قىسقا دا نۇسقا جازىلىپ, وندا اعارتۋشىلىقپەن اينالىساتىن جانداردىڭ مارتەبەسى مەن قۇقىقتارى قورعالۋى كەرەك.
وسىلايشا پرەزيدەنت تاپسىرماسىمەن قولعا الىنعان ءبىلىم سالاسىنداعى بۇل رەفورما وڭ جالعاسىن تابادى دەپ سەنەمىن. نەگىزىنەن جاڭادان قابىلداناتىن زاڭ مۇعالىمدەر قاۋىمىن جاڭا ساتىعا شىعاراتىن تەتىك بولۋى كەرەك. ەلباسى نۇرسۇلتان نازارباەۆ ءوز سوزىندە ايتىپ وتكەندەي, بۇدان بىلاي مۇعالىمنىڭ مىندەتىنە كىرمەيتىن فۋنكتسيالار كولەمىنىڭ ارتىق بولۋى اتالعان زاڭ اياسىندا وڭ شەشىمىن تابۋى شارت. ولاي ەتپەگەن جاعدايدا اي سايىن قاجەتتى دەڭگەيدەگى اقىعا قول جەتكىزۋ ءۇشىن مۇعالىمدەردىڭ شەكتەن تىس جۇمىس ىستەۋگە ماجبۇرلىگى, كوپتەگەن جەڭىلدىك پەن كەپىلدەمەنى الۋدىڭ قيىندىعى ەش شەشىمىن تابا المايدى.
سونداي-اق پەداگوگ ماماندىعىنا ەر ادامداردىڭ بارماۋى, مەكتەپكە دەيىنگى تاربيە مەن ءبىلىم بەرۋ سالاسىندا, اعىلشىن ءتىلى جانە تاعى باسقا ناقتى ماماندىقتا ساباق بەرەتىن ۇستازداردىڭ جەتىسپەۋشىلىگى مەن ەڭبەكاقىنىڭ تومەندىگى دە جاڭا زاڭ نەگىزىندە جاقسى جەتىستىكتەرگە باستاۋى ءتيىس.
الينا سولوۆەۆا,
قازاقستاننىڭ ەڭبەك ەرى,
ا.پۋشكين اتىنداعى №1 مەكتەپ-گيمنازيانىڭ بيولوگيا ءپانىنىڭ مۇعالىمى
شىمكەنت