ءال-فارابي اتىنداعى قازاق مەملەكەتتىك ۋنيۆەرسيتەتىنىڭ جانە قر پرەزيدەنتى جانىنداعى مەملەكەتتىك باسقارۋ اكادەمياسى ديپلوماتيا ينستيتۋتىنىڭ ماگيسترانتتارى بۇۇ ۇلگىسى بويىنشا قازاقستاننىڭ بۇۇ-نىڭ قاۋىپسىزدىك كەڭەسىندەگى قىزمەتىنىڭ قورىتىندىلارى تۋرالى «دوڭگەلەك ۇستەلگە» قاتىستى.
پىكىر سايىس نيۋ-يوركتەگى بۇۇ-نىڭ قر تۇراقتى وكىلدىگى پان گي مۋن اتىنداعى تۇراقتى دامۋ ينستيتۋتى جانە «بۇۇ مودەلى - جاڭا جىبەك جولى» جاستار ۇيىمىمەن بىرلەسە ۇيىمداستىردى.
«دوڭگەلەك ۇستەلدىڭ» كۇن تارتىبىندە «كورەي تۇبەگىندەگى جاعداي», «سيريا بويىنشا استانا پروتسەسىنىڭ كونتەكستىندەگى سيريا داعدارىسىن رەتتەۋ ماسەلەسى» جانە «اۋعانستانداعى احۋالدىڭ دامۋى» اتتى ماڭىزدى ماسەلەلەر تالقىلاندى. بىرقاتار ماگيسترانتتار ساراپشىلار رەتىندە باياندامالارىن وقىپ, كورسەتىلگەن تاقىرىپتار بويىنشا باسقا قاتىسۋشىلاردىڭ سۇراقتارىنا جاۋاپ بەردى. پىكىرتالاس بارىسىندا قازاقستاندىق جوو ستۋدەنتتەرى قازىرگى زامانعى حالىقارالىق قاتىناستاردىڭ كوپتەگەن كۇردەلى داعدارىستارى بويىنشا پىكىر الماسىپ, وسى ماسەلەلەردىڭ شەشۋ جولدارىن ۇسىندى.
پىكىر الماسۋدى باستاعان قازاقستان رەسپۋبليكاسىنىڭ بۇۇ جانىڭداعى تۇراقتى وكىلى قايرات وماروۆ بۇۇ-نىڭ بەيبىتشىلىك پەن قاۋىپسىزدىكتى قامتاماسىز ەتۋگە جاۋاپتى باستى ورگانىنداعى ەلىمىزدىڭ نەگىزگى جەتىستىكتەرى مەن قاۋىپسىزدىك كەڭەسىندە قىزمەتتىڭ ەرەكشەلىكتەرى تۋرالى ايتىپ بەردى. ول بۇۇ قك-دە بولعان ەكى جىل مەرزىمىندە قازاقستان دەلەگاتسياسىنىڭ بۇۇ قاۋىپسىزدىك كەڭەسىنىڭ ءارتۇرلى دەڭگەيدەگى 1000-نان استام وتىرىستارىنا قاتىسقانىن اتاپ ءوتتى.
«قازاقستاننىڭ بۇۇ قاۋىپسىزدىك كەڭەسىندەگى قىزمەتى بارىسىنداعى جەتىستىكتەرى نەگىزىنەن مەملەكەت باسشىسىنىڭ سوعىسقا قارسى, انتيادرولىق جانە انتيتەرروريستىك سالالارىندا كەڭىنەن تانىمال, ماڭىزدى باستامالارىنىڭ ارقاسىندا مۇمكىن بولدى. ءبىز ءوزىمىزدىڭ قازىرگى زامانداعى كوپتەگەن وزەكتى ماسەلەلەرى بويىنشا قاعيداتتى جانە تەڭدەستىرىلگەن ۇستانىمىز ءۇشىن كەڭەس مۇشەلەرىنىڭ جوعارى باعالارىنا لايىق جانە حالىقارالىق ارەنادا ەلىمىزدىڭ بەدەلىن نىعايتا الدىق», - دەپ اتاپ ءوتتى ق. وماروۆ.
تۇراقتى وكىل قازاقستاندىق ستۋدەنتتەرمەن بۇۇ قاۋىپسىزدىك كەڭەسىندەگى ەكىجىلدىق جۇمىس بويىنشا ءوزىنىڭ جەكە تاجىريبەسىمەن ءبولىستى. ەلشى بۇۇ قاۋىپسىزدىك كەڭەسى مۇشەلەرىنىڭ سوڭعى جەتى جىلداعى اۋعانستانعا تۇڭعىش رەت بارۋى, بۇۇ قك بىرنەشە سانكتسيالىق كوميتەتتەرىنىڭ توراعاسى رەتىندەگى قىزمەتىنىڭ ەرەكشەلىگى, الەمدىك ءىرى مەملەكەتتەر اراسىنداعى قارىم-قاتىناستارىنداعى سەنىمنىڭ جەتىسپەۋشىلىگى جانە شيەلەنىسۋدىڭ ۇلعايۋى كەزەڭىندە قازاقستاننىڭ ۇستانىمىنىڭ قالىپتاسۋى, سونداي-اق ەلىمىزدىڭ الەمدەگى كۇردەلى ماسەلەلەردىڭ شەشىلىنۋىنە باعىتتالعان تاسىلدەمەلەرى تۋرالى تولىق اڭگىمەلەپ بەردى.
بۇۇ ۇلگىسى بويىنشا وتكەن پىكىرتالاستاردا كولۋمبيا ۋنيۆەرسيتەتى جانىنداعى MDP Global Classroom جەر ينستيتۋتىنىڭ ديرەكتورى, پروفەسسور رافيس ابازوۆ جانە بۇۇ حاتشىلىعىنىڭ قوعامدىق اقپارات دەپارتامەنتىنىڭ وكىلى مەتيۋ پامپين دە قاتىستى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلوسوفيا مەن ساياساتتانۋ, جۋرناليستيكا, قۇقىق فاكۋلتەتتەرىنىڭ جانە ەكونوميكا مەن بيزنەس جوعارعى مەكتەبىنىڭ ماگيسترانتتارى كولۋمبيا ۋنيۆەرسيتەتىنىڭ جانىنداعى جەر ينستيتۋتىمەن الماسۋ باعدارلاماسى شەڭبەرىندە نيۋ-يورك قالاسىنا كەلگەن.
قر پرەزيدەنتى جانىنداعى مەملەكەتتىك باسقارۋ اكادەمياسى ديپلوماتيا ينستيتۋتىنىڭ ماگيسترانتتارى اكادەميانىڭ قر سىرتقى ىستەر مينيسترلىگىمەن ىنتىماقتاستىعى شەڭبەرىندە قر بۇۇ جانىنداعى تۇراقتى وكىلدىگىندە تاعىلىمدامادان وتۋدە.