اقتوبە وبلىسىندا ءىرى جانە ورتا كاسىپورىندار وبلىس باسشىلىعى مەن كاسىپوداقتاردىڭ قاتىسۋىمەن ءداستۇر بويىنشا قىزمەتكەرلەرى الدىندا وتكەن جىلعى وندىرىستىك باعدارلامالاردىڭ, ۇجىمدىق شارتتار مەن مەموراندۋمداردىڭ ورىندالۋى جونىندە ەسەپ بەرۋ كەزدەسۋلەرىن وتكىزدى. بۇل تۋرالى اقتوبە وبلىسى اكىمىنىڭ ءباسپاسوز قىزمەتى حابارلادى.
بەردىبەك ساپارباەۆ ءىرى وندىرىستىك كاسىپورىنداردىڭ ءبىرى اقتوبە حروم قوسىندىلارى زاۋىتى اق-نىڭ باسشىلىعىمەن جانە ەڭبەك ۇجىمىمەن كەزدەستى.
احقز اق-نىڭ باسقارما توراعاسى الەكسەي حيميچ وندىرىستىك باعدارلاما مەن ۇجىمدىق كەلىسىمشارتتىڭ 2018 جىل ىشىندەگى ورىندالۋى تۋرالى باياندادى.
ونىڭ ايتۋىنشا, بىلتىر زاۋىت 107 486 توننا ءونىم وندىرگەن, بۇل 2017 جىلعى دەڭگەيدەن جوعارى بولىپ وتىر. كاسىپورىن قىزمەتكەرلەردىڭ الدىنداعى جالاقى بويىنشا جانە الەۋمەتتىك مىندەتتەمەلەرىن تولىق كولەمدە ورىندادى. بۇگىندە زاۋىتتا 2 200 – دەن استام اقتوبەلىك ەڭبەك ەتەدى. ورتاشا ايلىق جالاقى – 149,4 مىڭ تەڭگە.
باياندامانى تىڭداعان بەردىبەك ساپارباەۆ كاسىپورىن باسشىلىعىنا ءتيىمدى جۇمىس ىستەگەندەرى ءۇشىن العىسىن ايتىپ, 2019 جىلعا ارنالعان مىندەتتەردى بەلگىلەدى.
«اعىمداعى جىلى تۇراقتىلىقتى ساقتاي وتىرىپ, ءوندىرىس كولەمىنىڭ قىسقارۋىنا جول بەرمەۋ ماڭىزدى», - دەپ اتاپ ءوتتى ءوڭىر باسشىسى.
وبلىس اكىمى ۇجىمدىق شارتتاردى ورىنداۋ, قىزمەتكەرلەردىڭ جالاقىسىن ارتتىرۋ, جۇمىس ورىندارىن ساقتاۋ ماسەلەلەرىنە ەرەكشە نازار اۋداردى. سونداي-اق ول ەلباسىنىڭ ءوندىرىستى تسيفرلاندىرۋ جانە جاڭعىرتۋ جونىندەگى تاپسىرماسىن ىسكە اسىرۋعا بەلسەندى ات سالىسۋعا, قازاقستاندىق مازمۇن مەن الەۋمەتتىك جاۋاپكەرشىلىكتى دامىتۋدى جالعاستىرۋعا شاقىردى. بۇدان باسقا وبلىستاعى وقۋ ورىندارمەن كاسىپورىن ءۇشىن تالاپ ەتىلەتىن مامانداردى دايىنداۋعا ۇزاق مەرزىمدى شارتتار جاساسۋ مۇمكىندىگىن قاراستىرۋ قاجەت.
كەزدەسۋ وبلىس اكىمدىگى, كاسىپورىن باسشىلىعى مەن كاسىپوداقتاردىڭ اۋماقتىق بىرلەستىگى اراسىندا ەڭبەك قاتىناستارىن رەتتەۋ, قىزمەتكەرلەر ءۇشىن الەۋمەتتىك كەپىلدىكتەردى قامتاماسىز ەتۋ ماسەلەلەرىندە وڭىرلىك دەڭگەيدە ودان ءارى كەلىسىلگەن ءىس-قيمىلدار مەن ءوزارا تۇسىنىستىك تۋرالى مەموراندۋمعا قول قويۋمەن اياقتالدى.
وسىعان ۇقساس كەزدەسۋ اقتوبە رەلس – ارقالىق زاۋىتىندا دا ءوتتى. كاسىپورىن قازاقستان رەسپۋبليكاسىن ۇدەمەلى يندۋستريالىق-يننوۆاتسيالىق دامىتۋ جونىندەگى مەملەكەتتىك باعدارلاما اياسىندا سالىنعان يننوۆاتسيالىق جوبا بولىپ تابىلادى. مۇندا 800 – گە جۋىق ادام ەڭبەك ەتەدى. ورتاشا ايلىق جالاقى – 237, 1 مىڭ تەڭگە. زاۋىتتىڭ كاسىپوداق بىرلەستىگى تەك وتكەن جىلى عانا قۇرىلدى.
كەزدەسۋ بارىسىندا زاۋىتتىڭ بارلىق قىزمەتكەرلەرى سۇراق قويا الدى. ولاردى قوعامدىق كولىك جۇمىسى مەن بالاباقشالاردىڭ جۇمىس كەستەسىن قايتا قاراۋ مۇمكىندىگى قىزىقتىردى. اقتوبە رەلس ارقالىق زاۋىتى جشس ۇجىمىمەن كەزدەسۋ دە مەموراندۋمعا قول قويۋمەن اياقتالدى.
ءوڭىر باسشىسى وندىرىستىك ۇجىمداردى اقتوبەنىڭ 150 جىلدىق مەرەيتويىنا وراي ءوز قالالارىن دامىتۋعا ۇلەس قوسۋعا شاقىردى:
«بۇل مەرەيتويعا قالانىڭ ءاربىر تۇرعىنى قاتىسۋى كەرەك. ءار ادام تۋعان ولكەسىنىڭ دامۋىنا ۇلەس قوسۋى ءتيىس. سوندىقتان, ءاربىر تۇرعىن ءوز اۋلاسى مەن اۋماعىن كوگالداندىرىپ, كوركەيتۋىنە بولادى», - دەدى وبلىس باسشىسى.
2018 جىلى وبلىس بويىنشا وندىرىستىك پروتسەستەردى تۇراقتاندىرۋ, قىزمەتكەرلەردىڭ ەڭبەك قۇقىقتارى مەن كەپىلدىكتەرىن قامتاماسىز ەتۋ بويىنشا 4781 مەموراندۋم جاسالدى. ولاردى ىسكە اسىرۋ ناتيجەسىندە وتكەن جىلى وبلىستاعى 591 كاسىپورىندا ەڭبەكاقى كوتەرىلدى. جالاقىنىڭ ءوسۋى نەگىزىنەن ءوندىرىس قىزمەتكەرلەرىنە اسەر ەتتى.
مىسالى, 2018 جىلعى قاڭتاردان باستاپ سنپس-اقتوبەمۇنايگاز اق قىزمەتكەرلەرىنىڭ جالاقىسى 12 - دەن 23%-عا دەيىن, سنپس - اقتوبە كولىك كومپانياسى جشس - 7-23% - عا دەيىن, قازاقويل اقتوبە جشس, ۆوسحود-Oriel جشس, ۆوسحود حروم جشس, اربز جشس, شىعىس مۇناي جانە سەرۆيستىك قىزمەت كورسەتۋ جشس, بازالت-ا جشس-ءنىڭ جانە دە باسقا دا كاسىپورىنداردا جالاقى 10%-عا ءوستى.