شىمكەنت شاھارىنىڭ «جەڭىس» ساياباعىنداعى «ەرلىك» مۋزەيى ەكى جىلدان بەرى ەلباسىنىڭ «بولاشاققا باعدار: رۋحاني جاڭعىرۋ» ماقالاسىنا وراي «اتا-بابالار اماناتى – ەلدىك پەن ەرلىك, بىرلىك پەن ىنتىماق» جوباسىن جەمىستى جۇزەگە اسىرىپ كەلەدى. نەبىر ءماندى دە مازمۇندى شارالار ۇيىمداستىرىلۋدا. وسى جوبا اياسىندا مايداندا جانە تىلدا, اۋعان سوعىسىندا, سونداي-اق تاۋەلسىزدىك جىلدارىندا الۋان ءتۇرلى سالادا ەرەن ەڭبەكتىڭ, ىزدەنىستىڭ ۇلگىسىن كورسەتكەن تۇلعالارمەن «سارسەنبىلىك سىرلاسۋ ساعاتتارى» شاراسى وتكىزىلىپ تۇرادى.
16 قاڭتار كۇنى ەنەرگەتيكا سالاسىندا ەرەكشە ەڭبەك ءسىڭىرىپ جۇرگەن, قازاقستاننىڭ بىرقاتار وڭىرلەرىندە تانىلعان, جاۋاپتى باسشى قىزمەتتەر اتقارىپ كەلە جاتقان اتپال ازامات, مەتسەنات, زيالى دا زياتكەر تۇلعا پەردەباي سابيتوۆپەن «ۇلتجاندىلىق شەرحان مۇرتازادان جۇققان» دەگەن تاقىرىپتا سىرلاسۋ ساعاتى بولدى. اتالمىش باسقوسۋعا اقىن-جازۋشىلار, جۋرناليستەر, ارداگەرلەر, باسقا دا زيالى قاۋىم وكىلدەرى, مادەنيەت قىزمەتكەرلەرى شاقىرىلدى. جاڭادان سالىنعان قوسىمشا عيماراتتا وتكەن سىرلاسۋ ساعاتىن مۋزەي مەڭگەرۋشىسى اقمارال قۇدايبەرگەنوۆا مەن جازۋشى مارحابات بايعۇت جۇرگىزدى.
«سارسەنبىلىك سىرلاسۋدىڭ» باس كەيىپكەرى پەردەباي ءسابيتوۆ پەن ونىڭ زايىبى قارلىعا يمانبەكوۆا اشىق تا بۇكپەسىز سىر شەرتتى. قويىلعان سۇراقتارعا جان-جاقتى جاۋاپ بەردى. بۇل جۇزدەسۋدىڭ جانە ءبىر ەرەكشەلىگى شەرحان مۇرتازا مەن تۇتقاباي يمانبەكوۆ تۋرالى ەستەلىكتەر ايتىلدى. ارداگەرلەر بايدۋللا قونىسبەك, نارماحان بەگالى ۇلى, ەرعالي جۇسىپبەكوۆ, شەرىم مەدەۋوۆ, جولدىباي ەندىباەۆ, جەڭىسبەك ماۋلەنقۇلوۆ, يسامۋددين رىسباي جانە باسقالار ۇلتىمىزدىڭ ءبىرتۋار پەرزەنتى شەرحان مۇرتازا مەن جازۋشى تۇتقاباي يمانبەك ۇلى تۋرالى, سولاردىڭ بەلسەندى وقىرمانى ءارى كىتاپتارىن شىعارۋعا دەمەۋشىلىك جاسايتىن پەردەباي ءسابيتوۆ جونىندە تارتىمدى اڭگىمەلەدى.
نۇرسۇلتان احيلبەكوۆ,
مۋزەي قىزمەتكەرى