ۇلتتىق قانت ديابەتى رەگيسترىنىڭ مالىمەتىنشە, ەلىمىزدە قانت ديابەتىنە شالدىققانداردىڭ سانى 300 مىڭنان اسادى. ولاردىڭ 18 مىڭى ءبىرىنشى تيپتەگى ديابەتپەن, 291 مىڭى ەكىنشى تيپپەن اۋىرادى. دەرتكە شالدىققانداردى مەملەكەت تەگىن ەمدەيدى.
ياعني, كەپىلدەندىرىلگەن تەگىن مەديتسينالىق كومەك پاكەتى شەڭبەرىندە ولارعا 48 ءتۇرلى ءدارى مەن مەديتسينا بۇيىمدارى بەرىلەدى. وعان شپريتس, تەست-جولاقشا, گليۋكومەتر, ينسۋلين پومپالارى مەن 22 ءتۇرلى ينسۋلين كىرەدى. بىلتىر بيۋدجەتتەن ينسۋلين ساتىپ الۋعا 11 ملرد تەڭگە, ال تابلەتكالارعا 4 ملرد تەڭگە بولىنگەن. بىراق 150-گە جۋىق ناۋقاس پرەپاراتتى الماعانىن ايتىپ, شاعىمدانعان. تاياۋدا وسىنشاما ناۋقاسقا جەتپەي قالعان قازاقستاندىق ينسۋلين وزبەكستاندا كوتەرمە باعادان دا تومەن ساتىلىپ جاتىر دەگەن حابار تارالدى.
بۇل جاعدايدان دەنساۋلىق ساقتاۋ مينيسترلىگى بۇرىننان حاباردار بولىپ شىقتى. ولار ءىستىڭ جاي-جاپسارىن ءبىلۋ ءۇشىن وتكەن جىلدىڭ اياعىندا سىرتقى ىستەر مينيسترلىگى ارقىلى كورشى ەلدەگى ارىپتەستەرىنە سۇراۋ سالعان كورىنەدى. «وزبەكستاندا ينسۋلين ساتىلىپ جاتقانى تۋرالى اقپارات كەلدى. سوعان بايلانىستى مينيسترلىك قۇزىرەتتى ورگاندارمەن تەكسەرىستى باستاپ كەتتى. بىلتىر جىل سوڭىندا وزبەكستاننىڭ دەنساۋلىق ساقتاۋ مينيسترلىگىنە ءتيىستى حات جولداپ, وسىنداي فاكتىلەر تىركەلگەن جاعدايدا ءبىزدى حاباردار ەتۋدى سۇرادىق», دەدى فارماتسيا كوميتەتى توراعاسىنىڭ ورىنباسارى نۇرلىبەك اسىلبەكوۆ.
«ينسۋليندەر بىرىڭعاي ديستريبيۋتور ارقىلى ساتىپ الىنىپ, قازاقستاننىڭ تىكەلەي مەديتسينالىق ۇيىمدارىنا كەلىپ تۇسەدى. ول جەردە ينسۋليندەر رەتسەپت رەتىندە جازىلىپ, پاتسيەنتتەردىڭ قولىنا تاپسىرىلادى. بىلتىر ءبىز بولشەك ساۋدا جەلىسىندە بىرىڭعاي ديستريبيۋتور ارقىلى الىنعان وسىنداي پرەپاراتتاردىڭ ساتىلۋ جاعدايلارىن انىقتاعان بولاتىنبىز. بۇل فاكتىلەر تۋرالى قۇقىق قورعاۋ ورگاندارىنا دا حابار بەردىك. ءبىز پاتسيەنتتەردىڭ سول پرەپاراتتى العانىنان نەمەسە باسقا جەرگە ساتقانىنان حابارىمىز جوق. بولماسا ول پرەپاراتتار سىزىلىپ تاستالىپ, مەديتسينالىق ۇيىمداردان الىنعان. باسقا دا ورگاندار مەن پروكۋراتۋرا ءىستىڭ ءمان-جايىن انىقتاۋ ۇستىندە», دەدى فارماتسيا كوميتەتىنىڭ توراعاسى ليۋدميلا بيۋرابەكوۆا.
باس پروكۋروردىڭ ورىنباسارى اندرەي لۋكين پارلامەنت ماجىلىسىندە تىلشىلەرگە بەرگەن جاۋابىندا اتالعان دەرەك بويىنشا پروكۋراتۋرا تەكسەرۋ جۇرگىزىپ جاتقانىن جەتكىزدى.
ال مينيسترلىك وكىلدەرى اقپاراتتىڭ انىق-قانىعى وسى ايدىڭ سوڭىندا جاريالاناتىنىن ءمالىم ەتتى.
مايگۇل سۇلتان,
«Egemen Qazaqstan»