قاسىم-جومارت توقاەۆتىڭ توراعالىق ەتۋىمەن سەنات بيۋروسىنىڭ 2018 جىلعى قورىتىندى وتىرىسى بولدى. پالاتانىڭ 27 جەلتوقساندا بولاتىن كەزەكتى وتىرىسىنىڭ كۇن ءتارتىبى كەلىسىلدى, دەپ حابارلايدى سەناتتىڭ ءباسپاسوز قىزمەتى.
سەناتورلار قازاقستان مەن حورۆاتيا اراسىنداعى تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى ۇكىمەتارالىق كەلىسىمدى جانە وعان حاتتامانى; قازاقستان مەن قحر اراسىنداعى قازاقستانعا تىكەلەي ينۆەستيتسيالار سالۋدى جۇزەگە اسىراتىن قىتاي-قازاقستان وندىرىستىك قۋاتتارىنىڭ ىنتىماقتاستىعى قورى كىرىسىنىڭ جەكەلەگەن تۇرلەرىن سالىق سالۋدان بوساتۋ تۋرالى ۇكىمەتارالىق كەلىسىمدى راتيفيكاتسيالاۋ تۋرالى; قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى ماسەلەلەرى بويىنشا وزگەرىستەر ەنگىزۋ تۋرالى; ەلىمىزدىڭ كەيبىر زاڭنامالىق اكتىلەرىنە اكىمشىلىك-اۋماقتىق قۇرىلىس جانە كولەڭكەلى ەكونوميكاعا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى; زاڭنامالىق اكتىلەرگە مەنشىك قۇقىعىن قورعاۋدى كۇشەيتۋ, تورەلىك, سوت جۇكتەمەسىن وڭتايلاندىرۋ جانە قىلمىستىق زاڭنامانى ودان ءارى ىزگىلەندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوبالارىن قارايتىن بولدى.
بيۋرو مۇشەلەرى سونداي-اق سەناتتىڭ 2019 جىلعا ارنالعان نەگىزگى ءىس-شارالار جوسپارىن بەكىتتى جانە حالىقارالىق پارلامەنتتىك ۇيىمدارداعى جانە شەت مەملەكەتتەر پارلامەنتتەرىمەن ىنتىماقتاستىق توپتارىنداعى سەنات دەپۋتاتتارىنىڭ قۇرامىن جاساقتادى. پارلامەنت سەناتى مەن بەلارۋس رەسپۋبليكاسى ۇلتتىق جينالىسىنىڭ رەسپۋبليكا كەڭەسى اراسىنداعى ىنتىماقتاستىق جونىندەگى كوميسسياسى يننوۆاتسيا سالاسىنداعى ىنتىماقتاستىقتى دامىتۋ جونىندەگى كىشى كوميسسيانى قۇردى.
ق.توقاەۆ ءوتىپ بارا جاتقان جىلدى قورىتىندىلاي كەلىپ, سەنات جىل ىشىندە جوسپارلى ءارى مازمۇندى جۇمىستاردى اتقارعانىن اتاپ ءوتتى. ەلباسى ۇسىنعان رەفورمالاردى جۇزەگە اسىرۋعا باعىتتالعان ماڭىزدى زاڭ جوبالارى ۋاقىتىلى قابىلدادى. سەنات وتىرىستارىندا 80 زاڭ جوباسى قارالىپ, ولاردىڭ 72-ءسى قابىلداندى, ال 8-ءى ماجىلىسكە قايتارىلدى.
سەنات جىل ىشىندە وزەكتى تاقىرىپتارعا ارنالعان جەتپىسكە جۋىق ماڭىزدى شارالار وتكىزدى, ولاردىڭ ناتيجەسىندە اتقارۋشى ورگاندارعا ناقتى ۇسىنىستار بەرىلدى. سەنات توراعاسى سونداي-اق, پالاتا دەپۋتاتتارى اتىنان ۇكىمەتكە 100-دەن اسا دەپۋتاتتىق ساۋال جولدانعانىن ايتا كەلىپ: «ساۋالدارعا بەرىلگەن جاۋاپتاردىڭ باسىم كوپشىلىگىنە دەپۋتاتتاردىڭ كوڭىلى تولماي وتىرعانىنا ۇكىمەتتىڭ نازارىن اۋدارعان بولاتىنبىز», - دەدى. الداعى جىلى ەلباسىنىڭ تاپسىرمالارىن ورىنداۋعا باعىتتالعان ماڭىزدى زاڭ جوبالارىنىڭ توپتاماسى تۇسەتىنى ايتىلدى. ء«بىز جۇمىسىمىزدىڭ ساپاسىن ودان ءارى جاقسارتىپ, وتاندىق زاڭنامانى جەتىلدىرە بەرۋىمىز قاجەت. بۇل - ءبىزدىڭ ەڭ باستى مىندەتىمىز», - دەدى سەنات باسشىسى.