الماتىلىقتار ءجيى كەلەتىن ورىنداردىڭ ءبىرى قالاداعى باۋم توعايى. بۇگىنگى كۇنگە دەيىن توعاي رەسپۋبليكالىق ماڭىزى بار ەرەكشە قورعالاتىن اۋماقتاردىڭ ساناتىنا كىرگەندىكتەن, زاڭ جۇزىندە مۇندا قانداي دا ءبىر جۇمىستار جۇرگىزۋگە تىيىم سالىنىپ كەلگەن ەدى. جۋىردا عانا قالا اكىمدىگىنىڭ قاراماعىنا وتكەن توعاي ەندى جاڭا كەيىپتە تۇرلەنە تۇسپەك.
قوس بىردەي فۋتبول الاڭى قايتا قالپىنا كەلتىرىلىپ, باق اۋماعىنا كىشى ارحيتەكتۋرالىق مۇسىندەر ورنالىتماق. باقتاعى جاسىل جەلەكتەردىڭ جاعدايى تەكسەرىلىپ, اعاشتاردىڭ يممۋنيتەتىن جاقسارتۋ, وسىمدىكتەردى زيانكەستەردەن قورعاۋ بويىنشا بيولوگيالىق وڭدەۋ جۇمىستارى جۇرگىزىلەتىن بولادى. ماماندار توپىراعى سورتاڭ تارتقان اۋماقتاردى قۇنارلاندىرۋ ءىسى دە ءبىرىنشى كەزەكتە قولعا الىناتىنىن ايتادى. بۇگىندە القاپقا التى كۇزەتشى مەن بەس ورمانشى قارايدى. بىلتىر توعايداعى قاۋىپسىزدىكتى كۇشەيتۋ ماقساتىندا ءتورت بىردەي پوليتسيا بەكەتى قويىلىپتى.
الماتى قالاسى تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ ءبولىم باسشىسى الەكساندر سەرگەەۆتىڭ سوزىنشە, بىلتىر شاھار تۇرعىندارىنا قولايلى بولۋ ءۇشىن مۇندا 70 ورىندىق ورناتىلعان. وعان قوسا 50 شاقتى جول سىلتەگىش باعاندار مەن اقپاراتتىق تاقتايشالار قويىلىپتى. بۇدان بىلاي باۋم ورمانى جەرگىلىكتى ماڭىزى بار ەسكەرتكىشتەر تىزىمىنە كىرمەك.
ارمان وكتيابر,
«ەگەمەن قازاقستان»
الماتى