قازاقستاننىڭ ەۋرازيالىق ەكونوميكالىق وداققا مۇشە ەلدەرمەن مەملەكەتتىك شەكاراسىنداعى 37 اۆتوموبيل وتكىزۋ پۋنكتىنە مەملەكەتتىك كىرىستەر ورگاندارىنىڭ قىزمەتكەرلەرى تەكسەرۋ جۇمىستارىن جۇرگىزۋگە كىرىستى.
وسى ماقساتتا رەسەي فەدەراتسياسىمەن جانە قىرعىزستانمەن اراداعى شەكارانىڭ بارلىق اۆتوبەكەتتەرىنە 300-گە جۋىق قىزمەتكەر جىبەرىلدى. ولار ەكسپورتقا شىعاتىن جانە يمپورتپەن كەلەتىن تاۋارلاردى تەكسەرىپ وتىرادى. بۇل تۋرالى قارجى مينيسترلىگىنىڭ مەملەكەتتىك كىرىستەر كوميتەتىنىڭ جاۋاپتى تۇلعالارى وتكىزگەن بريفينگتە ايتىلدى.
كوميتەتتىڭ ەكسپورتتىق باقىلاۋ باسقارماسىنىڭ جەتەكشىسى ءانۋار ماديەۆتىڭ ايتۋىنشا, بيىل 16 قاڭتاردان بەرى 37 اۆتوبەكەتتە 277 ادام جۇمىس ىستەۋدە. ولارعا بىرنەشە مىندەت جۇكتەلگەن. بىرىنشىدەن, كوميتەت قىزمەتكەرلەرى ەكسپورتتىق باقىلاۋعا جاتاتىن تاۋارلاردى قاداعالايدى. ەكىنشىدەن, باجدىڭ تومەندەتىلگەن مولشەرلەمەسىنە كىرەتىن تاۋارلاردى تەكسەرەدى. ونداي تاۋارلارعا 3 مىڭعا جۋىق ءونىم كىرەدى. ۇشىنشىدەن, ەۋرازيالىق ەكونوميكالىق وداق اياسىندا تاۋارلاردى ساتۋ, جۇمىستاردى ورىنداۋ جانە قىزمەت كورسەتۋ كەزىندە يمپورتقا قوسىلعان قۇن سالىعىنىڭ تولىق ءتۇسۋىن باقىلايدى.
بۇل مونيتورينگ ءتيىستى لاۋازىمدى تۇلعالارعا بەرىلەتىن قۇجاتتاردى سكانەرلەۋ ارقىلى جۇرگىزىلەدى.
وسىلايشا, مەملەكەتتىك كىرىستەر ورگاندارى لاۋازىمدى تۇلعالارىنىڭ تاسىمالداۋشىلارمەن بايلانىسى جويىلادى.
مەملەكەتتىك كىرىستەر ورگاندارىنىڭ لاۋازىمدى تۇلعالارى مىندەتتەرىن ورىنداۋ كەزىندە جۇكتى تەكسەرىپ قاراۋدى دەربەس جۇرگىزبەيدى. باقىلاۋدىڭ بۇل ءتۇرى اتالعان تۇلعالاردىڭ قىزمەتتىك مىندەتتەمەلەرىنە كىرمەيدى.
«بۇگىندە ەلىمىزدىڭ اۋماعىنان قارا جانە ءتۇستى مەتالداردىڭ سىنىعى مەن قالدىقتارىن اكەتۋگە تىيىم سالىنعان. مەملەكەتتىك كىرىستەر كوميتەتىنىڭ قىزمەتكەرلەرى وسى ماسەلەنى دە ءجىتى قاداعالاپ وتىرادى. بۇعان دەيىن ءبىز باتىس قازاقستان وبلىسىنداعى «سىرىم» اۆتوبەكەتىندە قاناتقاقتى رەجىمدە جۇمىس ىستەپ كوردىك. سول كەزدە جۇك تاسىمالداۋشىلار تاراپىنان نارازىلىق بولدى. سوندىقتان الداعى ۋاقىتتا تۇسىنىسپەۋشىلىكتەر بولماسىن دەپ, بارلىق يمپورتتاۋشىلار مەن ەكسپورتتاۋشىلارعا الدىن الا xابار بەرگىمىز كەلىپ وتىر», دەدى ءا.ماديەۆ ءباسپاسوز ءماسليxاتىندا.
سۇڭعات ءالىپباي,
«Egemen Qazaqstan»