قىزىلوردا وبلىسىندا «CT-KZ» سەرتيفيكاتىن الۋشىلار قاتارى قىرىق پايىزعا ءوستى.
- 2014 جىلدان باستاپ تاۋاردىڭ شىعۋ تەگىن انىقتايتىن سەرتيفيكاتتى راسىمدەۋ جانە بەرۋ شارالارىن «اتامەكەن» ۇلتتىق كاسىپكەرلەر پالاتاسىنىڭ وڭىرلىك پالاتالارى جۇرگىزىپ كەلەدى. ءبىزدىڭ وڭىرىمىزدەن تاۋارلاردى ەكسپورتتاۋعا ارنالعان سەرتيفيكات نەگىزىنەن كۇرىشكە, بالىققا, اس تۇزى مەن مازۋتقا, مۇناي مەن ۆانادي كەنىنە بەرىلۋدە. ءبىر كاسىپكەرىمىز ءتىپتى 2017 جىلدان باستاپ سافلور مايىن ءوندىرىپ, قىتايعا ەكسپورتتاۋدا. كوڭىل قۋانتارلىعى, سوڭعى ەكى جىلدا ەكسپورتقا شىعارىلاتىن تاۋارلارعا راسىمدەلگەن سەرتيفيكاتتاردىڭ كولەمى 40 پايىزعا وسكەن. بۇل وڭىرىمىزدە ەكسپورت كولەمىنىڭ ارتقاندىعىن كورسەتىپ وتىر, - دەيدى پالاتا ديرەكتورى عالىمبەك جاقسىلىقوۆ.
وتكەن جىلدىڭ وزىندە قىزىلوردا وبلىسىنان ەكسپورت ءۇشىن 1065 سەرتيفيكات, 104 «ست-كز» سەرتيفيكاتى بەرىلگەن. بۇگىندە قىزىلوردالىق ونىمدەر تمد ەلدەرىمەن بىرگە, قىتاي, موڭعوليا, اۋعانستان, لاتۆيا, شۆەيتساريا ەلدەرىنە ەكسپورتتالىپ جاتىر.
باقتيار تايجان,
«ەگەمەن قازاقستان»
قىزىلوردا وبلىسى