ۇلتتىق اكادەميالىق كىتاپحانادا «دەپۋتات» ەنتسيكلوپەدياسىنىڭ تۇساۋى كەسىلدى. شاراعا ساۋىتبەك ابدراحمانوۆ, باقىتجان جۇماعۇلوۆ, ولگا شيشيگينا سىندى تانىمال تۇلعالار مەن سەنات, ءماجىلىس, ءماسليحات دەپۋتاتتارى قاتىستى.
اتالعان ەڭبەك «دەپۋتات» گازەتىنىڭ ۇيىمداستىرۋىمەن رۋحاني جاڭعىرۋ باعدارلاماسى اياسىندا جارىققا شىققان. بۇدان بولەك, بيىل – قازاقستان رەسپۋبليكاسى ءماسليحاتتارىنىڭ 25 جىلدىعى. سونداي-اق جاس بۋىنعا سەنىم سىيلاعان جاستار جىلى ەكەنى ءمالىم. ەنتسيكلوپەديانىڭ اۆتورى ءارى اتالعان گازەتتىڭ باس رەداكتورى بۇل جيناقتىڭ وسى قوس تويى قابات كەلگەن قوعام مۇشەلەرى مەن سول جاستارعا ءاردايىم ۇلگى بولىپ جۇرگەن اعا تولقىنعا ارناعان سىيى ەكەنىن تىلگە تيەك ەتتى.
كىتاپتىڭ اۆتورى ەلميرا ۇسەنقىزىنىڭ جيناقتى جارىققا شىعارۋ بارىسىندا باسىنان وتكىزگەن وقيعالارى قاتىسۋشىلارعا ەرەكشە اسەر ەتتى. ول وسىعان دەيىن «تاۋەلسىزدىككە 25 جىل» ەنتسيكلوپەدياسىن قۇراستىرعان. «كىتاپقا قارجى مەن قور جيناپ جۇرگەندە حاۋىزدا اياعىم تايىپ قۇلاپ, باس-دەنە جاراقاتىن الدىم. ويىمدا ويلاستىرىپ قويعان دۇنيەلەرىم تۇگىلى تەلەفونىمنىڭ كودىن ۇمىتىپ قالدىم. 1 اي بويى توسەك تارتىپ جاتتىم. بار كۇشىمدى جيناپ, اياققا تۇرعان سوڭ, جيناقتى جارىققا شىعارام دەگەن ۋادەمدى ورىنداۋعا بەل بۋدىم. گازەتىمىزدىڭ بارلىق ۇجىمى جۇمىلا ىسكە كىرىستى. جازىلىپ بىتكەندە ونى شىعارۋعا دەمەۋشى ىزدەي باستادىق. ويتكەنى وعان جيناعان قاراجاتىمدى ەمدەلۋگە جۇمساعان ەدىم. مەن تابان توزدىرماعان تابالدىرىق قالمادى. ءۇمىت وتى ءسوندى. سول ساتتە سولتۇستىكتەن ءۇن ەستىلدى. ول – التىنبەك سەيپىل ۇلىنىڭ قولداۋى ەدى», دەيدى اۆتور. كىتاپ سولتۇستىك قازاقستان وبلىسى ءماسليحاتىنىڭ دەپۋتاتى, «نوعايباي» جشس ديرەكتورى, «جىل مەتسەناتى – 2018» نوميناتسياسىنىڭ يەگەرى ا. سەيپىل ۇلىنىڭ دەمەۋشىلىگىمەن شىعارىلعان.
بەلگىلى جۋرناليست, مەملەكەت جانە قوعام قايراتكەرى ساۋىتبەك ابراحمانوۆ كىتاپتىڭ لەنتاسىن قيدى. سونداعى سويلەگەن سوزىندە: «اتقامىنەر ازاماتتاردىڭ, اسىرەسە وسى بيلىك پەن حالىقتىڭ اراسىندا التىن كوپىر بولىپ جۇرگەن دەپۋتاتتار توڭىرەگىندە قيعاش پىكىرلەر جيىلەپ كەتتى. ال شىن مانىندە مەملەكەتتىك قىزمەت – اۋىر مىندەت. وسىنداي ورتادا تەر توگىپ جۇرگەن جانداردىڭ ەڭبەگىن ەلەپ, ءبىر جيناققا باسىن قوسۋ – ۇلكەن جۇمىس. ءوزى دە جولى اۋىر كىتاپ بولعان ەكەن. جالپى جازۋدىڭ, باسۋدىڭ, جارىققا شىعارۋدىڭ قانداي بولاتىنىن بىلەمىن. سوندىقتان باعالايمىن», دەي كەلە, اۆتورعا تابىس تىلەدى.
ال ءوز كەزەگىندە باقىتجان جۇماعۇلوۆ جيناقتىڭ جارىققا شىعۋىنا اتسالىسقان بارلىق جاس ۇجىمعا جانە ارنايى دەمەۋشىگە العىس ايتتى.
ايدانا شوتبايقىزى,
«ەگەمەن قازاقستان»