قىزىلوردادا ينسپەكتور ەرلان نۇرعاليەۆتىڭ ولىمىنە قاتىستى كۇدىكتىلەر ۇستالدى. بۇل تۋرالى ءىىم ىشكى جانە سىرتقى كوممۋنيكاتسيالار دەپارتامەنتىنىڭ ديرەكتورى الماس سادۋباەۆ ايتىپ بەردى.
«بۇگىن ارنايى وپەراتسيا بارىسىندا ءىىم كريمينالدىق پوليتسيا دەپارتامەنتىنىڭ جەدەل قىزمەتكەرلەرى قىزىلورداداعى جەكە ۇيلەردىڭ بىرىندە «وحوتزووپروم» ءوب رمقك ينسپەكتورى ەرلان بالعابەك ۇلى نۇرعاليەۆتىڭ ولىمىنە قاتىستى ءۇش كۇدىكتىنى ۇستادى», - دەپ حابارلادى سادۋباەۆ.
قازىر دالەلدەردى جيناۋ مەن بەكىتۋگە باعىتتالعان تەرگەۋ ارەكەتتەرى جۇرگىزىلىپ جاتىر. كۇدىكتىلەر ۋاقىتشا ۇستاۋ يزولياتورىنا قامالدى. سوتقا دەيىنگى تەرگەۋ جالعاسۋدا. ەستەرىڭىزگە سالا كەتەيىك, 15 قاڭتاردا № 1 قالالىق اۋرۋحانادا «وحوتزووپروم» ءوب» رمقك ينسپەكتورلارىنىڭ ءبىرى قايتىس بولدى, وعان وسى جىلدىڭ 13 قاڭتارىندا ءوزىنىڭ ارىپتەسىمەن بىرگە قاراعاندى وبلىسىنىڭ اۋماعىندا قىزمەتتىك مىندەتتەرىن اتقارۋ كەزىندە براكونەرلەر تاراپىنان شابۋىل جاسالدى.