سەمەي قالاسىنىڭ زاسيادكو كوشەسىندەگى №58 ءۇيدىڭ تۇرعىندارى تەلەفون شالىپ, مۇڭدارىن شاقتى. «1998 جىلى سالىنعان, 226 پاتەرى, 600-گە جۋىق تۇرعىنى بار ءبىزدىڭ ءۇي شوقان ءۋاليحانوۆ پەن زاسيادكو كوشەلەرىنىڭ قيىلىسىندا ورنالاسقان. «سەمەي اۆتوبەكەتى» دە وسى ماڭدا ورىن تەپكەن. ءبىز وسى قالالىق اۆتوبەكەتتە جالدا بولعان ش.ءۋاليحانوۆ كوشەسىنىڭ جەكەمەنشىككە ساتىلىپ كەتكەنىن ەستىدىك. بۇل قالاي بولعانى؟ قانشالىقتى زاڭدى؟ كەلىپ, جاعدايىمىزبەن تانىسساڭىز جاقسى بولار ەدى» دەپ ءوتىنىش جاساعان سوڭ سەمەيگە جول تارتتىق.
زاسيادكو كوشەسىندەگى №58 ءۇيدىڭ تۇرعىندارىنان ەستىپ-بىلگەنىمىز, شوقان ءۋاليحانوۆ كوشەسى قالانىڭ باس جوسپارىنا سايكەس جالپى قولدانىستاعى, ياعني اۆتوبۋستار مەن اۆتوكولىكتەردىڭ, ادامداردىڭ ەركىن ءجۇرىپ-تۇرۋىنا ارنالعان كوشە سانالادى. دەمەك, ساتۋعا بولمايدى. وسى ماسەلەگە الاڭداۋشىلىق بىلدىرگەن اتالعان كوشەنىڭ بىرنەشە تۇرعىنى سەمەي قالالىق قوعامدىق كەڭەسىنىڭ تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى كوميسسياسىنىڭ جەتەكشىسى نيكولاي يساەۆقا حات جولداپ, قالالىق اكىمدىكتىڭ جەر ۋچاسكەسىن جەكەمەنشىككە بەرۋ جونىندەگى قاۋلىسىن جويۋعا اتسالىسۋىن سۇراعاندارىن ايتادى. «كەڭەس زامانىندا اۆتوبەكەتتىڭ الدىندا جولاۋشىلاردى وتىرعىزىپ-مىنگىزەتىن ورىن بولاتىن. كوشەدەن كولىكتەر اعىلىپ ءوتىپ جاتاتىن. وداق تاراعاننان كەيىن زاسيادكو كوشەسى مەن ايماۋىتوۆ كوشەلەرى ارالىعىنداعى ءۋاليحانوۆ كوشەسى ۋاقىتشا «سەمەي اۆتوبەكەتى» جشس-ىنە جالعا بەرىلىپ, جەكەمەنشىك يەسى اتالعان كوشەنى تەمىر قورشاۋمەن جاۋىپ العان بولاتىن. بۇگىندە اتالعان كوشە مەنشىككە ءوتىپ, پايدالانۋ نىسانى «اۆتوۆوكزالعا قىزمەت كورسەتۋ ءۇشىن» دەپ وزگەرتىلگەن. ءبىز قالا تۇرعىندارىنىڭ يگىلىگى ءۇشىن جۇمىس ىستەپ تۇرعان جەردى بيزنەسكە اينالدىرۋعا قارسىمىز. كوشە وزىمىزگە قايتارىلسىن» دەيدى «زاسيادكو» پاتەر يەلەرى كووپەراتيۆىنىڭ جەتەكشىسى ابىلاي تۇرىمباەۆ.
سەمەيگە بارعان كۇنى قالالىق اكىمدىكتە قالا اكىمىنىڭ ورىنباسارى نيكولاي ۋشاكوۆتىڭ توراعالىعىمەن شاھاردىڭ باس جوسپارىنا بايلانىستى قوعامدىق تىڭداۋ ءوتىپ جاتىر ەكەن. جيىندا قالانىڭ باس جوسپارىن جاساعان «گرادا» جشس-ءنىڭ ديرەكتورى اركەنجان مامەدوۆكە سەمەي قالالىق قوعامدىق كەڭەسىنىڭ تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى كوميسسياسىنىڭ جەتەكشىسى نيكولاي يساەۆ پەن زاسيادكو كوشەسىندەگى №58 ءۇيدىڭ تۇرعىندارى زاڭسىز ساتىلىپ كەتكەن شوقان ءۋاليحانوۆ كوشەسىنە قاتىستى سۇراق قويدى. «باس جوسپارعا سايكەس بۇل كوشە جالپى قولدانىستاعى, جۇرت ەمىن-ەركىن ءجۇرىپ تۇراتىن اشىق كوشە بولۋى ءتيىس. كوشەنىڭ نەگە, قالاي ساتىلىپ كەتكەنىن ءبىز بىلمەيمىز. وعان جەرگىلىكتى اتقارۋشى ورگاندار زاڭدى تۇردە جاۋاپ بەرەدى» دەدى ول.
ءتۇيىن:
وزدەرى كۇندەلىكتى ەمىن-ەركىن ءوتىپ جۇرگەن كوشەنىڭ مەنشىككە بەرىلگەنىنە قاپالى تۇرعىندار بۇل ماسەلەنى سەمەي قالاسى اكىمدىگى تەز ارادا رەتكە كەلتىرەر دەپ ءۇمىت ەتىپ وتىر.
ازامات قاسىم,
«ەگەمەن قازاقستان»
سەمەي