ىشكى ىستەر مينيسترى ينسپەكتور ەرلان نۇرعاليەۆتىڭ ولىمىنە قاتىستى تۇسىنىكتەمە بەردى.
قالمۇحانبەت قاسىموۆ كۇدىكتىلەر اراسىندا قىزىلوردا وبلىسىنىڭ تۇرعىندارى بار ەكەنىن, سونداي-اق ولار وقيعا ورنىنان جاسىرىنعانىن ايتتى.
«ەرلان نۇرعاليەۆتىڭ ولىمىنە كۇدىكتىلەر اراسىندا قىزىلوردا تۇرعىندارى بار. قىزىلوردا وبلىسى پوليتسيا دەپارتامەنتىنىڭ قىزمەتكەرلەرى باعىتتاما مالىمەت تاراتتى. كولىك پەن ادامداردىڭ كىم ەكەنى انىقتالدى. كۋاگەرلەر بار, ول جەردە ەكى كولىك بولعان. قازىر ىزدەۋ جاريالاندى», دەدى ق.قاسىموۆ.
سونداي-اق مينيستر جاراقات العان ينسپەكتوردى اۋرۋحاناعا جەتكىزۋگە كوپ ۋاقىت كەتتى دەگەن اقپاراتقا قاتىستى جاۋاپ بەردى.
«قورىقشى نەگە كولىكپەن جەتكىزىلمەدى دەسەك, قىلمىسكەرلەر قىلمىس ورنىنان كەتەر الدىندا كولىك كىلتىن الىپ, ناۆيگاتوردى ج ۇلىپ تاستاعان. سوندىقتان ەكىنشى كولىك ولاردى بىردەن تابا الماعان. ارينە, سول سەبەپتەن ونى اۋرۋحاناعا جەتكىزۋ ءۇشىن ۋاقىت جوعالتىپ الدىق. ءبىز تاڭەرتەڭنەن بەرى جەتكىزگىمىز كەلگەن, بىراق تۇسكە دەيىن اۋا رايىنىڭ قولايسىزدىعىنا بايلانىستى تىكۇشاقپەن بارا المادىق. ءبىز توتەنشە جاعدايلارعا ارنالعان تىكۇشاقتى پايدالانا المادىق, اۋەگە كوتەرىلۋگە رۇقسات بەرمەدى. ءبىز «ادام ءولتىرۋ» بابىمەن ءىس قوزعادىق. بۇل ادامدار ءالى ۇستالعان جوق. ولار ەكى كولىكتە بولعان. بىراق قىلمىسقا ءبىر كولىكتەگى ءۇش ادام بارعان. كەيبىرەۋلەرىن انىقتادىق, سولار ارقىلى نەگىزگى قىلمىسكەرلەردىڭ كىم ەكەنىن بىلدىك. مالىمەتتەر بولعان جاعدايدا بىردەن حابارلايمىز», دەدى ق.قاسىموۆ.
ەسكە سالساق, قاراعاندى وبلىسىنىڭ نۇرا اۋدانىندا براكونەرلەر ينسپەكتورلارعا قارۋلى قارسىلىق تانىتىپ, ولاردى سوققىعا جىققان بولاتىن. سالدارىنان ەكى ينسپەكتور اۋىر جاراقات الىپ, ءبىرى كوز جۇمدى.