پوليتسيا قىزمەتكەرلەرى جول ءتارتىبى ەرەجەلەرىن ورەسكەل بۇزعان ماس جۇرگىزۋشىنى كۇشپەن توقتاتۋعا تۋرا كەلدى.
«مەرسەدەس» اۆتوكولىگىمەن جەلدەي جۇيتكىگەن جۇرگىزۋشى جول-پاترۋل پوليتسەيلەرىنىڭ توقتاۋ تۋرالى بەلگىسىنە مويىنۇسىنباعان. كۇشتەپ توقتاتىلعان بۇزاقى كولىك سالونىنان شىعۋدان باس تارتىپ, ونىڭ اقىرى پوليتسيا اۆتوكولىگىن سوعىپ, زاقىمداۋعا اكەلگەن.
«ماس جۇرگىزۋشىنى قۇرىقتاۋ ءۇشىن ءتارتىپ ساقشىلارى كۇش قولدانۋعا ءماجبۇر بولدى» دەلىنگەن پوليتسيا دەپارتامەنتى ءباسپاسوز قىزمەتى تاراتقان حابارلامادا.
تەكسەرۋ بارىسىندا 1978 جىلى تۋعان پەتروپاۆل قالاسى تۇرعىنىنىڭ بۇرىن جۇرگىزۋشى كۋالىگىنەن ايىرىلعانى, سول سياقتى جەڭىل دارەجەدەگى الكوگولدىك ماساڭ كۇيدە بولعانى انىقتالدى. ونىڭ جول ءتارتىبى ەرەجەلەرىن ورەسكەل بۇزۋ جانە زاڭ تارتىبىنە باعىنباۋ ارەكەتتەرىنە بايلانىستى قۇقىق بۇزۋشىلىق اكىمشىلىك حاتتاما تولتىرىلىپ, جەدەل-تەرگەۋ توبىنا تاپسىرىلدى. وقيعا بويىنشا قىلمىستىق كودەكستىڭ «بيلىك وكىلىنە قاتىستى كۇش قولدانۋ» بابى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىمىنە ەنگىزىلدى.
پەتروپاۆل قالاسى 1-ءشى پوليتسيا ءبولىمىنىڭ باستىعى, پوليتسيا پولكوۆنيگى بالابەك ءجاحيننىڭ ايتۋىنشا, بيىل سوتقا دەيىنگى تەرگەپ-تەكسەرۋلەردىڭ بىرىڭعاي تىزىمىنە پوليتسيا قىزمەتكەرلەرىنە باعىنباۋدىڭ ەكىنشى فاكتىسى تىركەلىپ وتىر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى