يندونەزيانىڭ زوند بۇعازى جاعالاۋىندا بولعان تسۋنامي سالدارىنان 280-نەن استام ادام قازا تاپتى.
تسۋنامي سالدارىنان 1016 ادام جاراقات العان جانە 57 ادام ءىز-ءتۇسسىز جوعالعاندار قاتارىندا. سونىمەن قاتار مىڭداعان ۇيلەر ب ۇلىنگەن. اپات سالدارىنان ەڭ قاتتى زارداپ شەككەن اۋماق – قاراماعىنا ۋدجۋنگ-كۋلون ۇلتتىق پاركى مەن تانىمال كۋرورتتار كىرەتىن بانتەن پروۆينتسياسىنداعى پاندەگلانگ وكرۋگى, دەپ حابارلادى يندونەزيانىڭ توتەنشە جاعدايلار جونىندەگى مەكەمەسى. تابيعي اپات 23 جەلتوقسان كۇنى ياۆا مەن سۋماترا ارالدارىن ءبولىپ جاتقان بۇعازدا ورىن العان.
«مەن قاتتى شۋ ەستىگەن كەزدە ۇيدە تەلەديدار كورىپ وتىر ەدىم. الدىمەن, ونى جەل دەپ ويلاپ قالدىم. ءبىر كەزدە ءۇيدىڭ ءىشىن سۋ باسا باستادى. كوشەگە جۇگىرىپ شىقتىم دا, ەكىنشى تولقىننىڭ كەلە جاتقانىن كوردىم جانە وسى كەزدە عانا ساقتانۋىم كەرەك ەكەندىگىن ءتۇسىندىم», دەيدى سۋماترا ارالىنىڭ تۇرعىنى يۋني.
ساراپشىلاردىڭ ايتۋىنشا, ءتسۋناميدىڭ ورىن الۋى تۋرالى الدىن الا حابارلايتىن يندونەزياداعى جۇيە جۇمىسى وتە ءتيىمسىز جانە قۇرال-جابدىقتارى كونەرگەن. يندونەزيا پرەزيدەنتى دجوكو ۆيدودو اپاتتان ەڭ قاتتى زارداپ شەككەن پاندەگلانگ اۋدانىنا باردى.
«تولقىنداردىڭ قاۋىپ-قاتەرىن انىقتاۋعا ارنالعان بارلىق قۇرىلعىعا تەكسەرۋ جۇرگىزۋدى تاپسىرعانمىن. جەتىسپەي جاتقان نەمەسە ىستەن شىققان قۇرال ماسەلەسىن شەشۋ قاجەت», دەپ مالىمدەدى دجوكو ۆيدودو.
ايتا كەتەرلىك جايت, مەملەكەتتىڭ مەتەرەولوگيا اگەنتتىگى قاتتى تولقىن تۋرالى ەسكەرتۋ جاساسا دا, تسۋنامي تۋرالى حابار تاراتۋدى ءجون كورمەگەن. قۇتقارۋ وپەراتسياسىنا «قىزىل كرەست جانە قىزىل جارتى اي» ۇيىمى دا قاتىسۋدا, ونىڭ قىزمەتكەرى يەن گەلفاند قايعىلى وقيعاعا تۇسىنىكتەمە بەردى:
«بۇل يندونەزيا ءۇشىن قاۋىپتى جىل بولدى. وسىمەن وڭىردە ءۇشىنشى دۇلەي ءزىلزالا ورىن الدى. قازىر قۇتقارۋشىلار جۇمىس ىستەۋدە, ولارعا قىزىل كرەست ەرىكتىلەرى دە قوسىلدى, بىزدەن 70-تەن استام ادام بار. ادامداردى ءتىرى تابۋعا دەگەن ءۇمىت ءالى دە بار. دەگەنمەن زارداپ كولەمى – وتە ۇلكەن. مەنىڭ ويىمشا, ءاردايىم ءۇمىت ۇزبەۋ كەرەك, بىراق قازا تاپقانداردىڭ سانى كوبەيۋى دە مۇمكىن», دەيدى ول.
ايتا كەتەيىك, يندونەزيا وسى جىلى تابيعي اپاتتان قاتتى زارداپ شەكتى. جازدا لومبوك پەن سۋلاۆەسي ارالدارىندا قاتتى جەر سىلكىنىسى بولىپ, وندا ەكى مىڭنان استام ادام قازا تاپتى, 14 جىل بۇرىن يندونەزيادا تسۋنامي كەسىرىنەن 200 مىڭنان استام ادام كوز جۇمعان.
قارلىعاش قۇرامىس,
«ەگەمەن قازاقستان»