الماتى مەن جالپى جەتىسۋ ولكەسىندە تاۋ كلاستەرىنىڭ تۋريستىك الەۋەتى وتە جوعارى. ەلىمىزگە كەلگەن اۆستريانىڭ «Master Concept» كومپانياسىنىڭ باس ديرەكتورى گەرنوت ليايتنەر وسىلاي دەيدى.
الماتى اكىمدىگىنىڭ باستاماسىمەن ايتۋلى كومپانيا مەگاپوليس اينالاسى مەن الماتىلىق اگلومەراتسيانىڭ 2030 جىلعا دەيىنگى تاۋ كلاستەرىن دامىتۋدىڭ شەبەرلىك-جوسپارىن جاسادى. تۋريزم سالاسىن دامىتۋ ماقساتىندا ءوڭىردىڭ بارلىق تاۋ لوكاتسيالارى قامتىلماق. بۇل تىزىمدە ايماقتىڭ ماقتانىشىنا بالاناتىن تۋرگەن, اق بۇلاق, Oi-Qaragai Lesnaya Skazka, تاباعان, بۋتاكوۆكا, پيونەر, كوكجايلاۋ, شىمبۇلاق, قاسكەلەڭ بار.
شەبەرلىك-جوسپار اياسىندا 470 كم سوقپا جانە 85 كم ۆەلوسيپەد جولدارىن, 45 كم اتپەن ءجۇرۋ باعىتتارىن, 250 كم شاڭعى تراسسالارىن دامىتۋ جايى كوزدەلگەن.
الماتى اكىمى باۋىرجان بايبەك جۇمىس ساپارى كەزىندە الماتى وبلىسى اكىمدىگىنىڭ باسشىلىعىمەن بىرگە كوشپەلى جيىن وتكىزىپ, ءوڭىردىڭ بارلىق تاۋ لوكاتسيالارىن ارالادى.
شاھار باسشىسى تاۋ اۋماعىندا قوجەتىمدى سپورتتىق-وتباسىلىق كۋرورت ۇيىمداستىرۋ ءۇشىن «تسسكا» تاۋ شاڭعىسى بازاسىن قالانىڭ كوممۋنالدىق مەنشىگىنە بەرۋ ماسەلەسىن قاراستىرۋدى تاپسىردى.
بۇلاردان وزگە, تاۋ ءتۋريزىمىن دامىتۋ ماقساتىندا «پيونەر», «Oi-Qaragai Lesnaya Skazka» تاۋ كۋرورتتارىنا دەيىن قالا ماڭىنداعى ەلدى مەكەندەردەن ارنايى اۆتوبۋستار قاتىنايتىن بولادى. جاڭا اۆتوبۋس باعىتتارى اپتاسىنا ءۇش رەت (جۇما – سەنبى – جەكسەنبى) 2-3 ساعاتتىق ينتەرۆالمەن قاتىنايتىن بولادى.
تاۋ كلاستەرىن دامىتۋ تۋرالى شەبەرلىك-جوسپارىن جاساۋ جونىندەگى مەموراندۋمعا قول قويۋعا الماتى قالاسى مەن الماتى وبلىسىنىڭ اكىمدىكتەرى, ىلە-الاتاۋ ۇلتتىق پاركى, «قازاق تۋريزم» جانە «Master Concept» كومپانيالارى قاتىستى. شەبەرلىك-جوسپارىنىڭ كونتسەپتسياسىن تالقىلاۋ توبىنا مەملەكەتتىك ورگانداردىڭ, تۋريزم سالاسىنداعى حالىقارالىق كومپانيالاردىڭ, قوعامدىق قورلاردىڭ, تۋريستىك اسسوتسياتسيالاردىڭ, جوعارى وقۋ ورىندارىنىڭ, سپورتتىق تۋريزم فەدەراتسياسىنىڭ وكىلدەرى ەنىپ وتىر.
ارمان وكتيابر,
«ەگەمەن قازاقستان»
الماتى