قازاقستان پرەزيدەنتى نۇرسۇلتان نازارباەۆ پەن رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ ۋاعدالاستىقتارىنا سايكەس, ەلىمىزدەگى №405 اۆياجوندەۋ زاۋىتىندا مي-8امت/مي-171 تىكۇشاقتارىن ءىرى توراپتىق قۇراستىرۋ جۇزەگە اسىرىلاتىن بولدى.
بۇل باستاما اياسىندا استانادا قورعانىس جانە اەروعارىش ونەركاسىبى مينيسترلىگىنە قاراستى «قازاقستان ينجينيرينگ» ۇق» اق, «№405 اۆياجوندەۋ زاۋىتى» مەن «روستەح» كورپوراتسياسىنا قاراستى «ۆەرتولەتى روسسي» اق اراسىندا مي-8امت/مي-171 تىكۇشاقتارىن ءىرى توراپتىق قۇراستىرۋدى قازاقستاندا ۇيىمداستىرۋ تۋرالى كەلىسىمشارتقا قول قويىلدى.
وتاندىق كاسىپورىن مي-8امت/مي-171 تىكۇشاقتارىن جوندەۋ, جەتىلدىرۋ جانە تەحنيكالىق قىزمەت كورسەتۋگە مۇمكىندىك بەرەتىن قازاقستاندىق جانە حالىقارالىق ورگانداردىڭ سەرتيفيكاتتارىن يەلەنگەن. ونىڭ ۇستىنە اتالعان زاۋىت تىكۇشاقتاردىڭ وسى ءتۇرىن قاۋىپسىز پايدالانۋدى قامتاماسىز ەتۋگە بىلىكتىلىگى ساي كەلەتىن قازاقستانداعى بىردەن-ءبىر كاسىپورىن بولىپ وتىر.
سونىمەن قاتار ەلىمىزدە اۋىر تىكۇشاقتاردى قۇراستىرۋ تەحنولوگياسى تۇڭعىش رەت ەنگىزىلەتىندىگى جانە ونىڭ بيۋدجەتتىك ينۆەستيتسيالاردى تارتپاي ۇيىمداستىرىلاتىنى – جوبانىڭ نەگىزگى باسىمدىعى. تىكۇشاقتاردى قۇراستىرۋ ءوندىرىسى وتاندىق قورعانىس ونەركاسىبىن, ازاماتتىق تىكۇشاق يندۋسترياسىن جانە وقۋ-جاتتىعۋ بازالارىن ەداۋىر دامىتۋعا مۇرىندىق بولادى.
قازىر مي-8امت/مي-171 تىكۇشاقتارىنا نەگىزىنەن مەملەكەتتىك مەكەمەلەر مەن كوممەرتسيالىق اۋە كومپانيالارى تاراپىنان تاپسىرىس بەرىلۋدە.
سەرىك ابدىبەك,
«Egemen Qazaqstan»