سەنبى كۇنى اقتوبە وبلىسىنىڭ اكىمى بەردىبەك ساپارباەۆ قىزمەت بابىمەن حرومتاۋ اۋدانىندا بولىپ, بىرقاتار الەۋمەتتىك نىسانداردىڭ اشىلۋىنا قاتىستى, اۋداننىڭ دامۋىمەن جانە مەملەكەتتىك باعدارلاماالاردىڭ جۇزەگە اسىرىلۋىمەن تانىستى.
اقجار اۋىلدىق وكرۋگىنىڭ جازىق ستانساسىنا ەرتەمەن كەلگەن ول اۋىل ىشىنە جۇرگىزىلگەن جالپى ۇزىندىعى 13,5 شاقىرىمدىق گاز قۇبىرىنىڭ سالتاناتتى تۇردە ىسكە قوسىلۋىنا قاتىستى. جوبا قۇنى 105 ملن تەڭگەدەن اسادى.
«بيىل مەملەكەت باسشىسى نۇرسۇلتان نازارباەۆ حالىقتىڭ ءال-اۋقاتىن كوتەرۋگە باعىتتالعان بەس الەۋمەتتىك باستامانى اتادى. باستامالاردىڭ ءبىرى ەلدى مەكەندەردى گازداندىرۋعا قاتىستى. بۇگىندە اقتوبە وبلىسى حالقىنىڭ 88 پايىزدان استامى گازبەن قامتىلعان. سونىمەن بىرگە, حرومتاۋ اۋدانى تۇرعىندارىنىڭ كوگىلدىر وتىنمەن قامتىلۋى 94%-دى قۇرايدى. اۋداننىڭ بارلىق ەلدى مەكەندەرىندە گاز بار. جۋىردا قالعان كىشىگىرىم اۋىلداردى گازداندىرامىز. تابيعي گاز اۋىلداردىڭ جاڭعىرۋىنا سەرپىن بەرەتىنىنە سەنىمدىمىن»,- دەدى بەردىبەك ساپارباەۆ قۇتتىقتاۋ سوزىندە.
ايتا كەتەيىك, بيىل وبلىستا گازداندىرۋ بويىنشا ءۇش جوبا جۇزەگە اسىرىلدى. بۇدان باسقا, گازبەن جابدىقتاۋدىڭ جالپى قۇنى 6,4 ملرد تەڭگە بولاتىن 19 جوباسىن جۇزەگە اسىرۋ باستالدى. ولار 2019-2020 جىلدارى اياقتالماق. ناتيجەسىندە 7 مىڭنان استام حالقى بار 14 اۋىلعا گاز جەتكىزىلەتىن بولادى. 2020 جىلدىڭ سوڭىنا قاراي, وبلىس حالقىنىڭ گازبەن قامتىلۋى 90%-عا جەتەدى دەپ بولجانۋدا.
ءوڭىر باسشىسىنىڭ جۇمىس ساپارى ءدوڭ اۋىلىندا جالعاسىپ, ول جاقتا امبۋلاتوريا مەن بالاباقشا اشىلدى.
امبۋلاتورياعا كۇن سايىن ەلۋ ەمدەلۋشى كەلەتىن بولادى. ولار ءۇشىن قارايتىن, ەگىلەتىن جانە فيزيوتەراپيا, ەكگ كابينەتتەرى, كۇندىزگى ستاتسيونار مەن ءدارىحانا جۇمىس جاسايدى. مەكەمە سانيتارلىق اۆتوكولىكپەن, بارلىق قاجەتتى مەديتسينالىق جابىدقتارمەن, دارىلىك زاتتارمەن جانە مەديتسينالىق ماقساتتاعى بۇيىمدارمەن جاراقتانعان. مەملەكەتتىك-جەكە سەرىكتەستىك اياسىندا جۇزەگە اسىرىلعان جوبانىڭ جالپى قۇنى 92,4 ملن تەڭگە.
وبلىستىڭ اۋىلدارىندا مەملەكەتتىك-جەكە سەرىكتەستىك ارقىلى بارلىعى 21 مەديتسينالىق مەكەمە سالىندى.
جاڭادان اشىلعان «تورە» بالاباقشاسىنا 200 ءبۇلدىرشىن باراتىن بولادى. ەكىقاباتتى عيماراتتىڭ جالپى اۋماعى شامامەن 2 مىڭ شارشى مەتر. مۇندا بالالاردىڭ ۇيلەسىمدى دامىپ, تاربيەلەنۋىنە جانە ولاردى مەكتەپكە دايىنداۋعا بارلىق جاعداي جاسالعان.
وبلىس اكىمى سونداي-اق, اۋدانداعى بارلىق شارۋا قوجالىقتارىنىڭ اسىل تۇقىمدى مال كورمەسى وتكەن وڭعار اۋىلىندا دا بولدى. ءوڭىر باسشىسى كورمەنى قاراپ شىعىپ, مالشىلارمەن اڭگىمەلەستى, سونىمەن قاتار, 4 مىڭ باس ۇساق قارا مالعا ارنالعان بورداقىلاۋ الاڭى قۇرىلىسىنىڭ ءبىرىنشى كەزەڭىنىڭ جۇزەگە اسىرىلۋ بارىسىمەن تانىستى. جوبانى جۇزەگە اسىرىپ وتىرعان – «دانيار» شارۋا قوجالىعى. قوجالىق «سىباعا» مەملەكەتتىك باعدارلاماسىن پايدالانىپ, جالپى سوماسى 31,4 ملن تەڭگەگە ءبىر مىڭ باس قوي, ەكى تراكتور مەن ەكى ءشوپ بۋاتىن قوندىرعى ساتىپ العان. قوجالىق جوبانى ءارى قاراي جۇزەگە اسىرۋ ءۇشىن تاعى 190 ملن تەڭگە ينۆەستيتسيا سالۋدى جوسپارلاپ وتىر.
تەمىر قۇسايىن,
«ەگەمەن قازاقستان»