كەشە وبلىستىڭ ءۇرجار اۋدانى اۋماعىندا, «الماتى-وسكەمەن» رەسپۋبليكالىق جولىنىڭ 681 شاقىرىمىندا اق تۇتەك بوران سالدارىنان تاڭعى ساعات 3:50-دەن باستاپ, اۆتوكولىكتەردىڭ كەپتەلىسى ورىن الىپ, 400-دەن استام ادامى بار 7 اۆتوبۋس, 45 كاماز, 30 جەڭىل كولىك جانە 8 گازەل جۇرە الماي, تۇرىپ قالعان ەدى. سول كۇنى كەشكە قاراي 312 ادام ەۆاكۋاتسيالانىپ, ونىڭ 28-ءى تاسكەسكەن اۋىلىنداعى اۋرۋحاناعا, 40-ى ى.التىنسارين اتىنداعى ورتا مەكتەپكە, 55-ءى - اقتامبەردى ورتا مەكتەبىنە, 19-ى - كوللەدجگە, 60-ى - تاسكەسكەن اۋىلىنىڭ تۇرعىندارىنا, 70-ءى - «ايگەرىم» كافەسىنە ورنالاستىرىلىپ, 40 ادام ءۇرجار اۋىلىنداعى ۇيلەرىنە جەتكىزىلگەن-ءدى. كولىگىنىڭ قاۋىپسىزدىگىنە الاڭداپ, ەۆاكۋاتسيالاۋدان باس تارتقان جولاۋشىلارعا جەرگىلىكتى اتقارۋ ورگاندارى ىستىق تاماق پەن كولىكتەر ءۇشىن جانارماي بەرۋدى ۇيىمداستىرعان بولاتىن.
ىشكى مينيسترلىگىنىڭ توتەنشە جاعدايلار كوميتەتىنىڭ رەسمي وكىلى نۇرسۇلتان نۇراحمەتوۆ 21 قاڭتارداعى ساعات 11-دەگى جاعداي بويىنشا 80 كولىك ءالى دە جولدا تۇرعاندىعىن, اۆتوبۋستار تاسكەسكەن اۋىلىنا جەتكىزىلگەن جولاۋشىلاردىڭ كۇتىپ وتىرعاندىعىن, قار تازالاۋ جۇمىستارىنا 100 مامان مەن 41 تەحنيكا جۇمىلدىرىلعانىن حابارلاعان ەدى. ءبىز ءمان-جايدى بىلمەك نيەتپەن ۇيالى تەلەفون ارقىلى كەشەدەن بەرى قار قۇرساۋىندا قالعان جولاۋشىلاردىڭ قاسىندا جۇرگەن ءۇرجار اۋدانى اكىمىنىڭ ورىنباسارى سەرىك سادۋاقاسوۆقا حابارلاسىپ, قىسقاشا سۇحبات الدىق.
-جول اشىلدى دەپ ەستىدىك. بارلىق كولىك جولعا شىعىپ كەتتى مە؟
-جول اشىلدى. 11 اۆتوبۋس تا وسكەمەنگە قاراي جولعا شىقتى. اۆتوبۋستاعى جولاۋشىلار تۇندە تاسكەسكەن اۋىلىنداعى مەكتەپتەر مەن كوللەدجگە, ەمحاناعا, مادەنيەت ۇيىنە ورنالاستىرىلدى. قالعان جولاۋشىلار ۇزىن سانى 153 ادام تەسكەسكەن اۋىلىنا جەتكىزىلدى. تاڭەرتەڭ كولىك ۇيىمداستىرىپ, جولاۋشىلاردى ءتورت اۆتوبۋسپەن توقتاپ قالعان جەرلەرىنە اكەلىپ, اۆتوبۋستارىنا وتىرعىزدىق. قازىرگى ۋاقىتتا بۇل جەردە 5 روتور, 2 گرەيدەر مەن 3 شىنجىر تاباندى تيەگىش جۇمىس ىستەپ جاتىر. كولىكتەردى كەزەك-كەزەگىمەن جىبەرىپ جاتىرمىز. شامامەن 10-14 ماشينەدەي بار.
- كەشە اۆتوبۋستاعى جولاۋشىلاردىڭ ءبىرىنىڭ «24 ساعات بولدى. كومەك سۇرايمىز. جول جوق. مچس قايدا؟ تەلەۆيزوردان كورگەندە ءايبات. مىنا جەردەن كورە الماي وتىرمىز» دەگەن ءسوزى ۋاتساپ ارقىلى جۇرتقا تاراعان بولاتىن.
-راسىندا, كەشەگى كۇن جولاۋشىلار ءۇشىن دە, ءبىز ءۇشىن دە اۋىر بولدى. تىنىم تاپپادىق. كولىكتەرىن تاستاپ جولاۋشىلاردىڭ كولىكتەرىنىڭ وت الۋىنا كومەكتەستىك. تۇندە سولياركاسى بىتكەن كولىكتەرگە ءۇرجار اۋدانىنىڭ اكىمى بولگەن تيگاچپەن «قازمۇنايگازدان» سولياركا الىپ بەردىك. تاسكەسكەن اۋىلىنىڭ جاستارىنا ەرەكشە العىسىمىزدى بىلدىرگىمىز كەلەدى. ولار ءوز ەرىكتەرىمەن كەشە 16 تەحنيكا شىعاردى. ەكى سنەگوحودپەن تاماق جەتپەي قالعان ادامدارعا تاماق جەتكىزدى. ماقانشىدان ارنايى كەلگەن اسكەري ءبولىم قىزمەتكەرلەرىنە دە العىسىمىز شەكسىز. اسكەري بولىمنەن ءتورت ماشينەمەن 20 ادام كەلدى. حالىقتى تۇنىمەن تاسىپ, كولىكتەرىنە اپارىپ, اكەلىپ وتىردى. وزدەرىمەن بىرگە 100 بولكە نان, ىستىق شاي اكەلىپتى. ءۇرجار اۋدانىنىڭ اكىمدىگى دە جولاۋشىلارعا 60 كەلىدەي كولباسا, 100 بولكەدەن استام نان, سۋ جەتكىزدى. تاسكەسكەن اۋىلىنىڭ اكىمشىلىگى دە كومەكتەستى. ارينە, ادام كوپ بولدى. كەيبىر جولاۋشىلاردىڭ نارازىلىعىن تۇسىنەمىز. ەڭ باستىسى, حالىق دالادا قالعان جوق. قونعان مەكەمەلەردىڭ بارلىعىندا ىستىق تاماق ۇيىمداستىردىق. تاڭەرتەڭ بارلىق جولاۋشىلارعا ءشايىن بەردىك.
- بىلۋىمىزشە, رەسپۋبليكالىق ماڭىزى بار «الماتى-وسكەمەن» جولى «قازاۆتوجول» مەكەمەسىنە قارايدى. جولدىڭ تازالىعىنا وسى مەكەمە جاۋاپتى. دەگەنمەن جولاۋشىلار تاراپىنان قاردىڭ دۇرىس تازالانباۋىنا قاتىستى كوپ سىن ايتىلدى.
-«قازاۆتوجولدىڭ» تەحنيكالارىنىڭ جەتىسپەۋشىلىگى بايقالعانى راس. كەشە ءبىر روتور مەن ءبىر گرەيدەر عانا بولدى. گرەيدەردىڭ ءوزى قايتا-قايتا باتىپ, ازەر جۇمىس ىستەدى. قالعان تەحنيكالار ءۇرجار, اياگوز, جارما اۋداندارى مەن وسكەمەن قالاسىنان كەلدى.
-جولاۋشىلار اراسىندا ۇسىك شالعان, اۋىرىپ قالعان ادامدار بولعان جوق پا؟
- ابىروي بولعاندا, مۇنداي فاكتىلەر تىركەلگەن جوق. قان قىسىمى كوتەرىلگەن جولاۋشىلار بولدى. ولاردى تاسكەسكەننىڭ باس دارىگەرى قاراپ, ەم-دومىن جاسادى. اۋداننىڭ باس دارىگەرى دە, اسكەري بولىمنەن كەلگەن دارىگەرلەر دە جولاۋشىلاردىڭ دەنساۋلىعىن باقىلاپ وتىردى.
ازامات قاسىم,
«ەگەمەن قازاقستان»
شىعىس قازاقستان وبلىسى