19 قاڭتار – پراۆوسلاۆ حريستياندار «كرەششەنيا گوسپودنيا» ءدىني مەرەكەسىن اتاپ وتەدى. بۇل كۇنى ولار مۇزدى ويىپ, سۋعا ءتۇسىپ, «سۋمەن شوقىنۋ, سۋمەن تازارۋ» ءراسىمىن جاسايدى.
ءبىر قىزىعى, ورال قالاسىندا بۇل مەرەكە جالپىحالىقتىق سيپات العان. ياعني قىستىڭ قاقاعان ايازىندا جايىقتىڭ مۇزىن ويىپ, ءبىر سۇڭگىپ شىعۋ ءۇشىن وزەنگە اعىلعان ءنوپىر حالىقتىڭ ىشىنەن ورىس پەن قازاقتى, مۇسىلمان مەن حريستياندى قاتار كورۋگە بولادى.
- بۇل كۇنى حالىق ءجيى شوعىرلاناتىن جەرلەردە ءبىزدىڭ قىزمەتكەرلەرىمىز, قۇتقارۋشىلار كەزەكشىلىك ەتىپ, تۇرعىنداردىڭ قاۋىپسىزدىگىن قامتاماسىز ەتەتىن بولادى, - دەيدى باتىس قازاقستان وبلىستىق توتەنشە جاعدايلار دەپارتامەنتى توتەنشە جاعدايلاردى جويۋ ءبولىمىنىڭ باستىعى, ازاماتتىق قورعاۋ پودپولكوۆنيگى باقىتجان يحسانوۆ.
بيىل سۋعا تۇسۋگە نيەت بىلدىرگەندەر ءۇشىن ورال قالاسى اۋماعىنداعى جايىق, شاعان, دەركول جانە باسقا وزەن-كولدەرگە ارنايى 14 سۋات ويىلىپ, ادامدار ءتۇسىپ-شىعاتىن باسپا-ساتى ورناتىلماق.
- قاڭتاردا مۇزداي سۋعا ءتۇسۋ وڭاي ەمەس. سوندىقتان الدىن الا قاۋىپسىزدىك شارالارىن قاتاڭ ەسكەرۋ كەرەك. سۋ ىشىندە 10-20 سەكۋندتان ارتىق بولۋعا بولمايدى. مۇز ۇستىندە, سۋعا ءتۇسىپ-شىعاردا تايىپ قۇلاماۋ ءۇشىن ارنايى اياق كيىم, سۇرتىنەتىن سۇلگى, ىستىق شاي سەكىلدى نارسەلەردى الدىن الا قامداۋ كەرەك, - دەيدى توتەنشەلىكتەر.
وتكەن جىلى 19 قاڭتاردا جايىق وزەنىندە ورال قالاسىنىڭ كونە سوبور اتالاتىن اۋماعىنداعى ءبىر ويىققا عانا 2 مىڭنان اسا ادام سۋعا ءتۇسىپ شىققانى تىركەلگەن.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان