قايىرىمدىلىق ءىس-شارالاردىڭ باستى ۇيلەستىرۋشىسى سانالاتىن قازاقستان حالقى وبلىستىق اسسامبلەياسىنىڭ قولداۋىمەن «قايىرىمدىلىق كەرۋەنى» اكتسياسى جەر-جەرلەردە كەڭىنەن باستاۋ الىپ وتىر.
يگىلىكتى ءىس-شارانىڭ ماقساتى - كوپ بالالى جانە از قامتىلعان وتباسىلارعا, جالعىزىلىكتى زەينەتكەرلەر مەن مۇگەدەكتەرگە, اتا-انا قامقورلىعىنسىز قالعان جانە اۋىر سىرقاتقا شالدىققان بالالارعا كومەك كورسەتۋگە باعىتتالعان. «مەيىرىمدىلىكپەن بىرلىككە» ۇرانىمەن ءوتىپ جاتقان اكتسيا بارىسىندا «اسسامبلەيا» كورپوراتيۆتىك قورى تۇمەن وبلىسى قازاقتارىنىڭ ۇلتتىق-مادەني اۆتونومياسى جانە «ورىس, سلاۆيان جانە كازاك ۇيىمدارىنىڭ قاۋىمداستىعى» بىرلەستىگىنىڭ وبلىستىق فيليالىمەن بىرلەسىپ, اتا-انا قامقورلىعىنسىز قالعان بالالارعا سىيلىقتار تارتۋ ەتتى. تۇرمىسى تومەن ميحايلوۆتار وتباسىن قامقورلىققا الىپ, ۋاقىتشا تۇرعىن ۇيمەن, ازىق-ت ۇلىكپەن قامتاماسىز ەتتى. وتباسىنىڭ باسپاناسىن قايتا قالپىنا كەلتىرۋگە نەمەسە جاڭادان باسپانا ساتىپ الۋعا قاراجات جينالىپ جاتىر.
كوپ بالالى پسارەۆتار وتباسىنا دا گۋمانيتارلىق كومەك كورسەتىلدى. توعىز بالانى جالعىز تاربيەلەپ وتىرعان انانىڭ قارايلاسار جاناشىرى قالماعان. اسسامبلەيا ەرىكتىلەرى ازىق-ت ۇلىك پەن تۇرمىستىق قاجەتتى زاتتاردى جەتكىزىپ بەردى.
ەتنومادەني بىرلەستىكتەرى دە قايىرىمدىلىق اكتسياسىنا بەلسەنە قاتىسىپ جاتىر. «قازاقستانداعى ورىستار قاۋىمى» جانە ء«سىبىر كازاكتارى باۋىرلاستىعى» قوعامدىق بىرلەستىكتەرى فيليالى وكىلدەرى بىرلەسىپ, مۇگەدەكتەر قۇقىعىن قورعاۋ قوعامىنىڭ تاربيەلەنۋشىلەرىنە ارناپ كونتسەرت قويىپ, سىيلىقتار تارتۋ ەتتى. ال روجدەستۆو مەيرامى قۇرمەتىنە ۇيىمداستىرىلعان تاڭەرتەڭگىلىككە از قامتىلعان وتباسىلار شاقىرىلدى. «دۋسلىك» تاتار-باشقۇرت ورتالىعىنىڭ ونەرپازدارى بۇلدىرشىندەرگە كونتسەرتتىك باعدارلاما ۇسىندى.
تايىنشالىقتار قايىرىمدىلىق اكتسياسىن قالا ورتالىعىنداعى مۇز قالاشىعىندا وتكىزدى. ارداگەرلەر قوزعالىسىنىڭ بەلسەندىلەرى كوپ بالالى جانە تۇرمىس جاعدايى تومەن وتباسى بالالارىنا تاتتىلەر ۇسىندى. بۋلاەۆو قالاسىنداعى پراۆوسلاۆ شىركەۋىنىڭ ءدىندارلارى از قامتىلعان وتباسى بالالارىنا ويىنشىقتار مەن كيىم-كەشەكتەر تاراتتى. شال اقىن اۋدانىندا ۇيىمداستىرىلعان اكتسياعا بارلىق اۋىلدىق وكرۋگتەر قاتىسىپ, سوعىس ارداگەرلەرى مەن تىل ەڭبەككەرلەرىنە, سونداي-اق, تۇرمىسى تومەن وتباسىلارعا قولداۋ كورسەتىلدى.
وڭىرىمىزدە مۇنداي يگى شارالار جىل بويى جالعاسىن تاباتىن بولادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى