اقوردادا مەملەكەت باسشىسى نۇرسۇلتان نازارباەۆ پەن زيمبابۆە پرەزيدەنتى ەممەرسون منانگاگۆامەن كەزدەسۋى بولدى. ەكى ەل باسشىلارىنىڭ شاعىن قۇرامداعى كەلىسسوزدەرى جابىق ەسىك جاعدايىندا وتتى.
ەلباسى ەممەرسون منانگاگۆانى قازاقستانعا العاشقى رەسمي ساپارىمەن قۇتتىقتاپ, سەرىكتەستىكتى دامىتۋعا باعىتتالعان جوسپارلارىمەن ءبولىستى.
ء«بىزدىڭ وڭىرگە العاش رەت ساپار شەگىپ وتىرسىز. ەكى ەل اراسىنداعى ديپلوماتيالىق قارىم-قاتىناس 1992 جىلى ورنادى. سودان بەرى ەكى ەل باسشىلارى العاش رەت كەزدەسىپ وتىرمىز. سوندىقتان بۇل كەزدەسۋدىڭ ورتالىق ازيا, وڭتۇستىك افريكا ەلدەرى اراسىنداعى ىقپالداستىقتى نىعايتۋ ءۇشىن ماڭىزى زور. ءبىز الەمنىڭ بۇل ايماقتارىمەن ءالى سەرىكتەستىك ورناتقان جوقپىز. سوندىقتان, اراداعى قاشىقتىق سالدارىنان تۋىنداعان ساياسي, ەكونوميكالىق قارىم-قاتىناستى دامىتۋدى جولعا قويىپ وتىرمىز», دەدى نۇرسۇلتان نازارباەۆ.
سونىمەن قاتار پرەزيدەنت ەكى ەلدىڭ ۇقساستىقتارىن دا اتاپ ءوتتى. «زيمبابۆە دە ەلىمىز سەكىلدى قازبا بايلىقتارعا باي. ەندىگى كەزەكتە مەندەلەەۆ تابليتساسىنىڭ 50 ەلەمەنتى بار زيمبابۆە مەملەكەتىمەن سەرىكتەستىك ورناتۋ ماسەلەسىن العا قويامىز. اۋىل شارۋاشىلىعى سەكتورى دا جوسپارعا ەنىپ وتىر. تاۋ-كەن سالاسىنداعى تاجىريبە الماسۋ, زيمبابۆەگە بيداي مەن ەت تاسىمالداۋ ماسەلەسى جولعا قويىلادى. زيمبابۆە مەملەكەتى ءبىزدىڭ ترانسپورت-لوگيستيكالىق تاجىريبەمىزدى قولدانىسقا ەنگىزۋگە كەلىستى» دەدى ن.نازارباەۆ.
ودان بولەك ەلباسى حالىقارالىق ساياساتتا زيمبابۆەنىڭ قولداۋىن باعالايتىنىن ايتىپ كەتتى. ويتكەنى, زيمبابۆە – افريكا كەڭەسىنىڭ بەدەلدى مۇشەسى, بۇۇ بەلسەندى قاتىسۋشىسى. بۇۇ قاۋىپسىزدىك كەڭەسى اياسىندا ارىپتەسىكتى جالعاستىرۋعا, سونىمەن قاتار, قازاقستان باقىلاۋشى بولىپ كەلەتىن افريكا كەڭەسىنىڭ شەڭبەرىندە سەرىكتەستىكتى دامىتۋعا كەلىسكەنىن حابارلادى.
«ەممەرسون منانگاگۆانىڭ العاشقى رەسمي ساپارى ەكى ەل اراسىنداعى سەرىكتەستىكتى دامىتۋعا ەكىجاقتى نيەتىن كورسەتتى. العا قويعان جوسپارلارىمىز, رەسمي وكىلدەرىمىزدىڭ كەزدەسۋى, سەرىكتەستىك كەڭەسىن قۇرۋ ەكى ەل ارىپتەستىگىنىڭ دامۋىنا ۇلەسىن قوسارىنا سەنەمىن» دەدى مەملەكەت باسشىسى ءسوز سوڭىندا.