مەملەكەت باسشىسىنىڭ « ۇلى دالانىڭ جەتى قىرى» اتتى ماقالاسىن وتكەننەن ونەگە الىپ, تاريحي سانانى جاڭعىرتۋعا باعىتتالعان تەرەڭ تولعام دەپ باعالاۋىمىز كەرەك. مۇندا ەلباسى «الەمنىڭ جەتى كەرەمەتى» ىسپەتتى ۇلى دالا ەلى مەن ۇلى دالانى ۇران ەتكەن ۇرپاقتارىن ماقتانىش ەتە الاتىن جەتى ەرەكشە قىرىن قامتىپ وتىر. مۇنى جەتى بولىكتە قاراستىرۋىنىڭ ءوزى دە جەتى اتادان باستاۋ الاتىن قازاق حالقىنىڭ ەتنوەرەكشەلىكتەرىن كورسەتسە كەرەك. قازاقتىڭ دارحان دالاسىن ەجەلدەن مەكەندەگەن بابالارىمىز دۇنيە ءجۇزىنىڭ ماتەريالدىق ءھام رۋحاني مۇراسىنا وشپەس ءىز قالدىردى. ونىڭ نەگىزگى تۇپقازىعى كوشپەلى وركەنيەت پەن وتىرشىلدىق مادەنيەتتىڭ توعىسىندا جاسالدى. كوشپەندىلەر يمپەرياسىنىڭ الەم كارتاسىنا ەلەۋلى وزگەرىستەر ەنگىزگەنى, ماتەريالدىق مادەنيەت پەن رۋحاني مۇرالاردىڭ باي قازىناسىن قالدىرعانى تاريح بەتتەرىندە سايراپ جاتىر. مەملەكەت باسشىسى ءوز ماقالاسىندا وسى تاريحىمىزعا تەرەڭ وي سالىپ, ءتۇپ تامىرىمىزدى حالقىمىزدىڭ رۋحاني يگىلىگىنە اينالدىرۋ جانە مۇنى وزگە مەملەكەتتەرگە تانىستىرۋ ءۇشىن بۇگىنگى وركەنيەت جاعدايىندا بارشاعا تۇسىنىكتى ءارى ولاردىڭ سۇرانىسىنا يە بولۋىن قامتاماسىز ەتۋ جولىندا جاڭعىرتۋعا قاتىستى ماڭىزدى جوبالاردى قولعا الۋ قاجەتتىگىن ايتىپ وتىر.
بۇل جوبالار ماقالادا «ارحيۆ – 2025», « ۇلى دالانىڭ ۇلى ەسىمدەرى», «تۇركى الەمىنىڭ گەنەزيسى», « ۇلى دالانىڭ ەجەلگى ونەر جانە تەحنولوگيالار مۋزەيى», «دالا فولكلورى مەن مۋزىكاسىنىڭ مىڭ جىلى», «تاريحتىڭ كينو ونەرى مەن تەلەۆيزياداعى كورىنىسى» دەپ اتالادى.
ماقالادا « ۇلى دالانىڭ جەتى قىرى: اتقا ءمىنۋ مادەنيەتى, ەجەلگى مەتاللۋرگيا, اڭ ءستيلى, التىن ادام, تۇركى الەمىنىڭ بەسىگى, ۇلى جىبەك جولى, قازاقستان – الما مەن قىزعالداقتىڭ وتانى», دەپ ناقتىلاپ كورسەتىلۋىندە دە ۇلكەن ءمان بار. ماسەلەن, جىلقى ۇستاۋ مەن ونى ادام يگىلىگىنە پايدالانۋ مادەنيەتى شەڭبەرىندەگى تەحنولوگيالىق جەتىستىكتەردى ادامزات قوعامى مىڭداعان جىلدار بويى قولدانىپ كەلدى, ونى ءارتۇرلى مازمۇندا بايىتا ءبىلدى. ال تۇركىلەردىڭ, سونىڭ ىشىندە قازاق حالقىندا فولكلورلىق مۇرالاردىڭ, سونىمەن قاتار مۋزىكالىق ونەردىڭ مول قازىناسى ساقتالىپ, بۇگىنگى زامانعا جەتتى. ۇلى جىبەك جولىن بۇگىندە «باتىس ەۋروپا-باتىس قىتاي» ءاۆتودالىزى جالعاپ وتىر.
ەندىگى جەردە ۇلى دالانىڭ كوپ عاسىرلىق رۋحاني ءھام ماتەريالدىق مۇرالارىن زاماناۋي تەحنولوگيالار مەن جاڭا قالىپتاسىپ جاتقان تسيفرلى وركەنيەتتىڭ سۇرانىمىنا ساي قايتا جاڭعىرتۋ بۇگىنگى ۇرپاقتىڭ الدىنداعى مىندەت. سوندىقتان مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلاماسىن ءوزىنىڭ يدەولوگيالىق جۇمىسىنىڭ پلاتفورماسى ەتىپ قابىلداعان «نۇروتاندىقتار» بۇل باعىتتاعى جۇمىستا ءوزىنىڭ بەلسەندىلىگىن كورسەتەتىن بولادى.
يبادۋللا قۇتتىقوجاەۆ,
«نۇر وتان» پارتياسى قىزىلوردا وبلىستىق فيليالى توراعاسىنىڭ ءبىرىنشى ورىنباسارى
قىزىلوردا وبلىسى